Artikolu 59 Protezzjoni għall-arranġamenti kollaterali finanzjarji dwar trasferiment ta’ titlu, għall-arranġamenti ta' tpaċija, għall-arranġamenti ta' netting, u ftehimiet ta' riassigurazzjoni

1.   L-Istati Membri għandhom jiżguraw li jkun hemm protezzjoni xierqa għall-arranġamenti kollaterali finanzjarji dwar trasferiment ta' titlu, għall-arranġamenti ta' tpaċija u ta' netting, u għall-ftehimiet ta' riassigurazzjoni sabiex jipprevjenu t-trasferiment ta' xi wħud mid-drittijiet u mill-obbligazzjonijiet, iżda mhux kollha, li jkunu protetti taħt arranġament ta' kollateral finanzjarju għat-trasferiment tat-titolu, arranġament ta' tpaċija, arranġament ta' netting jew ftehim ta' riassigurazzjoni bejn l-impriża taħt riżoluzzjoni u persuna oħra u l-modifika jew it-terminazzjoni ta' drittijiet u ta' obbligazzjonijiet li huma protetti skont tali arranġament kollaterali finanzjarju bi trasferiment ta' titlu, arranġament ta' tpaċija, arranġament ta' netting jew ftehim ta' riassigurazzjoni permezz tal-użu ta' setgħat anċillari.

Għall-finijiet tal-ewwel subparagrafu, id-drittijiet u l-obbligazzjonijiet għandhom jiġu ttrattati bħala protetti skont arranġament kollaterali finanzjarju dwar trasferiment ta' titlu, arranġament ta' tpaċija, arranġament ta' netting jew ftehim ta' riassigurazzjoni fejn il-partijiet għall-arranġament jew ftehim ikunu intitolati għal tpaċija jew għal netting ta' dawk id-drittijiet u l-obbligazzjonijiet.

2.   Minkejja l-paragrafu 1, fejn meħtieġ sabiex id-detenturi ta' poloz jiġu protetti aħjar billi jiġi żgurat li l-poloz tal-assigurazzjoni li jiġu ttrasferiti jkomplu jissodisfaw ir-rekwiżiti legali rilevanti fir-rigward tal-livelli minimi obbligatorji ta' kopertura skont il-liġi nazzjonali applikabbli, l-awtoritajiet ta' riżoluzzjoni jistgħu jittrasferixxu dawk il-portafolli ta' kuntratti li huma parti mill-arranġamenti u mill-ftehimiet kif imsemmija fil-paragrafu 1 mingħajr ma jittrasferixxu assi, drittijiet u obbligazzjonijiet oħra li huma parti mill-istess arranġamenti u ftehimiet, u jistgħu jittrasferixxu, jimmodifikaw jew jitterminaw dawk l-assi, id-drittijiet u obbligazzjonijiet oħra mingħajr ma jittrasferixxu l-portafolli ta' kuntratti.