Artikolu 67 2

(a)

l-identità tal-applikant għal data dwar is-saħħa, deskrizzjoni tal-funzjonijiet u l-attivitajiet professjonali ta’ dak l-applikant għal data dwar is-saħħa, inkluża l-identità tal-persuni fiżiċi li jkollhom aċċess għad-data elettronika dwar is-saħħa, kieku jinħareġ permess tad-data; l-applikant għal data dwar is-saħħa għandu jinnotifika lill-korp tal-aċċess għad-data dwar is-saħħa bi kwalunkwe aġġornament tal-lista ta’ persuni fiżiċi;

(b)

l-għanijiet imsemmija fl-Artikolu 53(1) li għalihom issir applikazzjoni għall-aċċess għad-data;

(c)

spjegazzjoni dettaljata tal-użu maħsub tad-data elettronika dwar is-saħħa u tal-benefiċċju mistenni relatat ma’ dak l-użu u kif dak il-benefiċċju jikkontribwixxi għall-għanijiet imsemmija fl-Artikolu 53(1);

(d)

deskrizzjoni tad-data elettronika dwar is-saħħa mitluba, inkluż il-kamp ta’ applikazzjoni, il-medda taż-żmien tagħha, il-format, sorsi u, fejn possibbli, l-kopertura ġeografika meta tali data tintalab minn detenturi tad-data dwar is-saħħa f’diversi Stati Membri jew minn parteċipanti awtorizzati fid-DataTas-Saħħa@UE (HealthData@EU) msemmija fl-Artikolu 75;

(e)

deskrizzjoni li tispjega jekk hemmx bżonn li d-data elettronika dwar is-saħħa tkun magħmula disponibbli f’format psewdonimizzat jew anonimizza; fil-każ ta’ format psewdonimizzat, ġustifikazzjoni għaliex l-ipproċessar ma jistax jitwettaq bl-użu ta’ data anonimizzata;

(f)

fejn l-applikant għal data dwar is-saħħa jikollu l-ħsieb li jdaħħal settijiet tad-data diġà miżmuma minn dak l-applikant għal data dwar is-saħħa fl-ambjent tal-ipproċessar sigur, deskrizzjoni ta’ dawk is-settijiet tad-data;

(g)

deskrizzjoni tas-salvagwardji, li jridu jkunu proporzjonati għar-riskji, ppjanati biex jiġi evitat kwalunkwe użu ħażin tad-data elettronika dwar is-saħħa, kif ukoll biex jiġu protetti d-drittijiet u l-interessi tad-detentur tad-data dwar is-saħħa u tal-persuni fiżiċi kkonċernati, inkluż biex tiġi evitata kwalunkwe identifikazzjoni mill-ġdid ta’ persuni fiżiċi fis-sett tad-data;

(h)

indikazzjoni ġustifikata tal-perjodu li matulu d-data elettronika dwar is-saħħa hija meħtieġa għall-ipproċessar f’ambjent tal-ipproċessar sigur;

(i)

deskrizzjoni tal-għodod u tar-riżorsi tal-informatika meħtieġa għal ambjent tal-ipproċessar sigur;

(j)

meta applikabbli, informazzjoni dwar kwalunkwe valutazzjoni tal-aspetti etiċi tal-ipproċessar, meħtieġa skont il-liġi nazzjonali, li tista’ sservi biex tieħu post il-valutazzjoni tal-etika tal-applikant għal data dwar is-saħħa tiegħu stess;

(k)

meta l-applikant għal data dwar is-saħħa ikollu l-ħsieb li jagħmel użu minn eċċezzjoni skont l-Artikolu 71(4), il-ġustifikazzjoni meħtieġa mil-liġi nazzjonali skont dak l-Artikolu.