Airteagal 39 Dearbhú comhréireachta AE

1.   Sonrófar i ndearbhú comhréireachta AE dá dtagraítear in Airteagal 30(1), pointe (e), gur léirigh monaróir chóras RTS gur comhlíonadh na ceanglais bhunriachtanacha a leagtar síos in Iarscríbhinn II.

2.   I gcás ina bhfuil córas RTS faoi réir ghníomhartha dlí eile an Aontais a mhéid a bhaineann le gnéithe nach gcumhdaítear faoin Rialachán seo, lena gceanglaítear ar an monaróir freisin dearbhú comhréireachta AE a sholáthar ina bhfuil sé léirithe gur comhlíonadh ceanglais na ngníomhartha dlí sin, déanfar dearbhú comhréireachta amháin AE a tharraingt suas i ndáil le gach gníomh dlí de chuid an Aontais is infheidhme maidir le córas RTS. Áireofar i ndearbhú comhréireachta AE sin an fhaisnéis ar fad atá de dhíth chun na gníomhartha dlí de chuid an Aontais a mbaineann sé leo a shainaithint.

3.   I ndearbhú comhréireachta AE, beidh an fhaisnéis a leagtar amach in Iarscríbhinn IV agus déanfar é a aistriú go teanga amháin nó níos mó de theangacha oifigiúla an Aontais de réir mar a éilíonn na Ballstáit ina gcuirfear an córas RTS ar fáil.

4.   I gcás ina ndéantar dearbhú comhréireachta digiteach AE a tharraingt suas i bhformáid dhigiteach, cuirfear ar fáil ar líne é le haghaidh shaolré ionchasach an chórais RTS agus, i gcás ar bith, ar feadh 10 mbliana ar a laghad ón gcóras RTS a chur ar an margadh nó a chur i mbun seirbhíse.

5.   Trí dhearbhú comhréireachta AE a tharraingt suas, gabhfaidh an monaróir freagracht air féin go gcomhlíonfaidh na comhpháirteanna comhchuibhithe bogearraí den chóras RTS na ceanglais leagtar síos sa Rialachán seo nuair a chuirtear ar an margadh nó i mbun seirbhíse é.

6.   Foilseoidh an Coimisiún teimpléad caighdeánach aonfhoirmeach le haghaidh an dearbhaithe comhréireachta AE agus cuirfidh sé ar fáil é i bhformáid dhigiteach i dteangacha oifigiúla uile an Aontais.