Airteagal 44 Láimhseáil rioscaí a bhaineann le córais RTS agus le teagmhais thromchúiseacha

1.   I gcás ina mbeidh cúis ag údarás faireachais margaidh i mBallstát amháin lena chreidiúint go bhfuil riosca ag baint le córas RTS do shláinte, do shábháilteacht nó do chearta daoine nádúrtha nó do chosaint sonraí pearsanta, déanfaidh an t-údarás faireachais margaidh sin meastóireacht i ndáil leis an gcóras RTS lena mbaineann lena gcumhdófar na ceanglais ábhartha uile a leagtar síos sa Rialachán seo. Comhoibreoidh an monaróir, ionadaí údaraithe an mhonaróra agus gach oibreoir eacnamaíoch ábhartha eile de réir mar is gá leis an údarás faireachais margaidh chun na críche sin agus déanfaidh siad gach beart iomchuí chun a áirithiú nach mbaineann an riosca sin a thuilleadh leis an gcóras RTS lena mbaineann nuair a chuirtear ar an margadh é nó chun an córas RTS a aisghairm nó a tharraingt siar ón margadh laistigh de thréimhse réasúnta.

2.   I gcás ina measann na húdaráis faireachais margaidh de chuid Ballstáit nach bhfuil neamhchomhlíonadh an chórais RTS teoranta dá gcríoch náisiúnta, cuirfidh siad an Coimisiún agus údaráis faireachais margaidh na mBallstát eile ar an eolas faoi thorthaí na meastóireachta dá dtagraítear i mír 1 den Airteagal seo agus faoin ngníomhaíocht cheartaitheach a chuir siad de cheangal ar an oibreoir eacnamaíoch a dhéanamh de bhun Airteagal 16(2) de Rialachán (AE) 2019/1020.

3.   I gcás ina bhfionnann údarás faireachais margaidh go ndearna córas RTS dochar do shláinte nó do shábháilteacht daoine nádúrtha nó do ghnéithe áirithe de chosaint leas an phobail, cuirfidh an monaróir faisnéis agus doiciméadacht ar fáil láithreach, de réir mar is iomchuí, don duine nádúrtha nó don úsáideoir dá ndéantar difear agus, de réir mar is infheidhme, do thríú páirtithe eile a ndéanann an dochar sin difear dóibh, gan dochar do rialacha cosanta sonraí.

4.   Áiritheoidh an t-oibreoir eacnamaíoch lena mbaineann dá dtagraítear i mír 1 go ndéantar gach gníomhaíocht cheartaitheach iomchuí i leith na gcóras RTS uile lena mbaineann atá curtha ar fáil aige ar an margadh ar fud an Aontais.

5.   Déanfaidh an t-údarás faireachais margaidh, gan moill mhíchuí, an Coimisiún agus na húdaráis faireachais margaidh, nó, i gcás inarb infheidhme, na húdaráis mhaoirseachta faoi Rialachán (AE) 2016/679, de chuid na mBallstát eile faoin ngníomhaíocht cheartaitheach dá dtagraítear i mír 2. Áireofar san fhaisnéis sin na sonraí uile atá ar fáil, go háirithe na sonraí is gá chun go sainaithneofaí an córas RTS lena mbaineann, áit tionscnamh agus slabhra soláthair an chórais RTS, an cineál riosca a bhaineann leis agus cineál agus fad na mbeart náisiúnta a rinneadh.

6.   I gcás ina mbaineann toradh údaráis faireachais margaidh, nó teagmhas tromchúiseach a gcuirtear an t-údarás faireachais margaidh ar an eolas faoi, le cosaint sonraí pearsanta, cuirfidh an t-údarás faireachais margaidh sin na húdaráis mhaoirseachta ábhartha ar an eolas gan moill mhíchuí faoi Rialachán (AE) 2016/679 agus oibreoidh sé i gcomhar leo.

7.   Maidir le monaróirí córas RTS a chuirtear ar an margadh nó i mbun seirbhíse, déanfaidh siad aon teagmhas tromchúiseach lena mbaineann córas RTS a thuairisciú d’údaráis faireachais margaidh na mBallstát inar tharla an teagmhas tromchúiseach sin agus údarás faireachais margaidh na mBallstát ina bhfuil córais RTS den sórt sin curtha ar an margadh nó i mbun seirbhíse. Áireofar sa tuairisciú sin freisin tuairisc ar an ngníomhaíocht cheartaitheach atá déanta nó beartaithe ag an monaróir. Féadfaidh na Ballstáit foráil a dhéanamh d’úsáideoirí córas RTS a chuirtear ar an margadh nó a chuirtear i mbun seirbhíse chun teagmhais den sórt sin a thuairisciú.

Déanfar an tuairisciú a cheanglaítear de bhun na chéad fhomhíre den mhír seo, gan dochar do na ceanglais maidir le fógra a thabhairt faoi theagmhais faoi Threoir (AE) 2022/2555, láithreach tar éis don mhonaróir nasc cúisíoch a bhunú idir an córas RTS agus an teagmhas tromchúiseach nó an dóchúlacht réasúnta a bhunú maidir le nasc den sórt sin, agus, in aon chás, déanfar an fógra tráth nach déanaí ná trí lá tar éis don mhonaróir fáil amach faoin teagmhas tromchúiseach a bhfuil baint ag an gcóras RTS leis.

8.   Cuirfidh na húdaráis faireachais margaidh dá dtagraítear i mír 7 na húdaráis faireachais margaidh eile ar an eolas, gan mhoill, faoin teagmhas tromchúiseach agus faoin ngníomhaíocht cheartaitheach atá déanta nó atá á bheartú ag an monaróir nó a cheanglaítear air chun an riosca go dtarlóidh an teagmhas tromchúiseach arís a laghdú a oiread is féidir.

9.   I gcás nach ndéanann an t-údarás sláinte digití a chúraimí, oibreoidh sé i gcomhar leis an údarás faireachais margaidh. Cuirfidh an t-údarás faireachais margaidh an t-údarás sláinte digití ar an eolas faoi aon teagmhais thromchúiseacha, faoi na córais RTS a mbaineann riosca leo, lena n-áirítear rioscaí a bhaineann le hidir-inoibritheacht, slándáil agus sábháilteacht othar, maidir le haon ghníomhaíocht cheartaitheach agus aon aisghairm nó tarraingt siar a dhéantar ar chórais RTS den sórt sin.

10.   I gcás teagmhas a chuireann sábháilteacht othar nó slándáil faisnéise i mbaol, féadfaidh na húdaráis faireachais margaidh gníomhaíocht a dhéanamh láithreach agus féadfaidh siad a cheangal ar mhonaróirí an chórais RTS lena mbaineann, ar a ionadaithe údaraithe agus ar oibreoirí eacnamaíocha eile, más infheidhme, gníomhaíocht cheartaitheach a dhéanamh láithreach.