+IARSCRÍBHINN IV

IARSCRÍBHINN IV



IARSCRÍBHINN IV

Ceanglais fhíor-riachtanacha maidir le foireann eitilte

1.   OILIÚINT PÍOLÓTAÍ

1.1.   Ginearálta

Ní mór do dhuine a bhfuil oiliúint á cur air nó uirthi chun aerárthach a eitilt a bheith chomh haibí ó thaobh oideachais, coirp agus meabhrach de agus go mbeidh sé nó sí in ann an t-eolas ábhartha teoiriciúil agus an scil phraiticiúil a shealbhú, a choinneáil ar bun agus a thaispeáint.

1.2.   Eolas teoiriciúil

Ní mór do phíolóta leibhéal eolais a shealbhú agus a choinneáil ar bun a oireann do na feidhmeanna a chuirtear i gcrích ar an aerárthach agus atá comhréireach leis na rioscaí a bhaineann leis an gcineál gníomhaíochta atá i gceist. Maidir leis an leibhéal eolais sin, ní mór cuid de na réimsí seo a leanas a bheith cuimsithe ann:

(a) 

dlí an aeir;

(b) 

eolas ginearálta faoi aerárthaí;

(c) 

ábhair theicniúla a bhaineann le catagóir an aerárthaigh;

(d) 

feidhmiú agus pleanáil eitilte;

(e) 

feidhmiú an duine agus na teorainneacha atá leis;

(f) 

meitéareolaíocht;

(g) 

loingseoireacht;

(h) 

nósanna imeachta oibríochta, lena n-áirítear bainistíocht acmhainní;

(i) 

prionsabail na heitilte;

(j) 

cumarsáid; agus

(k) 

scileanna neamhtheicniúla, lena n-áirítear bagairtí agus earráidí a aithint agus a bhainistiú.

1.3.   Eolas teoiriciúil a thaispeáint agus a choinneáil ar bun

1.3.1.

Ní mór a thaispeáint go bhfuil eolas teoiriciúil á shealbhú agus á choinneáil trí mheasúnú leanúnach le linn na hoiliúna agus, más iomchuí, trí scrúduithe.

1.3.2.

Ní mór leibhéal iomchuí inniúlachta a choinneáil ar bun i dtaca le heolas teoiriciúil. Ní mór a thaispeáint go bhfuil sé sin á chomhlíonadh, trí mheasúnuithe rialta, scrúduithe rialta, tástálacha rialta nó seiceálacha rialta. Maidir le rialtacht na scrúduithe, na dtástálacha nó na seiceálacha sin, ní mór iad a bheith i gcomhréir leis an leibhéal riosca a bhaineann leis an ngníomhaíocht.

1.4.   Scil phraiticiúil

Ní mór do phíolóta scileanna praiticiúla a shealbhú agus a choinneáil ar bun más iomchuí chun a chuid feidhmeanna nó a cuid feidhmeanna a chur i gcrích ar an aerárthach. Ní mór na scileanna sin a bheith comhréireach leis na rioscaí a ghabhann leis an gcineál gníomhaíochta atá i gceist agus caithfidh siad, i gcás ina n-oireann do na feidhmeanna a chuirtear i gcrích ar an aerárthach, an méid seo a leanas a chuimsiú:

(a) 

gníomhaíochtaí roimh eitilt agus le linn na heitilte lena n-áirítear feidhmiú an aerárthaigh, mais agus cothromaíocht an aerárthaigh a chinneadh, cigireacht agus seirbhísiú a dhéanamh ar an aerárthach, pleanáil breosla nó pleanáil fuinnimh, breithiúnas ar an aimsir, pleanáil bealaí, srianta ar aerspás agus fáil ar rúidbhealaí;

(b) 

oibríochtaí aeradróim agus oibríochtaí patrúin tráchta;

(c) 

réamhchúraimí agus nósanna imeachta maidir le himbhualadh a sheachaint;

(d) 

aerárthach a rialú trí amharcthagairt sheachtrach;

(e) 

ainlithe eitilte, lena n-áirítear ainlithe i suímh chriticiúla, agus ainlithe “suaiteachta” gaolmhara, de réir mar is féidir iad a chur i gcrích go teicniúil;

(f) 

gnáthéirí de thalamh agus éirí de thalamh trasghaoithe chomh maith le gnáth-thuirlingtí agus tuirlingtí trasghaoithe;

(g) 

eitilt gan mar thagairt ach uirlisí, más iomchuí don chineál gníomhaíochta atá i gceist;

(h) 

nósanna imeachta oibríochta, lena n-áirítear scileanna foirne agus bainistíocht acmhainní, más iomchuí don chineál oibríochta atá i gceist, cibé acu oibríocht aon fhoireann nó oibríocht ilfhoirne í;

(i) 

loingseoireacht agus cur chun feidhme rialacha an aeir agus nósanna imeachta gaolmhara, agus feidhm á baint chucu, más iomchuí, as amharcthagairt nó as áiseanna loingseoireachta;

(j) 

oibríochtaí neamhghnácha agus oibríochtaí éigeandála, lena n-áirítear mífheidhmeanna trealaimh aerárthaí ionsamhalta;

(k) 

comhlíonadh nósanna imeachta seirbhísí aerthráchta agus cumarsáide;

(l) 

cineál aerárthaí nó gnéithe sainaicme;

(m) 

oiliúint bhreise i scileanna praiticiúla a d'fhéadfadh a bheith ag teastáil chun na rioscaí a bhaineann le gníomhaíochtaí sonracha a mhaolú; agus

(n) 

scileanna neamhtheicniúla, lena n-áirítear bagairtí agus earráidí a aithint agus a bhainistiú, trí mhodheolaíocht leordhóthanach measúnaithe a úsáid i dteannta an mheasúnaithe ar scileanna teicniúla.

1.5.   Scil phraiticiúil a thaispeáint agus a choinneáil ar bun

1.5.1.

Ní mór do phíolóta a thaispeáint go bhfuil ar a chumas na nósanna imeachta agus na hainlithe a fheidhmiú leis an méid inniúlachta is iomchuí do na feidhmeanna a fheidhmeofar ar an aerárthach, tríd an méid seo a leanas a dhéanamh:

(a) 

an t-aerárthach a oibriú laistigh dá theorainneacha;

(b) 

dea-bhreithiúnas agus dea-eitleoireacht a fheidhmiú;

(c) 

eolas aerloingseoireachta a chur i bhfeidhm;

(d) 

smacht a choinneáil ar an aerárthach i gcónaí sa dóigh go n-áirithítear toradh rathúil a bheith ar nós imeachta nó ar ainliú; agus

(e) 

scileanna neamhtheicniúla, lena n-áirítear bagairtí agus earráidí a aithint agus a bhainistiú, trí mhodheolaíocht leordhóthanach measúnaithe a úsáid i dteannta an mheasúnaithe ar scileanna teicniúla.

1.5.2.

Ní mór leibhéal iomchuí inniúlachta i scil phraiticiúil a choinneáil ar bun. Ní mór a thaispeáint go bhfuil sé sin á chomhlíonadh, trí mheasúnuithe rialta, scrúduithe rialta, tástálacha rialta nó seiceálacha rialta. Maidir le rialtacht na scrúduithe, na dtástálacha nó na seiceálacha sin, ní mór iad a bheith i gcomhréir leis an leibhéal riosca a bhaineann leis an ngníomhaíocht.

1.6.   Inniúlacht Teanga

Ní mór do phíolóta inniúlacht teanga a bheith aige a mhéid is iomchuí do na feidhmeanna a fheidhmítear ar an aerárthach. Beidh an méid seo a leanas ar áireamh san inniúlacht sin:

(a) 

a bheith in ann doiciméid faisnéise aimsire a thuiscint;

(b) 

a bheith in ann cairteanna aerloingseoireachta faoi bhealach, cairteanna aerloingseoireachta imeachta agus cairteanna aerloingseoireachta tuirlingthe a úsáid mar aon le doiciméid faisnéise aerloingseoireachta ghaolmhara; agus

(c) 

a bheith in ann cumarsáid a dhéanamh le comhaltaí eile den fhoireann eitilte agus le seirbhísí aerloingseoireachta le linn gach céim den eitilt, lena n-áirítear ullmhú chun eitilte, sa teanga a úsáidtear le haghaidh cumarsáid raidió a bhaineann leis an eitilt.

1.7.   Feistí oiliúna ionsamhalta eitilte

Nuair a bhaintear feidhm as feiste oiliúna ionsamhalta eitilte (FSTD) chun críche oiliúna, nó chun a léiriú gur sealbhaíodh nó gur coinníodh scil phraiticiúil ar bun, ní mór leibhéal áirithe feidhmíochta a bheith ag an FSTD sin sna réimsí sin atá ábhartha don chúram lena mbaineann a chur i gcrích. Thar aon rud eile, ní mór macasamhlú sásúil a dhéanamh ar chumraíocht an aerárthaigh, ar a airíonna láimhseála, ar fheidhmiú an aerárthaigh agus ar iompraíocht a chóras.

1.8.   Cúrsa oiliúna

1.8.1.

Ní mór an oiliúint a chur ar fáil trí bhíthin cúrsa oiliúna.

1.8.2.

Ní mór an cúrsa oiliúna na coinníollacha seo a leanas a chomhlíonadh:

(a) 

ní mór siollabas a fhorbairt do gach cineál cúrsa; agus

(b) 

cuimseoidh an cúrsa oiliúna sin faisnéis theoiriciúil agus treoir phraiticiúil eitilte araon (lena n-áirítear oiliúint shintéiseach), más infheidhme.

1.9.   Teagascóirí

1.9.1.   Teagasc teoiriciúil

Teagascóirí cuícháilithe amháin a dhéanfaidh an teagasc teoiriciúil. Ní mór:

(a) 

an t-eolas iomchuí a bheith acu ar an réimse lena mbaineann an teagasc; agus

(b) 

iad a bheith in ann modhanna teagaisc iomchuí a úsáid.

1.9.2.   Teagasc eitilte agus teagasc eitilte ionsamhalta

Teagascóirí cuícháilithe amháin, a bhfuil na cáilíochtaí seo a leanas acu, a dhéanfaidh an teagasc eitilte agus an teagasc eitilte ionsamhalta:

(a) 

comhlíonfaidh siad na ceanglais iomchuí maidir le heolas teoiriciúil agus maidir le taithí de réir an teagaisc atá á thabhairt;

(b) 

beidh siad in ann modhanna teagaisc iomchuí a úsáid;

(c) 

beidh taithí acu ar theicnící teagaisc a bhaineann leis na hainlithe eitilte agus na nósanna imeachta eitilte ina mbeartófar teagasc a chur ar fáil;

(d) 

léireoidh siad go bhfuil cumas teagaisc acu sna réimsí sin ina dtabharfar teagasc eitilte, lena n-áirítear teagasc réamh-eitilte, teagasc iareitilte agus teagasc ar an talamh; agus

(e) 

gheobhaidh siad oiliúint athnuachana rialta chun a áirithiú go gcoinneofar na caighdeáin teagaisc cothrom le dáta.

Ina theannta sin, ní mór do na teagascóirí eitilte a thugann oiliúint ar aerárthach a bheith i dteideal feidhmiú mar phíolóta i gceannas ar an aerárthach lena mbaineann an teagasc, ach amháin i gcás oiliúint ar chineálacha nua aerárthaí.

1.10.   Scrúdaitheoirí

Maidir leis na daoine a bheidh freagrach as measúnú a dhéanamh ar scil na bpíolótaí, ní mór dóibh:

(a) 

na ceanglais i leith teagascóirí eitilte nó teagascóirí eitilte ionsamhalta a chomhlíonadh; agus

(b) 

a bheith in ann feidhmíocht píolótaí a mheasúnú chomh maith le tástálacha agus seiceálacha a dhéanamh ar eitiltí.

2.   CEANGLAIS MAIDIR LE TAITHÍ — PÍOLÓTAÍ

Duine a bheidh ag feidhmiú mar chomhalta foirne eitilte, mar theagascóir, nó mar scrúdaitheoir, ní mór dó taithí leordhóthanach a shealbhú agus a choinneáil ar bun i dtaca leis na feidhmeanna a chuirfear i gcrích, ach amháin i gcás ina bhforáiltear sna gníomhartha cur chun feidhme, arna nglacadh ar bhonn an Rialacháin seo nach mór inniúlacht a léiriú i gcomhréir le pointe 1.5.

3.   DEA-SHLÁINTE — PÍOLÓTAÍ

3.1.   Critéir leighis

3.1.1.

Ní mór do na píolótaí go léir a léiriú go tráthrialta go bhfuil siad folláin a ndóthain chun a bhfeidhmeanna a fheidhmiú go sásúil, agus cineál na gníomhaíochta á chur san áireamh. Ní mór comhlíonadh a léiriú trí mheasúnú iomchuí bunaithe ar an gcleachtas aerleighis is fearr, agus cineál na gníomhaíochta á chur san áireamh mar aon leis an díghrádú meabhrach agus coirp a d'fhéadfadh a bheith ann de dheasca aoise.

Ciallaíonn dea-shláinte, lena gcuimsítear sláinte choirp agus mheabhrach, nach bhfuil aon ghalar ná aon mhíchumas ag gabháil don phíolóta a d'fhágfadh nach mbeadh sé nó sí in ann:

(a) 

na cúraimí a dhéanamh is gá chun aerárthach a fheidhmiú;

(b) 

na dualgais a shanntar don phíolóta a dhéanamh tráth ar bith; nó

(c) 

a timpeallacht nó a thimpeallacht a bhrath i gceart.

3.1.2.

I gcás nach léirítear dea-shláinte go hiomlán, féadfar bearta maolaithe a chur chun feidhme a chuirfidh sábháilteacht choibhéiseach eitilte ar fáil.

3.2.   Scrúdaitheoirí aerleighis

Maidir le scrúdaitheoirí aerleighis:

(a) 

ní mór dóibh a bheith cáilithe agus ceadúnaithe i gcleachtadh leighis;

(b) 

ní mór oiliúint a bheith orthu sa leigheas eitlíochta chomh maith le hoiliúint athnuachana rialta sa leigheas eitlíochta a fháil chun a áirithiú go gcoinneofar ardchaighdeáin mheasúnaithe cothrom le dáta; agus

(c) 

ní mór eolas praiticiúil agus taithí phraiticiúil a bheith acu maidir le na dálaí faoina gcuireann píolótaí a gcuid dualgas i gcrích.

3.3.   Ionaid Aerleighis

Ní mór d'ionaid aerleighis na coinníollacha seo a leanas a chomhlíonadh:

(a) 

ní mór gach acmhainn a bheith acu is gá le haghaidh raon na bhfreagrachtaí sin a ghabhann lena bpribhléidí. Áirítear orthu sin áiseanna, pearsanra, trealamh, uirlisí agus ábhar, doiciméadacht na gcúraimí, freagrachtaí agus nósanna imeachta, rochtain ar shonraí ábhartha agus coimeád taifead, ach gan a bheith teoranta dóibh;

(b) 

más iomchuí don chineál gníomhaíochta a dhéanfar agus do mhéid na heagraíochta féin, ní mór córas bainistíochta a chur chun feidhme agus a choinneáil ar bun chun a áirithiú go gcomhlíonfar na ceanglais fhíor-riachtanacha sin a leagtar amach san Iarscríbhinn seo, go ndéanfar rioscaí sábháilteachta a bhainistiú agus go bhféachfar leis an gcóras sin a fheabhsú go leanúnach; agus

(c) 

bunóidh siad socruithe le heagraíochtaí ábhartha eile, más gá, chun a áirithiú go gcloífear leis na ceanglais seo ar bhonn leanúnach.

4.   AN FHOIREANN CÁBÁIN

4.1.   Ginearálta

Maidir leis an bhfoireann cábáin:

(a) 

ní mór iad a bheith oilte agus seiceáil a bheith á déanamh orthu ar bhonn rialta sa chaoi go n-éireoidh leo leibhéal oiriúnach inniúlachta a bhaint amach agus a choinneáil ar bun d'fhonn a gcuid dualgas sábháilteachta a dhéanamh; agus

(b) 

ní mór measúnú sláinte a dhéanamh orthu go tréimhsiúil chun a chinntiú go bhfuil siad i gcumas a gcuid dualgas sábháilteachta a dhéanamh go sábháilte. Ní mór a thaispeáint go bhfuil gach ceanglas á chomhlíonadh trí mheasúnú iomchuí a dhéanamh atá bunaithe ar an gcleachtas is fearr ó thaobh aerleighis.

4.2.   Cúrsa oiliúna

4.2.1.

Más iomchuí de réir chineál na gníomhaíochta nó na bpribhléidí atá i gceist, ní mór oiliúint a chur ar fáil trí bhíthin cúrsa oiliúna.

4.2.2.

Ní mór an cúrsa oiliúna na coinníollacha seo a leanas a chomhlíonadh:

(a) 

ní mór siollabas a fhorbairt do gach cineál cúrsa; agus

(b) 

ní mór faisnéis theoiriciúil agus treoir phraiticiúil araon a chuimsiú sa chúrsa oiliúna (lena n-áirítear oiliúint shintéiseach), más infheidhme.

4.3.   Teagascóirí na bhFoirne Cábáin

Teagascóirí cuícháilithe amháin a dhéanfaidh an teagasc. Ní mór do na teagascóirí sin:

(a) 

eolas iomchuí a bheith acu ar an réimse lena mbaineann an teagasc;

(b) 

a bheith in ann modhanna teagaisc iomchuí a úsáid; agus

(c) 

oiliúint athnuachana rialta a fháil chun a áirithiú go gcoinneofar na caighdeáin teagaisc cothrom le dáta.

4.4.   Scrúdaitheoirí na bhFoirne Cábáin

Ní mór do na daoine sin atá freagrach as scrúdú a dhéanamh ar an bhfoireann cábáin:

(a) 

na ceanglais maidir le teagascóirí na bhfoirne cábáin a chomhlíonadh; agus

(b) 

a bheith in ann feidhmiú na bhfoirne cábáin a mheasúnú agus scrúduithe a chur ar siúl.

5.   EAGRAÍOCHTAÍ OILIÚNA

Ní mór d'eagraíocht oiliúna a sholáthróidh oiliúint do phíolótaí nó d'fhoireann cábáin na ceanglais seo a leanas a chomhlíonadh:

(a) 

ní mór gach acmhainn is gá a bheith acu maidir le raon na bhfreagrachtaí sin a bhaineann lena ngníomhaíocht. Áirítear orthu sin áiseanna, pearsanra, trealamh, uirlisí agus ábhar, doiciméadacht tascanna, freagrachtaí agus nósanna imeachta, rochtain ar shonraí ábhartha agus coimeád taifead, ach gan a bheith teoranta dóibh;

(b) 

de réir mar is iomchuí don oiliúint a chuirfear ar fáil agus do mhéid na heagraíochta féin, ní mór don eagraíocht córas bainistíochta a chur chun feidhme agus a choinneáil ar bun chun a áirithiú go gcomhlíonfar na ceanglais fhíor-riachtanacha sin a leagtar amach san Iarscríbhinn seo, go ndéanfar rioscaí sábháilteachta a bhainistiú, lena n-áirítear rioscaí a bhaineann le meath ar chaighdeán na hoiliúna, agus go bhféachfar leis an gcóras seo a fheabhsú go leanúnach; agus

(c) 

socruithe a bhunú le heagraíochtaí ábhartha eile, más gá, chun a áirithiú go gcloífear leis na ceanglais sin ar bhonn leanúnach.

1. Forbhreathnú

,

1.1 Tagairtí

1.2 Ceanglais aitheanta

1.3 Caighdeáin ghaolmhara

2. Ceanglais aitheanta

Ceanglais

3. Caighdeáin ghaolmhara

Caighdeáin
  • Builddate: 02.08.2026 00:00:00 -Doknr: CELEX:32018R1139
  • EULAW -

    EN: Legal acts of the European Union from EUR-Lex, https://eur-lex.europa.eu/. © European Union. Re-use is authorised by Decision 2011/833/EU, provided the source is acknowledged; the consolidated texts are licensed under CC BY 4.0 (EUR-Lex legal notice). Divided into sections and converted into the GRCA format, the wording unchanged. Only the legislation published in the Official Journal of the European Union is deemed authentic.

    DE: Rechtsakte der Europäischen Union aus EUR-Lex, https://eur-lex.europa.eu/. © Europäische Union. Weiterverwendung nach Beschluss 2011/833/EU mit Quellenangabe gestattet; die konsolidierten Fassungen stehen unter CC BY 4.0 (Rechtlicher Hinweis von EUR-Lex). In Abschnitte aufgeteilt und in das GRCA-Format umgewandelt, der Wortlaut unverändert. Verbindlich sind allein die im Amtsblatt der Europäischen Union veröffentlichten Rechtsakte.