4. De mhaolú ar Rialachán (AE) 2022/868, déanfaidh comhlacht rochtana sonraí sláinte cead sonraí a eisiúint nó a dhiúltú laistigh de thrí mhí ón iarratas iomlán ar rochtain ar shonraí sláinte a fháil. Má chinneann an comhlacht rochtana sonraí sláinte go bhfuil an t-iarratas ar rochtain ar shonraí sláinte neamhiomlán, tabharfaidh sé fógra don iarratasóir ar shonraí sláinte faoi sin, a dtabharfar deis dó an t-iarratas sin a chomhlánú. Mura gcomhlánaíonn an t-iarratasóir ar shonraí sláinte an t-iarratas ar rochtain ar shonraí sláinte sin laistigh de 4 seachtaine, ní eiseofar an cead sonraí.
Féadfaidh an comhlacht rochtana sonraí sláinte síneadh trí mhí sa bhreis a chur leis an tréimhse le haghaidh freagra a thabhairt ar iarratas ar rochtain ar shonraí sláinte i gcás inar gá, agus práinn agus castacht an iarratais ar rochtain ar shonraí sláinte agus líon na n-iarratas ar rochtain ar shonraí sláinte a cuireadh isteach ar chinneadh á gcur san áireamh. I gcásanna den sórt sin, tabharfaidh an comhlacht rochtana sonraí sláinte fógra don iarratasóir ar shonraí sláinte a luaithe is féidir go bhfuil níos mó ama ag teastáil chun an t-iarratas ar rochtain ar shonraí sláinte a scrúdú, mar aon leis na cúiseanna atá leis an moill.