Airteagal 59 Cosaint le haghaidh socruithe comhthaobhachta airgeadais aistrithe teidil, socruithe fritháirimh, socruithe glanluachála, agus comhaontuithe athárachais

1.   Áiritheoidh na Ballstáit go mbeidh cosaint iomchuí ann le haghaidh socruithe comhthaobhachta airgeadais aistrithe teidil, socruithe fritháirimh agus glanluachála, agus comhaontuithe athárachais chun cosc a chur le haistriú roinnt de na cearta agus de na dliteanais, seachas iad uile, ar cearta agus dliteanais iad a chosnaítear faoi shocrú comhthaobhachta airgeadais aistrithe teidil, faoi shocrú fritháirimh, faoi shocrú glanluachála nó faoi chomhaontú athárachais idir an gnóthas faoi réiteach agus duine eile mar aon le modhnú nó foirceannadh na gceart agus na ndliteanas a chosnaítear faoin socrú comhthaobhachta airgeadais aistrithe teidil sin, faoi shocrú fritháirimh nó faoi shocrú glanluachála nó faoi chomhaontú athárachais trí chumhachtaí coimhdeacha a úsáid.

Chun críocha na chéad fhomhíre, láimhseálfar cearta agus dliteanais mar chearta agus dliteanais faoi chosaint faoi shocrú comhthaobhachta airgeadais aistritheteidil, faoi shocrú fritháirimh, socrú glanluachála faoi chomhaontú athárachais ina bhfuil na páirtithe sa socrú nó sa chomhaontú i dteideal na cearta agus na dliteanais sin a fhritháireamh nó a ghlanluacháil.

2.   D’ainneoin mhír 1, i gcás inar gá chun cosaint níos fearr a thabhairt do shealbhóirí polasaí trína áirithiú go gcomhlíonfar i gcónaí, leis na polasaithe árachais a aistrítear, ceanglais dlí ábhartha i ndáil le híosleibhéil éigeantacha chumhdaigh faoin dlí náisiúnta is infheidhme, féadfaidh na húdaráis réitigh na punanna sin conarthaí atá mar chuid de shocruithe agus comhaontuithe dá dtagraítear i mír 1 a aistriú gan sócmhainní, cearta agus dliteanais eile atá mar chuid de na socruithe agus comhaontuithe céanna a aistriú, agus féadfaidh siad na sócmhainní, na cearta agus na dliteanais eile sin a aistriú, a mhodhnú nó a fhoirceannadh gan punanna conarthaí a aistriú.