Parti 7 – Telf impost

L-SGDs jew l-awtoritajiet maħtura għandhom dejjem japplikaw telf impost għall-valur tal-assi b’riskju baxx ipprovduti bħala kollateral, sakemm il-kollateral huwa pprovdut fi flus fl-istess munita bħala l-impenn ta’ pagament. Dan jimplika li l-valur tal-assi sottostanti jiġi kkalkolat bħala l-valur fis-suq tal-assi li minnu jitnaqqas ċertu perċentwal (it-telf impost)

L-SGDs jew l-awtoritajiet maħtura għandhom jiżguraw li t-telf impost jirrifletti r-riskju tal-kreditu, is-suq u l-likwidità li jirriżultaw mill-valur tal-iskopertura ta’ kull ass. Għal dan l-għan, għandhom jiġu determinati telfiet imposti differenti b’kunsiderazzjoni għat-tip ta’ emittenti u l-kwalità tal-kreditu tiegħu, kif ukoll għall-maturità tal-assi u l-munita tad-denominazzjoni.

L-applikazzjoni ta’ telfiet imposti għandha tkun ibbażata wkoll fuq kwantifikazzjoni ta’ telfiet mistennija u d-dewmien fiż-żmien mistenni qabel il-bejgħ tal-assi.

Filwaqt li varjetà ta’ skedi u metodoloġiji ta’ telf impost huma possibbli, l-iskeda ta’ telf impost għal assi eliġibbli għall-użu bħala kollateral mill-BĊE jew il-banek nazzjonali ċentrali tal-Unjoni Ewropea joffru soluzzjoni tajba.

L-SGDs jew l-awtoritajiet maħtura għandhom jiżguraw li l-valur tal-assi b’riskju baxx huwa mmarkat skont is-suq fuq bażi regolari u possibbilment ta’ kuljum.

Barra minn hekk, għandu jinżamm matul iż-żmien il-valur fis-suq aġġustat skont it-telf impost tal-assi b’riskju baxx pprovduti bħala kollateral. Dan jimplika li jekk il-valur tal-assi sottostanti mmarkati skont is-suq fuq bażi regolari jaqa’ taħt ċertu limitu minimu u ma jibqax jikkonforma mal-proporzjon ta’ kopertura li jirriżulta mill-applikazzjoni tat-telf impost, l-istituzzjoni tal-kreditu għandha tkun rikjesta li tissupplimenta assi b’riksju baxx addizzjonali jew tissostitwixxi l-parti rilevanti tal-impenn ta’ pagament bi flus.

Fi kwalunkwe każ, l-SGDs jew l-awtoritajiet maħtura mhumiex preklużi milli jimponu fuq istituzzjonijiet membri rekwiżiti addizzjonali ta’ rapportar u notifikazzjoni.