Airteagal 21 An ceart chun gearán a thaisceadh le húdarás sláinte digití

1.   Gan dochar d’aon leigheas riaracháin nó breithiúnach eile, beidh sé de cheart ag daoine nádúrtha agus dlítheanacha gearán maidir leis na forálacha a leagtar síos sa Chabidil seo a thaisceadh, ina n-aonar nó i gcás inarb ábhartha, le chéile, leis an údarás sláinte digití inniúil, ar choinníoll go ndéantar difear diúltach dá gcearta nó dá leasanna.

2.   I gcás ina mbaineann an gearán le cearta daoine nádúrtha de bhun Airteagail 3 agus 5 go 10 den Rialachán seo, déanfaidh an t-údarás sláinte digití an gearán a tharchur chuig na húdaráis mhaoirseachta inniúla faoi Rialachán (AE) 2016/679. Soláthróidh an t-údarás sláinte digití an fhaisnéis is gá atá ar fáil dó don údarás maoirseachta inniúil faoi Rialachán (AE) 2016/679 chun an measúnú agus imscrúdú ar an ngearán a éascú.

3.   Cuirfidh an t-údarás sláinte digití inniúil lenar taisceadh an gearán an gearánach ar an eolas, i gcomhréir leis an dlí náisiúnta, faoin dul chun cinn a rinneadh maidir le déileáil leis an ngearán agus faoin gcinneadh arna dhéanamh i leith an ghearáin, agus maidir le haon tarchur ar an ngearán chuig an údarás maoirseachta inniúil faoi Rialachán (AE) 2016/679 agus, i gcásanna de tharchur den sórt sin, gurb é an t-údarás maoirseachta, ón nóiméad sin ar aghaidh, an t-aon phointe teagmhála don ghearánach san ábhar sin.

4.   Oibreoidh údaráis sláinte digití sna Ballstáit lena mbaineann i gcomhar le chéile chun gearáin a bhaineann leis an malartú trasteorann agus rochtain ar shonraí leictreonacha pearsanta sláinte a láimhseáil agus a réiteach, lena n-áirítear tríd an bhfaisnéis ábhartha uile a mhalartú trí mheán leictreonach, gan moill mhíchuí.

5.   Déanfaidh údaráis sláinte digití tíolacadh gearán a éascú agus déanfaidh siad uirlisí atá inrochtana go héasca a sholáthar chun gearáin a chur isteach.