5.3. Kultura tar-riskju u kondotta kummerċjali

Fil-valutazzjoni tal-kultura tar-riskju u tal-kondotta kummerċjali tal-istituzzjoni, l-awtoritajiet kompetenti għandhom jivvalutaw il-konformità tal-istituzzjoni mal-Linji Gwida tal-EBA dwar il-governanza interna. F’dan il-kuntest, l-awtoritajiet kompetenti għandhom jikkunsidraw inter alia jekk:

• a. l-istituzzjoni għandhiex valuri korporattivi konsistenti u kultura tar-riskju soda, li (i) huma appoġġati minn politiki u proċeduri effettivi u robusti, komunikazzjoni u taħriġ lill-persunal kollu, inkluż kodiċi ta’ kondotta u qafas xieraq għall-ġestjoni tal-kunflitti ta’ interess u mekkaniżmi ta’ rapportar biex titrawwem imġiba responsabbli u etika u biex jiġu mmonitorjati u ġestiti skoperturi ta’ partijiet relatati, u (ii) jippromwovu ambjent ta’ komunikazzjoni miftuħa u sfida effettiva;
• b. il-korp maniġerjali, il-maniġment superjuri u t-titolari ta’ funzjonijiet ewlenin humiex impenjati li jippromwovu kultura korporattiva u tar-riskju b’saħħitha u kondotta kummerċjali responsabbli;
• c. jintweriex livell b’saħħtu ta’ sensibilizzazzjoni għar-riskju fl-istituzzjoni;
• d. l-istituzzjoni tintegrax is-sensibilizzazzjoni għar-riskju fil-proċessi tat-teħid tad-deċiżjonijiet tagħha, inkluża s-sjieda xierqa tar-riskju.

L-awtoritajiet kompetenti għandhom jivvalutaw jekk l-istituzzjoni għandhiex qafas xieraq fis-seħħ biex tidentifika, tiddokumenta u timmaniġġja tranżazzjonijiet ma’ partijiet relatati, inkluż proċess ta’ approvazzjoni, limiti ta’ skoperturi, limiti ta’ distakkament, u mekkaniżmi ta’ monitoraġġ u rapportar. L-awtoritajiet kompetenti għandhom jevalwaw ukoll il-livell ta’ sorveljanza mill-korp maniġerjali.