Artikolu 24 Valutazzjoni tal-pjanijiet ta’ prestazzjoni

1.   Il-Kummissjoni għandha tivvaluta l-abbozzi tal-pjanijiet ta’ prestazzjoni adottati msemmija fl-Artikolu 23, inkluż il-konsistenza tal-miri ta’ prestazzjoni għas-servizzi tan-navigazzjoni bl-ajru en route mal-miri ta’ prestazzjoni għall-Unjoni kollha, f’konformità mal-kriterji u l-kundizzjonijiet stabbiliti fl-atti ta’ implimentazzjoni msemmija fl-Artikolu 28, il-punt (b), u l-allokazzjoni tal-kostijiet komuni bejn is-servizzi tan-navigazzjoni bl-ajru en route u fit-terminal skont il-prinċipji ġenerali msemmija fl-Artikolu 21(4), il-punt (l). Il-valutazzjoni tal-konsistenza tal-miri ta’ prestazzjoni għas-servizzi tan-navigazzjoni bl-ajru en route mal-miri ta’ prestazzjoni għall-Unjoni kollha għandha tqis it-titjib fil-prestazzjoni maż-żmien. Il-Kummissjoni għandha tirrieżamina l-miri ta’ prestazzjoni għas-servizzi tan-navigazzjoni bl-ajru fit-terminal fid-dawl tal-elementi speċifikati fl-att ta’ implimentazzjoni msemmi fl-Artikolu 28, il-punt (b).

2.   Meta tivvaluta l-konsistenza tal-miri ta’ prestazzjoni għas-servizzi tan-navigazzjoni bl-ajru en route mal-miri ta’ prestazzjoni għall-Unjoni kollha, il-Kummissjoni għandha tqis kif xieraq iċ-ċirkostanzi lokali u l-interdipendenzi bejn l-oqsma ewlenin ta’ prestazzjoni msemmija fl-Artikolu 21(3), il-punt (a).

Il-Kummissjoni tista’ tippermetti devjazzjoni tal-miri ta’ prestazzjoni għas-servizzi tan-navigazzjoni bl-ajru en route mill-miri ta’ prestazzjoni għall-Unjoni kollha fir-rigward tal-qasam ewlieni ta’ prestazzjoni fejn titqies meħtieġa u proporzjonata biex tiġi żgurata l-konsistenza tal-miri ta’ prestazzjoni għal dawk is-servizzi mal-miri ta’ prestazzjoni għall-Unjoni kollha fir-rigward ta’ oqsma ewlenin ta’ prestazzjoni oħra.

3.   Meta l-Kummissjoni ssib li l-abbozz tal-pjan ta’ prestazzjoni adottat jissodisfa l-kriterji u l-kundizzjonijiet imsemmija fl-Artikolu 24(1) u stabbiliti fl-atti ta’ implimentazzjoni msemmija fl-Artikolu 28, il-punt (b), moqri flimkien mal-paragrafu 2 ta’ dan l-Artikolu, hija għandha tadotta att ta’ implimentazzjoni biex tapprovah. Dak l-att ta’ implimentazzjoni għandu jiġi adottat f’konformità mal-proċedura konsultattiva msemmija fl-Artikolu 48(2).

4.   Meta l-Kummissjoni ssib li hemm dubji dwar il-konformità tal-abbozz tal-pjan ta’ prestazzjoni ma’ dawk il-kriterji u l-kundizzjonijiet, moqrija flimkien mal-paragrafu 2 ta’ dan l-Artikolu, hija għandha tagħti bidu għal eżami dettaljat ta’ dak l-abbozz tal-pjan ta’ prestazzjoni, filwaqt li, jekk meħtieġ, titlob informazzjoni addizzjonali mingħand l-Istat Membru kkonċernat.

5.   Meta, wara li tkun wettqet l-eżami dettaljat, il-Kummissjoni ssib li l-abbozz tal-pjan ta’ prestazzjoni adottat jissodisfa dawk il-kriterji u l-kundizzjonijiet moqrija flimkien mal-paragrafu 2 ta’ dan l-Artikolu, hija għandha tadotta att ta’ implimentazzjoni biex tapprovah. Dak l-att ta’ implimentazzjoni għandu jiġi adottat f’konformità mal-proċedura konsultattiva msemmija fl-Artikolu 48(2).

Meta l-Kummissjoni ssib li l-abbozz tal-pjan ta’ prestazzjoni adottat ma jissodisfax dawk il-kriterji u l-kundizzjonijiet, hija għandha tadotta att ta’ implimentazzjoni fil-forma ta’ deċiżjoni, li jitlob lill-Istat Membru kkonċernat jippreżenta abbozz rivedut tal-pjan ta’ prestazzjoni li jikkonforma ma’ dawk il-kriterji u l-kundizzjonijiet, u, fejn rilevanti, jistabbilixxi l-miżuri korrettivi li għandhom jittieħdu minn dak l-Istat Membru. Dak l-att ta’ implimentazzjoni għandu jiġi adottat f’konformità mal-proċedura ta’ eżami msemmija fl-Artikolu 48(3).

L-Istat Membru kkonċernat għandu jikkomunika lill-Kummissjoni l-miżuri li jkun ħa skont dik id-deċiżjoni, kif ukoll informazzjoni li turi li dawk il-miżuri huma konformi ma’ dik id-deċiżjoni.

Meta l-Kummissjoni ssib li dawk il-miżuri huma suffiċjenti biex tiġi żgurata l-konformità mad-deċiżjoni tagħha, hija għandha tinnotifika lill-Istat Membru kkonċernat b’dan u tadotta att ta’ implimentazzjoni l-abbozz tal-pjan ta’ prestazzjoni. Dak l-att ta’ implimentazzjoni għandu jiġi adottat f’konformità mal-proċedura konsultattiva msemmija fl-Artikolu 48(2).

Meta l-Kummissjoni ssib li dawk il-miżuri mhumiex biżżejjed biex jiżguraw il-konformità mad-deċiżjoni, hija għandha tinnotifika lill-Istat Membru kkonċernat.

Il-Kummissjoni għandha tieħu, fejn xieraq, azzjoni biex tindirizza n-nonkonformità, inkluż permezz ta’ azzjonijiet previsti fl-Artikolu 258 tat-Trattat dwar il-Funzjonament tal-Unjoni Ewropea.

6.   L-abbozzi tal-pjanijiet ta’ prestazzjoni approvati mill-Kummissjoni f’konformità ma’ dan l-Artikolu għandhom jiġu adottati mill-Istati Membri kkonċernati bħala pjanijiet definittivi, u għandhom ikunu disponibbli għall-pubbliku, mingħajr preġudizzju għall-Artikolu 52(3).