Artikolu 36 Trasparenza tal-kontijiet tal-fornituri tas-servizzi tan-navigazzjoni bl-ajru

1.   Il-fornituri tas-servizzi tan-navigazzjoni bl-ajru, indipendentement mis-sistema ta’ sjieda jew l-istrutturi legali tagħhom, kull sena għandhom ifasslu u jippubblikaw il-kontijiet finanzjarji tagħhom. Dawn il-kontijiet għandhom jikkonformaw mal-istandards internazzjonali tal-kontabbiltà adottati mill-Unjoni.

Meta, minħabba l-istatus legali tal-fornitur tas-servizzi tan-navigazzjoni bl-ajru, il-konformità sħiħa mal-istandards internazzjonali tal-kontabbiltà ma tkunx possibbli, il-fornitur għandu jikseb din il-konformità sal-punt massimu possibbli. Il-fornituri tas-servizzi tan-navigazzjoni bl-ajru għandhom jippubblikaw rapport annwali u jgħaddu regolarment minn awditjar indipendenti għall-kontijiet imsemmija f’dan il-paragrafu.

2.   L-awtoritajiet superviżorji nazzjonali għandu jkollhom id-dritt li jaċċessaw il-kontijiet tal-fornituri tas-servizzi tan-navigazzjoni bl-ajru taħt is-superviżjoni tagħhom. L-Istati Membri jistgħu jiddeċiedu li jagħtu aċċess lill-awtoritajiet superviżorji nazzjonali ta’ Stati Membri oħrajn għal dawn il-kontijiet. Fejn meħtieġ biex il-Kummissjoni tkun tista’ twettaq il-kompiti tagħha skont dan ir-Regolament, l-awtoritajiet superviżorji nazzjonali għandhom jipprovdu din l-informazzjoni lill-Kummissjoni.

3.   Fil-kontabbiltà interna tagħhom, il-fornituri tas-servizzi tan-navigazzjoni bl-ajru għandhom iżommu kontijiet separati għal kull servizz tan-navigazzjoni bl-ajru kif ikunu meħtieġa jagħmlu kieku dawn is-servizzi jitwettqu minn impriżi separati bil-ħsieb li jevitaw id-diskriminazzjoni, is-sussidju inkroċjat u d-distorsjoni tal-kompetizzjoni. Fornitur tas-servizzi tan-navigazzjoni bl-ajru għandu jżomm ukoll kontijiet separati għal kull attività meta:

Il-kostijiet iddeterminati u l-kostijiet reali li jirriżultaw mis-servizzi tan-navigazzjoni bl-ajru għandhom jinqasmu f’kategoriji tal-kostijiet f’konformità mal-Artikolu 30(6) u għandhom ikunu disponibbli għall-pubbliku mingħajr preġudizzju għall-Artikolu 52(3).

4.   Id-data finanzjarja rrappurtata f’konformità mal-Artikolu 29(6) u informazzjoni oħra rilevanti għall-kalkolu tar-rati unitarji għandha tiġi awditjata jew ivverifikata mill-awtorità superviżorja nazzjonali jew minn entità indipendenti tal-fornitur tas-servizzi tan-navigazzjoni bl-ajru kkonċernat u approvata mill-awtorità superviżorja nazzjonali. Il-konklużjonijiet ta’ dak l-awditu għandhom ikunu disponibbli għall-pubbliku mingħajr preġudizzju għall-Artikolu 52(3).