CAIBIDIL 5 Forálacha ginearálta

Airteagal 30

Féadfaidh na húdaráis inniúla lena mbaineann nó na húdaráis atá i mbun cigireachtaí costais riaracháin iomchuí chomhréireacha a ghearradh ar an bhfógróir agus, i gcás inarb ábhartha, ar an duine a shocraíonn an loingsiú, chun na nósanna imeachta um maoirseacht agus um fhógra a thabhairt, chomh maith le gnáthchostais le haghaidh anailísí agus cigireachtaí iomchuí, a chur chun feidhme. Tabharfaidh na Ballstáit fógra don Choimisiún faoi fhorálacha a chuirtear i bhfeidhm ar an leibhéal náisiúnta i ndáil leis na costais sin. Cuirfidh an Coimisiún an fhaisnéis sin ar fáil go poiblí.

Airteagal 32

De mhaolú ar Airteagal 9(1) agus (2), maidir le loingsithe idir réigiún forimeallach agus an Ballstát ar cuid de é, lena gceanglaítear idirthuras trí Bhallstát eile, féadfar glacadh leis go dtoilíonn an t-údarás inniúil idirthurais go hintuigthe mura dtaiscfear aon agóid laistigh de 7 lá oibre ón dáta a chuirtear in iúl don fhógróir i gcomhréir le hAirteagal 8(12) gur cuireadh an fógra i gcrích i gceart. Beidh an toiliú intuigthe sin bailí ar feadh na tréimhse céanna a léirítear sa toiliú i scríbhinn arna thabhairt ag an údarás inniúil cinn scríbe i gcomhréir le hAirteagal 9(1).

Airteagal 33

Féadfaidh an Danmhairg cinneadh a ghlacadh cóireáil a chur ar allmhairí dramhaíola ó Oileáin Fharó isteach sa Danmhairg, nach bhfuil idirthuras déanta acu trí aon tír eile, faoi Airteagal 36 den Rialachán seo. Má ghlacann an Danmhairg cinneadh den sórt sin, cuirfear in iúl don Choimisiún é.