Artikolu 8 Valutazzjoni tar-riskju nazzjonali

1.   Kull Stat Membru għandu jwettaq valutazzjoni tar-riskju nazzjonali biex jidentifika, jivvaluta, jifhem u jimmitiga r-riskji tal-ħasil tal-flus u tal-finanzjament tat-terroriżmu, kif ukoll ir-riskji tan-nonimplimentazzjoni u tal-evażjoni tas-sanzjonijiet finanzjarji mmirati, li jaffettwawh. Għandu jżomm dik il-valutazzjoni tar-riskju aġġornata u jirrieżaminaha mill-inqas kull 4 snin.

Meta l-Istati Membri jqisu li s-sitwazzjoni tar-riskju tkun teħtieġ dan, huma jistgħu jirrieżaminaw il-valutazzjoni tar-riskju nazzjonali aktar ta’ spiss jew iwettqu valutazzjonijiet ad hoc tar-riskju settorjali.

2.   Kull Stat Membru għandu jaħtar awtorità jew jistabbilixxi mekkaniżmu għall-koordinazzjoni tar-rispons nazzjonali għar-riskji msemmija fil-paragrafu 1. L-identità ta’ dik l-awtorità jew id-deskrizzjoni tal-mekkaniżmu għandha tiġi nnotifikata lill-Kummissjoni. Il-Kummissjoni għandha tippubblika l-lista tal-awtoritajiet deżinjati jew il-mekkaniżmi stabbiliti f’Il-Ġurnal Uffiċjali tal-Unjoni Ewropea.

3.   Meta jwettqu l-valutazzjoni tar-riskju nazzjonali msemmija fil-paragrafu 1 ta' dan l-Artikolu, l-Istati Membri għandhom iqisu r-rapport imsemmi fl-Artikolu 7(2), inkluż is-setturi u l-prodotti koperti u s-sejbiet ta' dak ir-rapport.

4.   L-Istati Membri għandhom jużaw il-valutazzjoni tar-riskju nazzjonali biex:

Fil-valutazzjoni tar-riskju nazzjonali, l-Istati Membri għandhom jiddeskrivu l-istruttura istituzzjonali u l-proċeduri wiesgħa tar-reġim tagħhom fil-qasam tal-AML/CFT, inkluż l-FIU, l-awtoritajiet tat-taxxa u l-prosekuturi, il-mekkaniżmi għall-kooperazzjoni mal-kontropartijiet fl-Unjoni jew f'pajjiżi terzi, kif ukoll ir-riżorsi umani u finanzjarji allokati sa fejn din l-informazzjoni tkun disponibbli.

5.   L-Istati Membri għandhom jiżguraw il-parteċipazzjoni xierqa tal-awtoritajiet kompetenti u tal-partijiet ikkonċernati rilevanti meta jwettqu l-valutazzjoni tar-riskju nazzjonali tagħhom.

6.   L-Istati Membri għandhom iqiegħdu r-riżultati tal-valutazzjonijiet tar-riskju nazzjonali tagħhom, inkluż l-aġġornamenti u r-rieżamijiet tagħhom, għad-dispożizzjoni tal-Kummissjoni, tal-AMLA u tal-Istati Membri l-oħra. Kull Stat Membru jista' jipprovdi informazzjoni addizzjonali rilevanti, fejn xieraq, lill-Istat Membru li jkun qed iwettaq il-valutazzjoni tar-riskju nazzjonali. Għandu jkun disponibbli għall-pubbliku sommarju tas-sejbiet tal-valutazzjoni. Dak is-sommarju m'għandux jinkludi informazzjoni klassifikata. Kwalunkwe dokument maqsum jew li jkun sar pubbliku skont dan il-paragrafu m’għandu jinkludi l-ebda informazzjoni li tippermetti l-identifikazzjoni ta' xi persuna fiżika jew jisemmi xi persuna ġuridika.