Artikolu 21 Dritt li jitressaq ilment quddiem awtorità tas-saħħa diġitali

1.   Mingħajr preġudizzju għal kwalunkwe rimedju amministrattiv jew ġudizzjarju ieħor, il-persuni fiżiċi u ġuridiċi għandu jkollhom id-dritt li jippreżentaw ilment relatat mad-dispożizzjonijiet stabbiliti f’dan il-Kapitolu, individwalment jew, meta rilevanti, kollettivament, mal-awtorità tas-saħħa diġitali kompetenti, sakemm id-drittijiet jew l-interessi tagħhom jiġu affettwati b’mod negattiv.

2.   Meta l-ilment jikkonċerna d-drittijiet ta’ persuni fiżiċi skont l-Artikoli 3 u 5 sa 10 ta’ dan ir-Regolamentl-Artikoli 8a sa 8f u l-Artikolu 8h ta’ dan ir-Regolament, l-awtorità tas-saħħa diġitali għandha tittrażmetti l-ilment lill-awtoritajiet superviżorji kompetenti skont ir-Regolament (UE) 2016/679. L-awtorità tas-saħħa diġitali għandha tipprovdi l-informazzjoni meħtieġa għad-dispożizzjoni tagħha lill-awtorità superviżorja kompetenti skont ir-Regolament (UE) 2016/679 sabiex tiffaċilita l-valutazzjoni u l-investigazzjoni tal-ilment.

3.   L-awtorità tas-saħħa diġitali kompetenti li lilha jkun ġie ppreżentat l-ilment għandha tinforma, f’konformità mal-liġi nazzjonali, lill-ilmentatur dwar il-progress li jkun sar fl-indirizzar tal-ilment, dwar id-deċiżjoni meħuda dwar l-ilment dwar kwalunkwe riferiment tal-ilment lill-awtorità superviżorja kompetenti skont ir-Regolament (UE) 2016/679 u f’każijiet ta tali riferiment, li dik l-awtorità superviżorja għandha, minn dak il-mument ’il quddiem, tkun l-uniku punt ta’ kuntatt għall-ilmentatur f’dik il-kwistjoni.

4.   L-awtoritajiet tas-saħħa diġitali fl-IStati Membri kkonċernati għandhom jikkooperaw biex jittrattaw u jsolvu l-ilmenti relatati mal-iskambju transkonfinali u l-aċċess għad-data elettronika personali dwar is-saħħa, inkluż billi jaqsmu l-informazzjoni rilevanti kollha b’mezzi elettroniċi, mingħajr dewmien żejjed.

5.   L-awtoritajiet tas-saħħa diġitali għandhom jiffaċilitaw t-tressiq tal-ilmenti u jipprovdu għodod faċilment aċċessibbli għat-tressiq tal-ilmenti.