Artikolu 15 Format Ewropew għall-iskambju tar-rekords elettroniċi tas-saħħa

1.   Sas-26 ta’ Marzu 2027, il-Kummissjoni għandha, permezz ta’ atti ta’ implimentazzjoni, tistabbilixxi l-ispeċifikazzjonijiet tekniċi għall-kategoriji ta’ prijorità ta’ data elettronika personali dwar is-saħħa msemmija fl-Artikolu 14(1), li jistabbilixxu l-format Ewropew għall-iskambju tar-rekords elettroniċi tas-saħħa. Tali format għandu jintuża b’mod komuni, jinqara minn magna u jippermetti t-trażmissjoni ta’ data elettronika personali dwar is-saħħa bejn applikazzjonijiet ta’ software, apparati u fornituri tal-kura tas-saħħa differenti. Tali format għandu jappoġġa t-trażmissjoni ta’ data dwar is-saħħa strutturata u mhux strutturata u għandu jinkludi l-elementi li ġejjin:

L-atti ta’ implimentazzjoni msemmija fl-ewwel subparagrafu tal-paragrafu għandhom jiġu adottati f’konformità mal-proċedura ta’ eżami msemmija fl-Artikolu 98(2).

2.   Il-Kummissjoni għandha, permess ta’ atti ta’ implimentazzjoni, tipprovdi aġġornamenti regolari tal-format Ewropew għall-iskambju tar-rekords elettroniċi tas-saħħa biex tintegra r-reviżjonijiet rilevanti tas-sistemi u n-nomenklaturi tal-kodifikazzjoni tal-kura tas-saħħa. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

3.   Il-Kummissjoni tista’, permezz ta’ atti ta’ implimentazzjoni, tistabbilixxi speċifikazzjonijiet tekniċi biex testendi l-format Ewropew għall-iskambju tar-rekords elettroniċi tas-saħħa għal kategoriji addizzjonali ta’ data elettronika personali dwar is-saħħa msemmija fl-Artikolu 14(1), it-tielet subparagrafu. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

4.   L-Istati Membri għandhom jiżguraw li l-kategoriji ta’ prijorità ta’ data elettronika personali dwar is-saħħa msemmija fl-Artikolu 14 jinħarġu fil-format tal-iskambju tar-rekords elettroniċi tas-saħħa msemmi fil-paragrafu 1 ta’ dan l-Artikolu. Meta tali data tiġi trażmessa b’mezzi awtomatizzati għall-użu primarju, il-fornitur riċeventi għandu jaċċetta l-format tad-data u jkun jista’ jaqraha.