Airteagal 30 Oibleagáidí monaróirí córas RTS

(a)

a áirithiú go bhfuil comhpháirteanna comhchuibhithe bogearraí a gcóras RTS agus na córais RTS iontu féin, a mhéid a bhunaítear ceanglais dóibh leis an gCaibidil seo, i gcomhréir leis na ceanglais bhunriachtanacha a leagtar síos in Iarscríbhinn II agus leis na sonraíochtaí comhchoiteanna i gcomhréir le hAirteagal 36;

(b)

a áirithiú nach ndéanfar difear diúltach do chomhpháirteanna comhchuibhithe bogearraí a gcóras RTS le comhpháirteanna bogearraí eile den chóras RTS céanna;

(c)

doiciméadacht theicniúil a gcóras RTS a tharraingt suas i gcomhréir le hAirteagal 37 sula gcuirfidh siad na córais RTS sin ar an margadh, agus é a choimeád cothrom le dáta ina dhiaidh sin;

(d)

a áirithiú go mbeidh an bhileog faisnéise dá bhforáiltear in Airteagal 38 agus treoracha úsáide soiléire agus iomlána ag gabháil lena gcórais RTS, agus iad a bheith ar fáil saor in aisce don úsáideoir;

(e)

dearbhú comhréireachta AE a tharraingt suas i gcomhréir le hAirteagal 39;

(f)

an mharcáil chomhréireachta CE a chur leis i gcomhréir le hAirteagal 41;

(g)

an t-ainm, an trádainm cláraithe nó an trádmharc cláraithe, an seoladh poist, agus an suíomh gréasáin, an seoladh ríomhphoist nó aon sonraí teagmhála digiteacha eile ag trínar féidir dul i dteagmháil leo, a léiriú sa chóras RTS; pointe aonair ag ar féidir teagmháil a dhéanamh leis an monaróir a léiriú sna sonraí teagmhála; beidh na sonraí teagmhála i dteanga is furasta d’úsáideoirí agus d’údaráis faireachais margaidh a thuiscint;

(h)

na hoibleagáidí maidir le clárú dá dtagraítear in Airteagal 49 a chomhlíonadh;

(i)

aon ghníomhaíocht cheartaitheach is gá a dhéanamh gan moill mhíchuí i ndáil lena gcórais RTS, i gcás ina measann siad nó ina bhfuil cúis acu lena chreidiúint nach bhfuil na córais sin i gcomhréir nó nach bhfuil siad i gcomhréir a thuilleadh leis na ceanglais bhunriachtanacha a leagtar síos in Iarscríbhinn II, nó na córais sin a aisghairm nó a tharraingt siar; déanfaidh monaróirí córas RTS údaráis náisiúnta na mBallstát, inar chuir siad a gcórais RTS ar fáil ar an margadh nó inar chuir siad i mbun seirbhíse iad, a chur ar an eolas ina dhiaidh sin faoin neamh-chomhréireacht, faoi aon ghníomhaíocht cheartaitheach a rinneadh, lena n-áirítear an tráthchlár don chur chun feidhme, agus faoin dáta ag a mbeidh na comhpháirteanna comhchuibhithe sin dá gcóras RTS tugtha chun comhréireachta nó aisghairthe nó tarraingthe siar;

(j)

dáileoirí a gcóras RTS agus, i gcás inarb infheidhme, an t-ionadaí údaraithe, allmhaireoirí agus úsáideoirí a chur ar an eolas láithreach faoin neamh-chomhréireacht agus faoi aon ghníomhaíocht cheartaitheach, aon aisghairm nó aon tarraingt siar maidir leis na córais RTS sin;

(k)

dáileoirí a gcóras RTS agus, i gcás inarb infheidhme, an t-ionadaí údaraithe, allmhaireoirí agus úsáideoirí, a chur ar an eolas faoi aon chothabháil choisctheach éigeantach a dhéantar ar chórais RTS agus faoi mhinicíocht na cothabhála sin;

(l)

arna iarraidh sin, an fhaisnéis agus an doiciméadacht uile is gá a sholáthar, i dteanga oifigiúil an Bhallstáit lena mbaineann, d’údaráis faireachais margaidh sa Bhallstát sin chun comhréireacht na gcóras RTS atá curtha ar an margadh nó curtha i mbun seirbhíse acu leis na ceanglais bhunriachtanacha a leagtar síos in Iarscríbhinn II a léiriú;

(m)

comhoibriú le húdaráis faireachais margaidh, arna iarraidh sin dóibh, maidir le haon ghníomhaíocht a dhéanfar chun na córais RTS a chuir siad ar an margadh nó a chuir siad i mbun seirbhíse a thabhairt chun comhréireachta leis na ceanglais bhunriachtanacha a leagtar síos in Iarscríbhinn II agus leis na ceanglais arna nglacadh de bhun Airteagal 42 i dteanga oifigiúil an Bhallstáit lena mbaineann;

(n)

bealaí gearáin a bhunú agus dáileoirí a choinneáil ar an eolas maidir leis na bealaí sin;

(o)

clár gearán agus clár de chórais RTS neamh-chomhréireacha a choinneáil agus dáileoirí a choinneáil ar an eolas maidir leis sin.