Artikolu 13 Proċedura għall-verifika u r-rikonoxximent reċiproku ta' interess leġittimu biex tiġi aċċessata l-informazzjoni dwar is-sjieda benefiċjarja

1.   L-Istati Membri għandhom jiżguraw li l-entitajiet responsabbli għar-reġistri ċentrali kif imsemmija fl-Artikolu 10 jieħdu miżuri biex jivverifikaw l-eżistenza tal-interess leġittimu msemmi fl-Artikolu 12 abbażi ta' dokumenti, informazzjoni u data miksuba mill-persuna fiżika jew ġuridika li tkun qed tfittex aċċess għar-reġistru ċentrali (“applikant”) u, fejn meħtieġ, informazzjoni disponibbli għalihom skont l-Artikolu 12(3).

2.   L-eżistenza ta' interess leġittimu għall-aċċess għal informazzjoni dwar is-sjieda benefiċjarja għandha tiġi ddeterminata billi jitqiesu:

3.   L-Istati Membri għandhom jiżguraw li meta jintalab aċċess għall-informazzjoni minn persuna li l-interess leġittimu tagħha li taċċessa l-informazzjoni dwar is-sjieda benefiċjarja f'waħda mill-kategoriji stipulati fl-Artikolu 12(2), l-ewwel subparagrafu, ikun diġà ġie vverifikat mir-reġistru ċentrali ta' Stat Membru ieħor, il-verifika tal-kundizzjoni stabbilita fil-paragrafu 2, il-punt (a), ta’ dan l-Artikolu tkun issodisfata billi tinġabar prova tal-interess leġittimu maħruġ mir-reġistru ċentrali ta' dak l-Istat Membru l-ieħor.

L-Istati Membri jistgħu japplikaw il-proċedura stipulata fl-ewwel subparagrafu ta’ dan il-paragrafu għall-kategoriji addizzjonali identifikati minn Stati Membri oħra skont l-Artikolu 12(2), it-tieni subparagrafu.

4.   L-Istati Membri għandhom jiżguraw li l-entitajiet responsabbli għal reġistri ċentrali jivverifikaw l-identità ta’ applikanti kull meta jaċċessaw ir-reġistri. Għal dak l-għan, l-Istati Membri għandhom jiżguraw li jkun hemm biżżejjed proċessi disponibbli biex tiġi vverifikata l-identità tal-applikant, inkluż billi jippermettu l-użu ta' mezzi ta' identifikazzjoni elettronika u tas-servizzi fiduċjarji kwalifikati rilevanti kif stipulat fir-Regolament (UE) Nru 910/2014 tal-Parlament Ewropew u tal-Kunsill (39).

5.   Għall-finijiet tal-paragrafu 2, il-punt (a), l-Istati Membri għandhom jiżguraw li r-reġistri ċentrali jkollhom mekkaniżmi fis-seħħ li jippermettu aċċess ripetut lil persuni b'interess leġittimu li jaċċessaw l-informazzjoni dwar is-sjieda benefiċjarja mingħajr il-ħtieġa li jiġu vvalutati l-funzjoni jew l-okkupazzjoni tagħhom kull meta jaċċessaw l-informazzjoni.

6.   Mill-10 ta’ Novembru 2026, l-Istati Membri għandhom jiżguraw li l-entitajiet responsabbli għarreġistri ċentrali jwettqu l-verifika msemmija fil-paragrafu 1 u jipprovdu tweġiba lill-applikant fi żmien 12-il jum tax-xogħol.

B'deroga mill-ewwel subparagrafu, f'każ ta' għadd kbir f'daqqa ta' talbiet għall-aċċess għall-informazzjoni dwar is-sjieda benefiċjarja skont dan l-Artikolu, l-iskadenza biex tingħata tweġiba lill-applikant tista' tiġi estiża bi 12-il jum tax-xogħol. Jekk, wara li tkun skadiet l-estensjoni, l-għadd ta' talbiet li jidħlu jibqa' għoli, dik l-iskadenza tista' tiġi estiża bi 12-il jum tax-xogħol oħra.

L-Istati Membri għandhom jinnotifikaw lill-Kummissjoni fil-ħin dwar kwalunkwe estensjoni kif msemmija fit-tieni subparagrafu.

Meta l-entitajiet responsabbli għar-reġistri ċentrali jiddeċiedu li jagħtu aċċess għall-informazzjoni dwar is-sjieda benefiċjarja, huma għandhom joħorġu ċertifikat li jagħti aċċess għal tliet snin. L-entitajiet responsabbli għar-reġistri ċentrali għandhom jirrispondu kwalunkwe talba sussegwenti għall-aċċess għall-informazzjoni dwar is-sjieda benefiċjarja mill-istess persuna fi żmien sebat ijiem tax-xogħol.

7.   L-Istati Membri għandhom jiżguraw li l-entitajiet responsabbli għar-reġistri għandhom jirrifjutaw biss talba għall-aċċess għall-informazzjoni dwar is-sjieda benefiċjarja għal waħda mir-raġunijiet li ġejjin:

L-Istati Membri għandhom jiżguraw li l-entitajiet responsabbli għar-reġistri ċentrali jqisu li jitolbu informazzjoni jew dokumenti addizzjonali mill-applikant qabel ma jirrifjutaw talba għall-aċċess għar-raġunijiet elenkati fil-punti (a), (b), (c) u (e) tal-ewwel subparagrafu. Meta l-entitajiet responsabbli għarreġistri ċentrali jitolbu informazzjoni addizzjonali, l-iskadenza ta' żmien biex tingħata tweġiba għandu jiġi estiż b'sebat ijiem tax-xogħol.

8.   Meta l-entitajiet responsabbli għar-reġistri ċentrali jirrifjutaw li jipprovdu aċċess għall-informazzjoni skont il-paragrafu 7, l-Istati Membri għandhom jeħtieġu li dawn jinfurmaw lill-applikant bir-raġunijiet għar-rifjut u bid-dritt tiegħu għal rimedju. L-entità responsabbli għar-reġistru ċentrali għandha tiddokumenta l-passi meħuda biex tiġi vvalutata t-talba u biex tinkiseb informazzjoni addizzjonali skont il-paragrafu 7, it-tieni subparagrafu.

L-Istati Membri għandhom jiżguraw li l-entitajiet responsabbli għar-reġistri ċentrali jkunu jistgħu jirrevokaw l-aċċess fejn kwalunkwe waħda mir-raġunijiet elenkati fil-paragrafu 7 tapplika jew issir magħrufa mill-entità responsabbli għar-reġistru ċentrali wara li jkun ingħata tali aċċess, inkluż, fejn rilevanti, abbażi ta' revoka minn reġistru ċentrali fi Stat Membru ieħor.

9.   L-Istati Membri għandhom jiżguraw li huma jkollhom fis-seħħ rimedji ġudizzjarji jew amministrattivi biex jiġu kkontestati r-rifjut jew ir-revoka tal-aċċess skont il-paragrafu 7.

10.   L-Istati Membri għandhom jiżguraw li l-entitajiet responsabbli għar-reġistri ċentrali jkunu jistgħu jirrepetu l-verifika tal-funzjoni jew tal-okkupazzjoni identifikata skont il-paragrafu 2, il-punt (a) kull tant żmien u fi kwalunkwe każ mhux qabel 12-il xahar wara li jingħata l-aċċess, dment li l-entità responsabbli għar-reġistru ċentrali ma jkollhiex raġuni valida biex temmen li l-interess leġittimu ma jkunx għadu jeżisti.

11.   L-Istati Membri għandhom jeħtieġu li l-persuni li jkunu ngħataw aċċess skont dan l-Artikolu jinnotifikaw lill-entità responsabbli għar-reġistru ċentrali bil-bidliet li jistgħu jwasslu għall-waqfien ta' interess leġittimu validu, inkluż bidliet li jikkonċernaw il-funzjoni jew l-okkupazzjoni tagħhom.

12.   L-Istati Membri jistgħu jagħżlu li jagħmlu l-informazzjoni dwar is-sjieda benefiċjarja miżmuma fir-reġistri ċentrali tagħhom disponibbli għall-applikanti mal-ħlas ta’ tariffa, li għandha tkun limitata għal dak li huwa strettament meħtieġ biex jiġu koperti l-ispejjeż għall-iżgurar tal-kwalità tal-informazzjoni miżmuma f’dawk ir-reġistri u għat-tqegħid għad-dispożizzjoni tal-informazzjoni. Dawk it-tariffi għandhom jiġu stabbiliti b'tali mod li ma jdgħajfux l-aċċess effettiv għall-informazzjoni miżmuma fir-reġistri ċentrali.