Artikolu 8 Obbligi tal-manifatturi

1.   Meta jintroduċu deterġenti jew aġenti tensjoattivi fis-suq, il-manifatturi għandhom jiżguraw li dawk id-deterġenti jew l-aġenti tensjoattivi jkunu ġew iddisinjati u mmanifatturati f'konformità ma' dan ir-Regolament.

2.   Il-manifatturi għandhom ifasslu d-dokumentazzjoni teknika li tinsab fl-Anness IV u jwettqu l-proċedura ta' valutazzjoni tal-konformità li tinsab f'dak l-Anness.

Meta l-konformità ta' deterġent jew ta' aġent tensjoattiv għall-utenti finali mar-rekwiżiti applikabbli kienet murija permezz tal-proċedura msemmija fl-ewwel subparagrafu, il-manifatturi, qabel ma jintroduċu l-prodott fis-suq, għandhom:

3.   Il-manifatturi għandhom iżommu u, fejn meħtieġ, jaġġornaw id-dokumentazzjoni teknika u l-passaport diġitali tal-prodott għal 10 snin mid-data li fiha d-deterġent jew l-aġent tensjoattiv ikun ġie introdott fis-suq.

4.   Il-manifatturi għandhom jiżguraw li jkunu ġew stabbiliti proċeduri biex il-produzzjoni tas-serje tibqa' konformi. Il-bidliet fid-disinn jew fil-karatteristiċi tal-prodott, kif ukoll il-bidliet fil-metodi ta' ttestjar li b'referenza għalihom tiġi ddikjarata l-konformità ta' prodott, għandhom jitqiesu b'mod adegwat.

Meta jitqies xieraq fir-rigward tal-prestazzjoni ta' deterġent jew aġent tensjoattiv, jew tar-riskji ppreżentati minnhom, il-manifatturi għandhom iwettqu testijiet ta' kampjuni ta' tali deterġent jew aġent tensjoattiv, jinvestigaw, u, jekk ikun meħtieġ, iżommu reġistru tal-ilmenti, ta' deterġenti jew aġenti tensjoattivi mhux konformi u tas-sejħiet lura ta' tali deterġenti jew aġenti tensjoattivi, u għandhom iżommu lid-distributuri informati dwar kwalunkwe monitoraġġ bħal dan.

5.   Il-manifatturi li jintroduċu deterġenti jew aġenti tensjoattivi fis-suq għandhom jiżguraw li dawk id-deterġenti jew l-aġenti tensjoattivi jikkonformaw mal-Artikolu 17(1), (3), (4) u (5), l-Artikolu 18(1) u l-Artikolu 19(1) u (2) u, fejn applikabbli, l-Artikolu 17(2), l-Artikolu 18(2) u l-Artikolu 19(3).

6.   Qabel ma jintroduċu fis-suq deterġenti jew aġenti tensjoattivi għall-utenti finali li huma taħlitiet u li għalihom ma hemm l-ebda obbligu li jipprovdu informazzjoni f'konformità mal-Artikolu 45 tar-Regolament (KE) Nru 1272/2008, il-manifatturi stabbiliti fl-Unjoni għandhom jipprovdu lill-korpi maħtura mill-Istati Membri f'konformità ma' dak l-Artikolu (il-“korpi maħtura”) l-iskeda tad-data dwar l-ingredjenti msemmija fil-punt 2.2 (e) tal-Anness IV ta' dan ir-Regolament (l-“iskeda tad-data dwar l-ingredjenti”). Meta d-deterġent jew l-aġent tensjoattiv għall-utenti finali li għalih tkun diġà ġiet ippreżentata skeda tad-data dwar l-ingredjenti ma jibqax jikkorrispondi mal-informazzjoni inkluża f'dik l-iskeda tad-data dwar l-ingredjenti, il-manifatturi għandhom jippreżentaw skeda aġġornata tad-data dwar l-ingredjenti. L-iskeda tad-data dwar l-ingredjenti għandha tiġi ppreżentata b'mezzi elettroniċi fil-format ipprovdut mill-Aġenzija Ewropea għas-Sustanzi Kimiċi u ssir disponibbli mingħajr ħlas għan-notifiki f'konformità mal-Parti A, it-Taqsima 3.1, it-tieni paragrafu, tal-Anness VIII tar-Regolament (KE) Nru 1272/2008. Il-preżentazzjoni għandha ssir b'lingwa li tinftiehem faċilment mill-korpi maħtura, kif determinat mill-Istat Membru li fih il-prodott jitqiegħed fis-suq.

7.   Il-manifatturi stabbiliti barra mill-Unjoni għandhom jipprovdu lir-rappreżentant awtorizzat jew lill-importatur l-informazzjoni u d-dokumentazzjoni kollha meħtieġa biex juru l-konformità ma' dan ir-Regolament tad-deterġent jew tal-aġent tensjoattiv.

8.   Meta l-manifatturi jqisu jew ikollhom raġuni jemmnu li deterġent jew aġent tensjoattiv li jkunu introduċew fis-suq ma jkunx konformi ma' dan ir-Regolament, huma għandhom immedjatament jieħdu l-azzjoni korrettiva meħtieġa biex iġibu dak id-deterġent jew aġent tensjoattiv konformi, jirtirawh jew isejħu lura l-prodott, kif ikun xieraq. Barra minn hekk, meta l-manifatturi jqisu jew ikollhom raġuni jemmnu li deterġent jew aġent tensjoattiv li jkunu introduċew fis-suq joħloq riskju għas-saħħa tal-bniedem jew għall-ambjent, għandhom immedjatament jinfurmaw dwar dan lill-awtoritajiet nazzjonali kompetenti tal-Istati Membri li fihom ikunu qiegħduh fis-suq, u jagħtu dettalji, b'mod partikolari, ta' kwalunkwe nuqqas ta' konformità u ta' kwalunkwe azzjoni korrettiva meħuda.

9.   Il-manifatturi għandhom jiżguraw li operaturi ekonomiċi oħra fil-katina tal-provvista kkonċernata jinżammu infurmati mingħajr dewmien żejjed dwar kwalunkwe nuqqas ta' konformità jew riskju għas-saħħa tal-bniedem jew għall-ambjent li jkunu identifikaw u dwar kwalunkwe azzjoni korrettiva, sejħa lura jew irtirar konsegwenti.

10.   Il-manifatturi għandhom, fuq talba motivata minn awtorità nazzjonali kompetenti, jipprovdulha l-informazzjoni u d-dokumentazzjoni kollha, f'format elettroniku u, fuq talba, f'format stampat, meħtieġa biex juru l-konformità ma' dan ir-Regolament ta’ deterġent jew aġent tensjoattiv li jkunu introduċu fis-suq, b'lingwa li tista' tinftiehem faċilment minn dik l-awtorità. Il-manifatturi għandhom jikkooperaw ma' dik l-awtorità, fuq talba tagħha, dwar kwalunkwe azzjoni meħuda biex jiġu eliminati r-riskji maħluqa minn dak id-deterġent jew aġent tensjoattiv.

11.   Il-manifatturi għandhom jagħmlu l-mezzi ta' komunikazzjoni tagħhom, bħal numru tat-telefown, indirizz elettroniku jew taqsima ddedikata tas-sit web tagħhom, disponibbli pubblikament fuq is-sit web tagħhom, filwaqt li jqisu l-ħtiġijiet ta' aċċessibbiltà għall-persuni b'diżabbiltà u jippermettu lill-utenti finali jressqu lmenti dwar in-nuqqas ta' konformità potenzjali tal-prodotti jew kwistjonijiet ta' sikurezza.