Airteagal 4 Athruithe ar ghlanioncam úis na hinstitiúide

1.   Léireoidh institiúidí na toimhdí coiteanna samhaltaithe agus paraiméadracha a leagtar amach in Airteagal 3(2), (3) agus (4) agus (7) go (10) agus an glanioncam úis á ríomh acu. Ina theannta sin, léireoidh institiúidí na toimhdí coiteanna samhaltaithe agus paraiméadracha a leagtar amach i míreanna 2 go 4 den Airteagal seo agus an glanioncam úis á ríomh acu.

2.   Breithneoidh na hinstitiúidí ioncam úis agus costais úis thar thréimhse bliana ina ríomhanna, beag beann ar aibíocht agus láimhseáil chuntasaíochta na n-ionstraimí ábhartha leabhair neamhthrádála atá íogair ó thaobh ráta úis de.

3.   Áireoidh institiúidí corrlaigh tráchtála agus comhpháirteanna eile raonta difríochta ina ríomhanna.

4.   Ríomhfaidh institiúidí an t-athrú ar an nglanioncam úis trí ghlacadh leis go mbeidh clár comhardaithe seasmhach ann, i gcás ina ndéantar a mhéid iomlán agus a chomhdhéanamh, lena n-áirítear ítimí laistigh agus lasmuigh den chlár comhardaithe, a choinneáil ar bun trí ionstraimí nua a chur in ionad sreafaí airgid atá ag aibiú nó sreafaí airgid athphraghsála, ar ionstraimí iad a bhfuil gnéithe inchomparáide acu maidir le hairgeadra, méid agus tréimhse athfhillte na n-ionstraimí sin lena ngintear na sreafaí airgid athphraghsála. Beidh corrlaigh na n-ionstraimí nua bunaithe ar na corrlaigh ó tháirgí arna gceannach nó arna ndíol le déanaí agus a bhfuil saintréithe comhchosúla acu. I gcás ionstraimí a bhfuil praghsanna margaidh inbhraite acu, úsáidfear na raonta difríochta margaidh is déanaí seachas raonta difríochta margaidh stairiúla.