Article 9 Punti ta’ kampjunar

1.   Fejn jitpoġġew il-punti ta’ kampjunar għall-kejl tad-diossidu tal-kubrit, id-diossidu tan-nitroġenu u l-ossidi tan-nitroġenu, il-materja partikolata (PM10 u PM2,5), il-benżen, il-monossidu tal-karbonju, l-arseniku, il-kadmju, iċ-ċomb, in-nikil, il-benżo(a)piren u l-ożonu fl-arja ambjentali għandu jiġi ddeterminat f’konformità mal-Anness IV.

2.   F’kull żona fejn il-livell ta’ sustanzi niġġiesa jaqbeż il-livell limitu ta’ valutazzjoni speċifikat fl-Anness II, in-numru ta’ punti ta’ kampjunar għal kull sustanza niġġiesa m’għandux ikun anqas min-numru minimu tal-punti ta’ kampjunar speċifikat fil-Punti A u C tal-Anness III.

3.   Għal żoni fejn il-livell ta’ sustanzi niġġiesa jisboq il-livell limitu ta’ valutazzjoni rilevanti speċifikat fl-Anness II, iżda mhux il-valuri limitu rispettivi, il-valuri fil-mira u l-livelli kritiċi speċifikati fl-Anness I, l-għadd minimu ta’ punti ta’ kampjunar għal kejl fiss jista’ jitnaqqas sa 50 %, f’konformità mal-Punti A u C tal-Annex III, dment li jiġu ssodisfati l-kundizzjonijiet li ġejjin:

4.   Punt wieħed jew iktar ta’ kampjunar adattati għall-għan ta’ monitoraġġ stabbilit fit-Taqsima 3, il-Punt A tal-Anness VII, għandhom jiġu installati fit-territorju ta’ Stat Membru biex jipprovdu data dwar konċentrazzjonijiet tas-sustanzi prekursuri tal-ożonu elenkati fil-Punt B ta’ dik it-Taqsima f’postijiet determinati f’konformità mal-Punt C ta’ dik it-Taqsima.

5.   Id-dijossidu tan-nitroġenu għandu jitkejjel f’minimu ta’ 50 % tal-punti ta’ kampjunar tal-ożonu meħtieġa skont il-Punt A, Tabella 2, tal-Anness III. Dak il-kejl għandu jkun kontinwu, ħlief f’postijiet bi sfond rurali, kif imsemmi fil-Punt B tal-Anness IV, fejn metodi oħra ta’ kejl jistgħu jintużaw.

6.   Kull Stat Membru għandu, f’konformità mal-Anness IV, jiżgura li t-tqassim tal-punti ta’ kampjunar użati għall-kalkolu tal-indikaturi tal-esponiment medju għall-PM2,5 u d-diossidu tan-nitroġenu, jirrifletti l-esponiment tal-popolazzjoni ġenerali b’mod adegwat. In-numru ta’ punti ta’ kampjunar m’għandux ikun anqas minn dak determinat mill-applikazzjoni tal-Punt B tal-Anness III.

7.   Il-punti ta’ kampjunar li fihom il-qabżiet ta’ valur limitu jew valur fil-mira rilevanti speċifikat fit-Taqsima 1 tal-Anness I ġew irreġistrati fit-tliet snin preċedenti ma għandhomx jiġu rilokati, sakemm ma tkunx meħtieġa rilokazzjoni minħabba ċirkostanzi speċjali, inkluż l-iżvilupp spazjali. Ir-rilokazzjoni ta’ tali punti ta’ kampjunar għandha tkun appoġġata minn applikazzjonijiet ta’ mmudellar jew kejl indikattiv u għandha tiżgura, fejn possibbli, il-kontinwità tal-kejl u ssir fiż-żona ta’ rappreżentattività spazjali tagħhom. Ġustifikazzjoni dettaljata ta’ kwalunkwe rilokazzjoni ta’ tali punti ta’ kampjunar għandha tiġi ddokumentata bis-sħiħ f’konformità mar-rekwiżiti stabbiliti fil-Punt D tal-Anness IV.

8.   Sabiex tiġi stmata l-kontribuzzjoni tal-benżo(a)piren fl-arja ambjentali, kull Stat Membru għandu jagħmel monitoraġġ ta’ idrokarburi aromatiċi poliċikliċi rilevanti oħra f’numru limitat ta’ punti ta’ kampjunar. Dawk l-idrokarburi aromatiċi poliċikliċi għandhom jinkludu mill-inqas: benżo(a)antraċen, benżo(b)fluworanten, benżo(j)fluworanten, benżo(k)fluworanten, indeno(1,2,3-ċd)piren, u dibenż(a,h) antraċen. Il-punti ta’ kampjunar għal dawk l-idrokarburi aromatiċi poliċikliċi għandhom jiġu ppostjati mal-punti ta’ kampjunar tal-benżo(a)piren u għandhom jintgħażlu b’tali mod li jkunu jistgħu jiġu identifikati l-varjazzjoni ġeografika u t-tendenzi fuq perjodu fit-tul.

9.   Minbarra l-monitoraġġ meħtieġ skont l-Artikolu 10, l-Istati Membri għandhom jimmonitorjaw il-livelli ta’ partikoli ultrafini f’konformità mal-Punt D tal-Anness III u t-Taqsima 4 tal-Anness VII. Il-monitoraġġ tal-konċentrazzjonijiet tal-karbonju iswed jista’ jsir fl-istess postijiet.