Artikolu 3 Definizzjonijiet

“emissjonijiet ta’ gassijiet serra” jew “emissjonijiet GHG” tfisser ir-rilaxx tad-diossidu tal-karbonju (CO2), tal-metan (CH4) u tal-ossidu nitruż (N2O) fl-atmosfera;

“bijokarburanti” tfisser bijokarburanti kif iddefinit fl-Artikolu 2, it-tieni paragrafu, il-punt (33), tad-Direttiva (UE) 2018/2001;

“bijogass” tfisser bijogass kif iddefinit fl-Artikolu 2, it-tieni paragrafu, il-punt (28), tad-Direttiva (UE) 2018/2001;

“karburanti tal-karbonju riċiklat” tfisser karburanti tal-karbonju riċiklat kif iddefinit fl-Artikolu 2, it-tieni paragrafu, il-punt (35), tad-Direttiva (UE) 2018/2001;

“karburanti rinnovabbli ta’ oriġini mhux bijoloġika” (RFNBO) tfisser karburanti rinnovabbli ta’ oriġini mhux bijoloġika kif iddefinit fl-Artikolu 2, it-tieni paragrafu, il-punt (36), tad-Direttiva (UE) 2018/2001;

“għelejjel tal-ikel u tal-għalf” tfisser għelejjel tal-ikel u tal-għalf kif iddefinit fl-Artikolu 2, it-tieni paragrafu, il-punt (40), tad-Direttiva (UE) 2018/2001;

“teknoloġija b’emissjonijiet żero” tfisser teknoloġija li, meta tintuża biex tipprovdi l-enerġija, ma tirriżultax fir-rilaxx fl-atmosfera tal-gassijiet serra u s-sustanzi li jniġġsu fl-arja li ġejjin mill-bastimenti: id-diossidu tal-karbonju (CO2), il-metan (CH4), l-ossidu nitruż (N2O), l-ossidi tal-kubrit (SOx), l-ossidi tan-nitroġenu (NOx) u l-materja partikolata (PM);

“sorsi alternattivi tal-enerġija” tfisser enerġija rinnovabbli ġġenerata abbord jew elettriku fornut minn provvista tal-elettriku mix-xatt;

“propulsjoni assistita mir-riħ” tfisser propulsjoni, kemm parzjali kif ukoll sħiħa, ta’ bastiment permezz tal-enerġija mir-riħ armata permezz ta’ sistemi ta’ propulsjoni assistita mir-riħ bħal, fost oħrajn, qlugħ rotor, tjur, qlugħ iebes jew riġidu, qlugħ artab, ġwienaħ tal-ġbid jew turbini;

“port tal-waqfa” tfisser port fejn il-bastimenti jieqfu jgħabbu jew iħottu merkanzija jew jimbarkaw jew jiżbarkaw passiġġieri bl-esklużjoni ta’ waqfiet għall-finijiet biss ta’ riforniment, kisba ta’ provvisti, bdil ta’ ekwipaġġ, dħul f’baċir imbattal mill-ilma jew tiswijiet lill-bastiment, lit-tagħmir tiegħu jew lit-tnejn li huma; waqfiet fil-port minħabba li l-bastiment ikun jeħtieġ assistenza jew ikun f’diffikultà; trasferimenti minn bastiment għal bastiment li jsiru barra mill-portijiet; waqfiet għall-iskop uniku ta’ kenn minn temp ħażin jew li jsiru meħtieġa minn attivitajiet ta’ tiftix u salvataġġ; u waqfiet ta’ bastimenti tal-kontejners f’port ta’ trażbord tal-kontejners ġar elenkat fl-att ta’ implimentazzjoni adottat skont l-Artikolu 2(2);

“vjaġġ” tfisser vjaġġ kif iddefinit fl-Artikolu 3, il-punt (c), tar-Regolament (UE) 2015/757;

“reġjun ultraperiferiku” tfisser territorju msemmi fl-Artikolu 349 TFUE;

“kumpanija” tfisser sid il-bastiment jew kwalunkwe organizzazzjoni jew persuna oħra, bħall-maniġer jew in-noleġġatur ta’ bastimenti mingħajr ekwipaġġ, li jkunu assumew ir-responsabbiltà għall-operazzjoni tal-bastiment mingħand sid il-bastiment u li jkunu aċċettaw li jassumu d-doveri u r-responsabbiltajiet kollha imposti mill-Kodiċi Internazzjonali ta’ Ġestjoni għall-Operazzjoni Sikura tal-Bastimenti u għall-Prevenzjoni tat-Tniġġis;

“tunnellaġġ gross” (GT) tfisser tunnellaġġ gross kif iddefinit fl-Artikolu 3, il-punt (e), tar-Regolament (UE) 2015/757;

“bastiment fl-irmiġġ” tfisser bastiment fl-irmiġġ kif iddefinit fl-Artikolu 3, il-punt (n), tar-Regolament (UE) 2015/757;

“bastiment fl-ankraġġ” tfisser bastiment fl-irmiġġ li ma jkunx irmiġġat mal-moll;

“enerġija użata abbord” tfisser l-ammont ta’ enerġija, espress f’mega joules (MJ), użat minn bastiment għall-propulsjoni u għat-tħaddim ta’ kwalunkwe tagħmir abbord, fuq il-baħar jew fl-irmiġġ;

“well-to-wake” tfisser metodu għall-kalkolu tal-emissjonijiet li jieħu inkunsiderazzjoni l-impatt tal-emissjonijiet ta’ gassijiet serra tal-produzzjoni, it-trasport, id-distribuzzjoni u l-użu tal-enerġija abbord, inkluż matul il-kombustjoni;

“intensità tal-gassijiet serra tal-enerġija użata abbord” tfisser l-ammont ta’ emissjonijiet ta’ gassijiet serra, espress fi grammi ta’ ekwivalenti ta’ CO2 stabbiliti fuq bażi well-to-wake, għal kull MJ ta’ enerġija użata abbord;

“fattur ta’ emissjoni” tfisser ir-rata ta’ emissjoni medja ta’ gassijiet serra relattiva għad-data dwar l-attivitajiet ta’ fluss minn sors, bil-preżunzjoni ta’ ossidazzjoni kompleta għall-kombustjoni u ta’ konverżjoni kompleta għar-reazzjonijiet kimiċi l-oħrajn kollha;

“klassi tas-silġ” tfisser in-notazzjoni mogħtija lill-bastiment mill-awtoritajiet nazzjonali kompetenti tal-Istat tal-bandiera, jew minn organizzazzjoni rikonoxxuta minn dak l-Istat, li turi li l-bastiment ġie mfassal għan-navigazzjoni f’kondizzjonijiet ta’ silġ fuq il-baħar;

“limitu tas-silġ” tfisser id-demarkazzjoni fi kwalunkwe ħin bejn il-baħar miftuħ u s-silġ tal-baħar ta’ kwalunkwe tip, kemm jekk fiss kif ukoll jekk iżomm f’wiċċ l-ilma, kif stabbilit fil-paragrafu 4.4.8 tan-Nomenklatura tal-Organizzazzjoni Meteoroloġika Dinjija dwar il-Baħar u s-Silġ, Marzu 2014;

“tbaħħir f’kondizzjonijiet ta’ silġ” tfisser it-tbaħħir minn bastiment tal-klassi tas-silġ f’żona tal-baħar fil-limitu tas-silġ;

“provvista tal-elettriku mix-xatt” (OPS) tfisser is-sistema ta’ provvista tal-elettriku lill-bastimenti rmiġġati, b’voltaġġ baxx jew għoli u b’kurrent alternat jew dirett, inklużi installazzjonijiet fuq in-naħa tal-bastiment u fuq il-port, meta tkun qed tiġi alimentata direttament l-iswiċċbord ta’ distribuzzjoni ewlenija tal-bastiment biex tingħata enerġija lit-tagħbijiet tal-lukanda u tas-servizz, jew biex jiġu ċċarġjati l-batteriji sekondarji;

“domanda għall-enerġija elettrika fl-irmiġġ” tfisser id-domanda għall-elettriku minn bastiment fl-irmiġġ biex jissodisfa l-ħtiġijiet kollha tal-enerġija abbażi tal-elettriku abbord;

“domanda totali stabbilita għall-enerġija elettrika tal-bastiment fl-irmiġġ” tfisser l-ogħla valur, espress f’kilowatts, tad-domanda totali għall-elettriku tal-bastiment fl-irmiġġ, inkluż it-tagħbijiet tax-xogħol tal-lukandi u tal-maniġġ ta’ merkanzija;

“verifikatur” tfisser entità ġuridika li twettaq attivitajiet ta’ verifika, li tiġi akkreditata minn korp nazzjonali ta’ akkreditazzjoni skont ir-Regolament (KE) Nru 765/2008 u dan ir-Regolament;

“dokument tal-konformità FuelEU” tfisser dokument speċifiku għal bastiment, maħruġ lil kumpanija minn verifikatur, li jikkonferma li dak il-bastiment ikun ikkonforma ma’ dan ir-Regolament għal perjodu speċifiku ta’ rappurtar;

“bastiment tal-passiġġieri” tfisser bastiment tal-passiġġieri kif iddefinit fl-Artikolu 2, il-punt (i), tad-Direttiva (UE) 2016/802 tal-Parlament Ewropew u tal-Kunsill (23);

“bastiment tal-kruċiera” tfisser bastiment tal-passiġġieri li ma jkollux gverta tal-merkanzija u huwa ddisinjat esklużivament għat-trasport kummerċjali tal-passiġġieri f’akkomodazzjoni matul il-lejl fuq vjaġġ bil-baħar;

“bastiment tal-kontejners” tfisser bastiment imfassal esklużivament għat-trasport ta’ kontejners fl-istivi u fuq il-gverta;

“waqfa mhux konformi f’port” tfisser waqfa f’port li matulha l-bastiment ma jikkonformax mar-rekwiżit li jinsab l-Artikolu 6(1), u ma tkun tapplika l-ebda waħda mill-eċċezzjonijiet previsti fl-Artikolu 6(5);

“perkors l-inqas favorevoli” tfisser l-aktar perkors ta’ produzzjoni intensiv fil-karbonju użat għal kwalunkwe karburant partikolari;

“ekwivalenti ta’ CO2” tfisser il-kejl metriku użat biex jiġu kkomputati l-emissjonijiet mis-CO2, CH4 u N2O abbażi tal-potenzjal ta’ tisħin globali tagħhom, billi l-ammonti ta’ CH4 u N2O jiġu konvertiti għall-ammont ekwivalenti ta’ CO2 bl-istess potenzjal ta’ tisħin globali;

“bilanċ ta’ konformità” tfisser il-kejl ta’ konformità żejda jew insuffiċjenti ta’ bastiment fir-rigward tal-limiti għall-intensità medja annwali tal-gassijiet serra tal-enerġija użata abbord minn bastiment jew is-submira RFNBO, li tiġi kkalkulata f’konformità mal-Parti A tal-Anness IV;

“surplus ta’ konformità” tfisser bilanċ ta’ konformità b’valur pożittiv;

“defiċit ta’ konformità” tfisser bilanċ ta’ konformità b’valur negattiv;

“bilanċ totali ta’ konformità akkomunata” tfisser is-somma tal-bilanċi ta’ konformità tal-bastimenti kollha inklużi fl-akkomunament;

“korp ta’ ġestjoni tal-port” tfisser korp ta’ ġestjoni tal-port kif definit fil-Artikolu 2, il-punt (5), tar-Regolament (UE) 2017/352;

“Stat responsabbli” tfisser Stat Membru appuntat bl-applikazzjoni tal-Artikolu 3gf(1) tad-Direttiva 2003/87/KE fir-rigward ta’ kumpanija skont it-tifsira ta’ dan ir-Regolament mingħajr preġudizzju għall-għażla tal-awtoritajiet kompetenti inkarigati fl-Istat Membru rilevanti;

“perjodu ta’ rappurtar” tfisser perjodu mill-1 ta’ Jannar sal-31 ta’ Diċembru tas-sena li matulha l-informazzjoni msemmija f’dan ir-Regolament tiġi mmonitorjata u rreġistrata, li fiha d-data għal vjaġġi li jibdew u jintemmu f’sentejn kalendarji differenti titqies taħt is-sena kalendarja kkonċernata;

“perjodu ta’ verifika” tfisser is-sena kalendarja direttament wara l-perjodu ta’ rappurtar.