Airteagal 31 Malartú faisnéise idir FIUnna

1.   Áiritheoidh na Ballstáit go malartóidh FIUnna, go spontáineach, nó arna iarraidh sin, aon fhaisnéis a d’fhéadfadh a bheith ábhartha do phróiseáil nó d’anailísiú faisnéise a dhéanann an FIU agus a bhaineann le sciúradh airgid, a chionta preideacáide nó maoiniú na sceimhlitheoireachta, agus leis an duine nádúrtha nó dlítheanach atá páirteach, gan beann ar chineál na gcionta preideacáide a d'fhéadfadh a bheith i gceist, agus fiú mura sainaithnítear cineál na gcionta preideacáide a d'fhéadfadh a bheith i gceist tráth a dhéantar an malartú.

Beidh in iarraidh na fíorais ábhartha, an fhaisnéis chúlra, cúiseanna na hiarrata, na naisc le tír FIU faighte na hiarrata agus an chaoi a n-úsáidfear an fhaisnéis atáthar ag iarraidh.

Nuair a fhaigheann FIU tuairisc de bhun Airteagal 69(1), an chéad fhomhír, pointe (a), de Rialachán (AE) 2024/1624 a bhaineann le Ballstát eile, cuirfidh sé an tuairisc, nó an fhaisnéis ábhartha go léir a fuarthas uaithi, ar aghaidh go pras chuig FIU an Bhallstáit eile sin.

2.   Faoin 10 Iúil 2026, forbróidh AMLA dréachtchaighdeáin theicniúla cur chun feidhme agus cuirfidh sé faoi bhráid an Choimisiúin iad lena nglacadh. Leis na dréachtchaighdeáin theicniúla cur chun feidhme sin, sonrófar an fhormáid atá le húsáid chun an fhaisnéis dá dtagraítear i mír 1 a mhalartú.

Tugtar cumhacht don Choimisiún na caighdeáin theicniúla cur chun feidhme dá dtagraítear sa chéad fhomhír a ghlacadh i gcomhréir le hAirteagal 53 de Rialachán (AE) 2024/1620.

3.   Faoin 10 Iúil 2026, forbróidh AMLA dréachtchaighdeáin theicniúla rialála agus cuirfidh sé faoi bhráid an Choimisiúin iad chun go nglacfaí iad. Sonrófar sna dréachtchaighdeáin theicniúla rialála sin na critéir ábharthachta agus roghnúcháin agus cinneadh á dhéanamh an mbaineann tuairisc a chuirtear isteach de bhun Airteagal 69(1), an chéad fhomhír, pointe (a), de Rialachán (AE) 2024/1624 le Ballstát eile dá dtagraítear i mír 1, an tríú fomhír, den Airteagal seo.

Tarmligtear an chumhacht chuig an gCoimisiún an Treoir seo a fhorlíonadh trí na caighdeáin theicniúla rialála dá dtagraítear sa chéad fhomhír a ghlacadh i gcomhréir le hAirteagail 49 go 52 de Rialachán (AE) 2024/1624.

4.   Faoin 10 Iúil 2028, eiseoidh AMLA treoirlínte a bheidh dírithe ar FIUnna maidir leis na nósanna imeachta atá le cur ar bun agus tuairisc á cur ar aghaidh agus á fáil acu de bhun Airteagal 69(1), an chéad fhomhír, pointe (a), de Rialachán (AE) 2024/1624 a bhaineann le Ballstát eile, agus an obair leantach atá le déanamh i ndáil leis an tuairisc sin.

5.   Áiritheoidh na Ballstáit, i dtaca leis an FIU a n-iarrtar an fhaisnéis air, go gcuirfear de cheangal ar an FIU sin réimse iomlán na gcumhachtaí atá ar fáil dó agus a d’úsáidfeadh sé de ghnáth ar bhonn intíre a úsáid chun faisnéis a fháil agus chun anailís a dhéanamh uirthi nuair a fhreagraíonn sé iarraidh ar fhaisnéis dá dtagraítear i mír 1 ó FIU eile.

Nuair a fhéachann FIU le faisnéis bhreise a fháil ó eintiteas faoi oibleagáid atá bunaithe i mBallstát eile agus a oibríonn ar chríoch a Bhallstáit, seolfar an iarraidh chuig FIU an Bhallstáit a bhfuil an t-eintiteas faoi oibleagáid bunaithe ar a chríoch. Gheobhaidh an FIU sin faisnéis i gcomhréir le hAirteagal 69(1) de Rialachán (AE) 2024/1624 agus déanfaidh sé na freagraí a tharchur go pras.

6.   Áiritheoidh na Ballstáit, i gcás ina n- iarrfar ar FIU faisnéis a sholáthar de bhun mhír 1, go bhfreagróidh sé an iarraidh a luaithe is féidir agus in aon chás tráth nach déanaí ná 5 lá oibre tar éis an iarraidh a fháil má tá an fhaisnéis atáthar ag iarraidh i seilbh an FIU sin nó má tá an fhaisnéis atáthar ag iarraidh i mbunachar sonraí nó atá á coimeád i gclár atá inrochtana go díreach ag FIU faighte na hiarrata. I gcásanna eisceachtúla, le húdar iomchuí, féadfar uastréimhse 10 lá oibre a chur leis an sprioc-am sin. I gcás nach mbeidh FIU faighte na hiarrata in ann an fhaisnéis a iarrtar a fháil, cuirfidh sé an méid sin in iúl don FIU iarrthach.

7.   I gcásanna eisceachtúla práinneacha a bhfuil bonn cirt leo agus, de mhaolú ar mhír 6, i gcás ina n-iarrfar ar FIU, de bhun mhír 1, faisnéis a sholáthar atá á coimeád i mbunachar sonraí nó i gclárlann ar a bhfuil rochtain dhíreach ag FIU faighte na hiarrata nó atá ina sheilbh cheana féin, áiritheoidh na Ballstáit go ndéanfaidh FIU faighte na hiarrata an fhaisnéis sin a sholáthar tráth nach déanaí ná 1 lá oibre amháin tar éis an iarraidh a fháil.

Mura bhfuil FIU faighte na hiarrata in ann freagra a thabhairt laistigh de 1 lá oibre amháin nó mura féidir leis rochtain dhíreach a fháil ar an bhfaisnéis, soláthróidh sé údar leis an méid sin. I gcás ina gcuirfeadh sé ualach díréireach ar FIU faighte na hiarrata an fhaisnéis sin a sholáthar laistigh de 1 lá oibre, féadfaidh sé soláthar na faisnéise a chur siar. Sa chás sin, cuirfidh FIU faighte na hiarrata in iúl láithreach don FIU iarrthach go bhfuil soláthair na faisnéise á chur siar. Féadfaidh FIU faighte na hiarrata an sprioc-am chun freagra a thabhairt ar iarraidh ar fhaisnéis a shíneadh go dtí 3 lá oibre ar a mhéad.

8.   I dtaca le faisnéis a mhalartú, ní fhéadfaidh FIU diúltú é sin a dhéanamh ach amháin i ndálaí eisceachtúla ina bhféadfadh an malartú a bheith ag teacht salach ar phrionsabail bhunúsacha a dhlí náisiúnta. Déanfar na heisceachtaí sin a shonrú ar bhealach lena ndéantar mí-úsáid shaormhalartú na faisnéise chun críocha anailíse a chosc, agus teorainneacha míchuí ar an saormhalartú sin a chosc.

Faoin 10 Iúil 2028, tabharfaidh na Ballstáit fógra don Choimisiún faoi na himthosca eisceachtúla dá dtagraítear sa chéad fhomhír. Déanfaidh na Ballstáit na fógraí sin a thabhairt cothrom le dáta i gcás ina dtagann athruithe ar na himthosca eisceachtúla arna sainaithint ar an leibhéal náisiúnta.

Foilseoidh an Coimisiún liosta comhdhlúite na bhfógraí dá dtagraítear sa dara fomhír.

9.   Faoin 10 Iúil 2029, cuirfidh an Coimisiún tuairisc faoi bhráid Pharlaimint na hEorpa agus na Comhairle ina ndéanfar measúnú i dtaobh bonn cirt a bheith leis na himthosca eisceachtúla ar tugadh fógra fúthu de bhun mhír 8.