Airteagal 25 Neamhspleáchas agus coinbhleachtaí leasa a sheachaint

1.   Beidh socruithe daingne rialachais i bhfeidhm ag soláthraithe rátála ESG, lena n-áirítear struchtúr soiléir eagraíochtúil le róil agus freagrachtaí dea-shainithe, trédhearcacha agus comhsheasmhacha do gach duine a bhfuil baint acu le rátáil ESG a sholáthar.

2.   Déanfaidh soláthraithe rátála ESG gach beart is gá chun a áirithiú nach ndéanfar difear d’aon rátáil ESG a sholáthraítear le haon choinbhleacht leasa atá ann cheana nó a d’fhéadfadh a bheith ann, nó le haon chaidreamh gnó nó eile, a eascraíonn as na soláthraithe rátála ESG iad féin nó óna scairshealbhóirí, bainisteoirí, anailísithe rátála, fostaithe nó aon daoine nádúrtha eile a bhfuil a gcuid seirbhísí ar fáil ag soláthraithe rátála ESG, nó faoi rialú soláthraithe rátála ESG, nó aon daoine, atá nasctha go díreach nó go hindíreach leo trí rialú nó aon soláthraithe tríú páirtí a ndearnadh feidhmeanna nó seirbhísí nó gníomhaíochtaí ar bith a sheachfhoinsiú dóibh.

3.   I gcás ina bhfuil baol ann go mbeidh coinbhleacht leasa ann laistigh de sholáthraí rátála ESG mar gheall ar struchtúr úinéireachta, leasanna urlámhais nó gníomhaíochtaí an tsoláthraí rátála ESG sin, nó aon eintiteas ar leis nó a rialaíonn an soláthraí rátála ESG, nó eintiteas atá faoi úinéireacht nó faoi rialú an tsoláthraí rátála ESG, nó aon chleamhnaí de chuid an tsoláthraí rátála ESG nó soláthraithe tríú páirtí, déanfaidh ESMA bearta iomchuí. Ceanglóidh ESMA ar an soláthraí rátála ESG bearta a dhéanamh chun an riosca sin a mhaolú.

I gcás nach bhfuil coinbhleacht leasa amhail dá dtagraítear sa chéad fhomhír á bainistiú go leormhaith trí na bearta um maolú riosca dá dtagraítear sa chéad fhomhír, ceanglóidh ESMA ar an soláthraí rátála ESG an choinbhleacht leasa sin a réiteach. Más gá, féadfaidh ESMA a cheangal ar an soláthraí rátála ESG scor de na gníomhaíochtaí nó de na caidrimh lena gcruthaítear an choinbhleacht leasa, nó scor de na rátálacha ESG a sholáthar.

4.   Maidir le scairshealbhóir nó comhalta de sholáthraí rátála ESG a imríonn tionchar suntasach de réir bhrí Airteagal 2, pointe (13), an dara habairt, de Threoir 2013/34/AE ar an soláthraí rátála ESG sin, nó ar ghnóthas a bhfuil an chumhacht aige rialú nó tionchar ceannasach a fheidhmiú ar an soláthraí rátála ESG sin, beidh toirmeasc air aon cheann de na nithe seo a leanas a dhéanamh:

Ní bheidh feidhm ag an gcéad fhomhír den mhír seo maidir le hinfheistíochtaí i soláthraithe rátála ESG eile ar leis an ngrúpa céanna soláthraithe rátála ESG iad ná maidir le hinfheistíochtaí i soláthraithe rátála ESG ar micreaghnóthais nó gnóthais bheaga iad de réir na gcritéar a leagtar síos in Airteagal 3(1) agus Airteagal 3(2), an chéad fhomhír, faoi seach, de Threoir 2013/34/AE.

5.   Déanfaidh soláthraithe rátála ESG gach coinbhleacht leasa atá ann cheana nó a d’fhéadfadh a bheith ann a nochtadh do ESMA, lena n-áirítear coinbhleachtaí leasa a eascraíonn as úinéireacht nó rialú na soláthraithe rátála ESG.

6.   Bunóidh agus oibreoidh soláthraithe rátála ESG beartais, nósanna imeachta agus socruithe eagraíochtúla éifeachtacha chun coinbhleachtaí leasa a shainaithint, a nochtadh, a chosc, a bhainistiú agus a mhaolú. Déanfaidh soláthraithe rátála ESG na beartais, na nósanna imeachta agus na socruithe sin a athbhreithniú agus a thabhairt cothrom le dáta go tráthrialta. Leis na beartais, na nósanna imeachta agus na socruithe sin, coiscfear, bainisteofar nó maolófar go sonrach coinbhleachtaí leasa mar gheall ar úinéireacht nó rialú an tsoláthraí rátála ESG nó mar gheall ar leasanna eile i ngrúpa an tsoláthraí rátála ESG, nó coinbhleachtaí leasa ar daoine eile a imríonn tionchar nó rialú ar an soláthraí rátála ESG is cúis leo i ndáil leis an rátáil ESG a chinneadh.

7.   Déanfaidh soláthraithe rátála ESG athbhreithniú gach bliain ar a laghad ar a gcuid oibríochtaí chun coinbhleachtaí leasa a d’fhéadfadh a bheith ann a shainaithint.