Artikolu 31 Skambju ta' informazzjoni bejn l-FIUs

1.   L-Istati Membri għandhom jiżguraw li l-FIUs jiskambjaw, b’mod spontanju jew fuq talba, kwalunkwe informazzjoni li tista' tkun rilevanti għall-ipproċessar jew għall-analiżi ta' informazzjoni mill-FIU, relatata mal-ħasil tal-flus, mar-reati predikati tiegħu, jew mal-finanzjament tat-terroriżmu, u l-persuna fiżika jew ġuridika involuta, irrispettivament mit-tip ta' reati predikati li jistgħu jkunu involuti, u anki jekk it-tip ta' reati predikati li jistgħu jkunu involuti ma jkunx identifikat waqt l-iskambju.

Talba għandu jkun fiha l-fatti rilevanti, l-informazzjoni ta' sfond, ir-raġunijiet għat-talba, ir-rabtiet mal-pajjiż tal-FIU li ssirilha t-talba u kif ser tintuża l-informazzjoni mitluba.

Meta FIU tirċievi rapport skont l-Artikolu 69(1), l-ewwel subparagrafu, il-punt (a), tar-Regolament (UE) 2024/1624 li jikkonċerna Stat Membru ieħor, hija għandha tgħaddi minnufih dak ir-rapport, jew l-informazzjoni rilevanti kollha miksuba minnu, lill-FIU ta' dak l-Istat Membru ieħor.

2.   Sal-10 ta’ Lulju 2026, l-AMLA għandha tiżviluppa abbozz ta' standards tekniċi ta' implimentazzjoni u tippreżentah lill-Kummissjoni għall-adozzjoni. Dak l-abbozz ta' standards tekniċi ta' implimentazzjoni għandu jispeċifika l-format li għandu jintuża għall-iskambju tal-informazzjoni msemmija fil-paragrafu 1.

Il-Kummissjonitingħata s-setgħa li tadotta l-istandards tekniċi ta' implimentazzjoni msemmija fl-ewwel subparagrafu f'konformità mal-Artikolu 53 tar-Regolament (UE) 2024/1620.

3.   Sal-10 ta’ Lulju 2026, l-AMLA għandha tiżviluppa abbozz ta' standards tekniċi regolatorji u tippreżentah lill-Kummissjoni għall-adozzjoni. Dawk l-abbozzi ta' standards tekniċi regolatorji għandhom jispeċifikaw ir-rilevanza u l-kriterji tal-għażla meta jiġi ddeterminat jekk rapport ippreżentat skont l-Artikolu 69(1), l-ewwel subparagrafu, il-punt (a), tar-Regolament (UE) 2024/1624 jikkonċernax Stat Membru ieħor kif imsemmi fil-paragrafu 1, it-tielet subparagrafu, ta' din id-Direttiva.

Il-Kummissjoni tingħata s-setgħa li tissupplimenta din id-Direttiva billi tadotta l-istandards tekniċi regolatorji msemmija fl-ewwel subparagrafuf'konformità mal-Artikoli 49 sa 52 tar-Regolament (UE) 2024/1620.

4.   Sal-10 ta’ Lulju 2028, l-AMLA għandha toħroġ linji gwida indirizzati lill-FIU dwar il-proċeduri li għandhom jiġu stabbiliti meta jintbagħat u jiġi riċevut rapport skont l-Artikolu 69(1), l-ewwel subparagrafu, il-punt (a), tar-Regolament (UE) 2024/1624 li jikkonċerna Stat Membru ieħor, u s-segwitu li għandu jingħata lil dak ir-rapport.

5.   L-Istati Membri għandhom jiżguraw li l-FIU li ssirilha it-talba tuża l-firxa sħiħa tas-setgħat disponibbli għaliha li normalment tuża fil-livell nazzjonali biex tirċievi u tanalizza l-informazzjoni meta twieġeb għal talba għall-informazzjoni msemmija fil-paragrafu 1 minn FIU oħra.

Meta FIU tfittex li tikseb informazzjoni addizzjonali minn entità marbuta b'obbligu stabbilita fi Stat Membru ieħor li topera fit-territorju tal-Istat Membru tagħha, it-talba għandha tiġi indirizzata lill-FIU tal-Istat Membru li fit-territorju tiegħu tkun stabbilita l-entità marbuta b'obbligu. Dik l-FIU għandha tikseb informazzjoni f'konformità mal-Artikolu 69(1) tar-Regolament (UE) 2024/1624 u tibgħat it-tweġibiet minnufih.

6.   L-Istati Membri għandhom jiżguraw li meta FIU issirilha talba biex tipprovdi informazzjoni skont il-paragrafu 1, hija għandha twieġeb għat-talba malajr kemm jista' jkun u fi kwalunkwe każ mhux aktar tard minn ħamest ijiem tax-xogħol wara l-wasla tat-talba jekk l-FIU tkun fil-pussess tal-informazzjoni mitluba jew l-informazzjoni mitluba tinżamm f'bażi tad-data jew reġistru li jkun direttament aċċessibbli mill-FIU li ssirilha t-talba. F'każijiet eċċezzjonali, debitament ġustifikati, din is-skadenza tista' tiġi estiża għal massimu ta' għaxart ijiem tax-xogħol. Meta l-FIU li ssirilha t-talba ma tkunx tista' tikseb l-informazzjoni mitluba, hija għandha tinforma lill-FIU rikjedenti b'dan.

7.   L-Istati Membri għandhom jiżguraw li f'każijiet eċċezzjonali, ġustifikati u urġenti u, b'deroga mill-paragrafu 6, meta skont il-paragrafu 1 FIU issirilha talba biex tipprovdi informazzjoni li jew tkun miżmuma f'bażi tad-data jew f'reġistru direttament aċċessibbli mill-FIU li ssirilha t-talba jew li diġà tkun fil-pussess tagħha, l-FIU li ssirilha t-talba għandha tipprovdi dik l-informazzjoni mhux aktar tard minn ġurnata waħda tax-xogħol minn meta tirċievi t-talba.

Jekk l-FIU li ssirilha t-talba ma tkunx tista' twieġeb fi żmien ġurnata waħda tax-xogħol jew ma tkunx tista' taċċessa l-informazzjoni direttament, hija għandha tipprovdi ġustifikazzjoni. Meta l-għoti tal-informazzjoni mitluba f’ġurnata waħda tax-xogħol ipoġġi piż sproporzjonat fuq l-FIU li ssirilha t-talba, hija tista' tipposponi l-għoti tal-informazzjoni. F'dak il-każ, l-FIU li ssirilha t-talba għandha tinforma minnufih lill-FIU rikjedenti b’tali posponiment. L-FIU li ssirilha t-talba tista' testendi sa massimu ta' 3 ijiem tax-xogħol l-iskadenza biex twieġeb għal talba għal informazzjoni.

8.   FIU tista' tirrifjuta li tiskambja informazzjoni biss f'ċirkostanzi eċċezzjonali meta l-iskambju jista' jmur kontra l-prinċipji fundamentali tad-dritt nazzjonali tagħha. Dawk iċ-ċirkostanzi eċċezzjonali għandhom ikunu speċifikati b'mod li jimpedixxi l-abbuż tal-iskambju liberu ta' informazzjoni għall-finijiet analitiċi u limitazzjonijiet indebiti fuqu.

Sal-10 ta’ Lulju 2028, l-Istati Membri għandhom jinnotifikaw lill-Kummissjoni ċ-ċirkostanzi eċċezzjonali msemmija fl-ewwel subparagrafu. L-Istati Membri għandhom jaġġornaw dawn in-notifiki meta jsir tibdil liċ-ċirkostanzi eċċezzjonali identifikati fil-livell nazzjonali.

Il-Kummissjoni għandha tippubblika l-lista konsolidata tan-notifiki msemmija fit-tieni subparagrafu.

9.   Sal-10 ta’ Lulju 2029, il-Kummissjoni għandha tippreżenta rapport lill-Parlament Ewropew u lill-Kunsill li jivvaluta jekk iċ-ċirkostanzi eċċezzjonali notifikati skont il-paragrafu 8 humiex ġustifikati.