Artikolu 43 Prevenzjoni tal-iskart mill-imballaġġ

1.   Kull Stat Membru għandu jnaqqas l-iskart mill-imballaġġ iġġenerat per capita, meta mqabbel mal-iskart mill-imballaġġ iġġenerat per capita fl-2018 kif irrapportat lill-Kummissjoni f'konformità mad-Deċiżjoni 2005/270/KE, b'tal-inqas:

2.   Sabiex tappoġġa l-Istati Membri fil-kisba tal-miri għall-prevenzjoni tal-iskart mill-imballaġġ stabbiliti fil-paragrafu 1 ta’ dan l-Artikolu, sat-12 ta’ Frar 2027, il-Kummissjoni għandha tistabbilixxi fattur ta' korrezzjoni biex tqis iż-żieda jew it-tnaqqis fit-turiżmu fir-rigward tas-sena bażi 2018 permezz ta’ atti ta’ implimentazzjoni adottati skont l-Artikolu 56(7), punt (c). Dak il-fattur ta' korrezzjoni għandu jkun ibbażat fuq ir-rata tal-ġenerazzjoni tal-iskart mill-imballaġġ għal kull turist u l-varjazzjoni fl-għadd ta' turisti relattiva għas-sena bażi 2018 u għandu jqis il-potenzjal tat-tnaqqis tal-iskart mill-imballaġġ fit-turiżmu.

3.   Mingħajr preġudizzju għall-paragrafi 1 u 4, l-Istati Membri li diġà stabbilew sistemi separati għall-immaniġġar tal-iskart mill-imballaġġ domestiku, fuq naħa, u għall-iskart mill-imballaġġ industrijali u kummerċjali, fuq in-naħa l-oħra, jistgħu jżommu dawk is-sistemi.

4.   Fl-ilħuq tal-miri stabbiliti fil-paragrafu 1, kull Stat Membru għandu jagħmel ħiltu biex inaqqas il-kwantità ta' skart tal-plastik mill-imballaġġ iġġenerat.

5.   Minbarra l-miżuri previsti f'dan ir-Regolament, f'konformità mal-objettivi ġenerali tal-politika tal-Unjoni dwar l-iskart u sabiex jintlaħqu l-miri stipulati f'dan l-Artikolu, l-Istati Membri għandhom jimplimentaw miżuri mmirati lejn il-prevenzjoni tal-iskart mill-imballaġġ u jimminimizzaw l-impatt ambjentali tal-imballaġġ. Tali miżuri jistgħu jinkludu l-użu ta' strumenti ekonomiċi u miżuri oħra biex jipprovdu inċentivi għall-applikazzjoni tal-ġerarkija tal-iskart, bħall-miżuri msemmija fl-Annessi IV u IVa tad-Direttiva 2008/98/KE, jew strumenti u miżuri xierqa oħra, inkluż inċentivi pprovduti permezz tal-iskemi ta' responsabbiltà estiża tal-produttur, u l-obbligi għall-produtturi jew għall-organizzazzjonijiet b'kompetenza fil-qasam tar-responsabbiltà tal-produtturi biex jadottaw pjanijiet għall-prevenzjoni tal-iskart. Il-miżuri għandhom ikunu proporzjonati u nondiskriminatorji u jkunu mfassla b'tali mod li jevitaw ostakli għall-kummerċ jew distorsjonijiet tal-kompetizzjoni. Tali miżuri ma għandhomx iwasslu għal bidla lejn materjal tal-imballaġġ eħfef użat biex jissodisfa l-għan tat-tnaqqis fl-iskart mill-imballaġġ.

6.   Għall-fini tal-paragrafu 5 ta’ dan l-Artikolu u mingħajr preġudizzju għall-Artikolu 16(2) tad-Direttiva (UE) 2020/2184 tal-Parlament Ewropew u tal-Kunsill (73), l-Istati Membri għandhom jinċentivaw lir-restoranti, canteens, bars, kafetteriji u servizzi tal-catering biex iservu lill-klijenti tagħhom, ilma tal-vit, fejn disponibbli, b'xejn jew bi ħlas baxx għas-servizz, f'format riutilizzabbli jew li jista' jerġa' jimtela.

7.   Għall-fini tal-paragrafu 5, l-Istati Membri jistgħu jintroduċu miżuri għall-prevenzjoni tal-iskart mill-imballaġġ li jeċċedu l-miri minimi stabbiliti fil-paragrafu 1, filwaqt li jaġixxu f'konformità ma’ dan ir-Regolament.

8.   B'deroga mill-paragrafu 1, l-Istati Membri jistgħu, sal-31 ta’ Diċembru 2025, jitolbu lill-Kummissjoni tuża sena bażi għajr l-2018 għall-kalkoli tal-miri stabbiliti fil-paragrafu 1. Jekk Stat Membru jagħmel tali talba, il-Kummissjoni tista’, mingħajr preġudizzju għall-paragrafi 5 u 7, il-Kummissjoni tista' tippermetti lill-Istati Membri jużaw din is-sena bażi l-oħra sabiex jikkalkulaw il-miri stabbiliti fil-paragrafu 1 bil-kundizzjoni li l-Istat Membru jipprovdi evidenza sostanzjata:

9.   Sat-12 ta’ Frar 2032, il-Kummissjoni għandha tirrieżamina l-miri stabbiliti fil-paragrafu 1 u tivvaluta l-ħtieġa li jiġu inklużi miri speċifiċi għal ċerti materjali tal-imballaġġ. Għal dak il-għan, il-Kummissjoni għandha tippreżenta rapport lill-Parlament Ewropew u lill-Kunsill, flimkien ma' proposta leġiżlattiva, jekk il-Kummissjoni tqis li jkun xieraq.