Airteagal 15 Prionsabail ghinearálta

1.   Áiritheoidh soláthraithe rátála ESG neamhspleáchas a ngníomhaíochtaí rátála, lena n-áirítear ó gach tionchar nó srian polaitiúil agus eacnamaíoch.

2.   Beidh rialacha agus nósanna imeachta i bhfeidhm ag soláthraithe rátála ESG lena n-áiritheofar go ndéanfar a rátálacha ESG a eisiúint, a fhoilsiú agus a dháileadh i gcomhréir leis an Rialachán seo.

3.   Bainfidh soláthraithe rátála ESG úsáid as córais, acmhainní agus nósanna imeachta atá leormhaith agus éifeachtach chun a n-oibleagáidí faoin Rialachán seo a chomhlíonadh.

4.   Déanfaidh soláthraithe rátála ESG beartais agus nósanna imeachta scríofa a ghlacadh agus a chur chun feidhme chun a áirithiú go mbeidh a rátálacha ESG bunaithe ar anailís chríochnúil ar an bhfaisnéis ar fad atá ar fáil dóibh agus atá ábhartha dá n-anailís i gcomhréir lena modheolaíochtaí rátála.

5.   Glacfaidh soláthraithe rátála ESG beartais agus nósanna imeachta inmheánacha maidir le dícheall cuí lena n-áirithítear nach gcuireann a leasanna gnó isteach ar neamhspleáchas ná ar chruinneas na ngníomhaíochtaí rátála ESG.

6.   Glacfaidh soláthraithe rátála ESG nósanna imeachta riaracháin agus cuntasaíochta slána, sásraí rialaithe inmheánaigh, agus socruithe rialaithe agus cosanta éifeachtacha maidir le córais próiseála faisnéise agus cuirfidh siad chun feidhme iad.

7.   Bainfidh soláthraithe rátála ESG úsáid as modheolaíochtaí rátála diana, córasacha, neamhspleácha agus ar féidir údar cuí a thabhairt leo le haghaidh na rátálacha ESG a sholáthraíonn siad, agus cuirfidh siad na modheolaíochtaí rátála sin i bhfeidhm go leanúnach agus ar bhealach trédhearcach.

8.   Déanfaidh soláthraithe rátála ESG athbhreithniú ar na modheolaíochtaí rátála dá dtagraítear i mír 7 ar bhonn leanúnach agus uair sa bhliain ar a laghad.

9.   Déanfaidh soláthraithe rátála ESG faireachán agus meastóireacht ar bhonn bliantúil ar a laghad ar leormhaitheas agus éifeachtacht na gcóras, na n-acmhainní agus na nósanna imeachta dá dtagraítear i mír 3 agus déanfaidh siad bearta iomchuí chun aghaidh a thabhairt ar aon easnamh.

10.   Déanfaidh soláthraithe rátála ESG feidhm formhaoirseachta bhuan, neamhspleách agus éifeachtach a bhunú agus a chothabháil chun formhaoirseacht a áirithiú ar gach gné de sholáthar a rátálacha ESG.

Beidh na hacmhainní agus an saineolas is gá ag an bhfeidhm formhaoirseachta agus beidh rochtain aici ar an bhfaisnéis uile is gá chun a dualgais a chomhlíonadh. Beidh rochtain dhíreach aici ar chomhlacht bainistíochta an tsoláthraí rátála ESG.

Déanfaidh soláthraithe rátála ESG nósanna imeachta láidre a fhorbairt agus a chothabháil maidir lena bhfeidhm formhaoirseachta.

11.   Glacfaidh na soláthraithe rátála ESG na bearta uile is gá chun a áirithiú go bhfuil an fhaisnéis a úsáideann siad chun rátálacha ESG a eisiúint ar chaighdeán sách ard agus go bhfaightear an fhaisnéis sin as foinsí iontaofa. Cuirfidh soláthraithe rátála ESG in iúl go soiléir gurb é a dtuairim féin atá ina rátálacha ESG.

12.   Tabharfaidh soláthraithe rátála ESG fógra don mhír rátáilte nó d’eisitheoir na míre rátáilte le linn a uaireanta oibre agus dhá lá oibre iomlána ar a laghad roimh chéad eisiúint na rátála ESG chun deis a thabhairt don mhír rátáilte nó d’eisitheoir na míre rátáilte soláthraithe rátála ESG a chur ar an eolas faoi aon earráidí fíorasacha. Chuige sin, cuirfidh soláthraithe rátála ESG ar fáil, ar iarraidh ón mír rátáilte nó ó eisitheoir na míre rátáilte, saor in aisce agus ar bhonn neamhthráchtála, an fhaisnéis dá dtagraítear i bpointe 1, pointí (b) agus (c), agus i bpointe 2, pointe (b)(ii), d’Iarscríbhinn III, in éineacht le dáta an nuashonraithe is déanaí ar shonraí agus, i gcás inarb ábhartha, aon sonraí eile arna mbailiú, arna meas nó arna ríomh a bhaineann leis an mír rátáilte nó le heisitheoir míre rátáilte.

13.   Ní bheidh oibleagáid ar sholáthraithe rátála ESG faisnéis a nochtadh faoina gcaipiteal intleachtúil, faoina maoin intleachtúil, faoina bhfios gnó ná faoi thorthaí na nuálaíochta a cháileodh mar rúin trádála mar a shainmhínítear in Airteagal 2, pointe (1), de Threoir (AE) 2016/943 ó Pharlaimint na hEorpa agus ón gComhairle (39).

14.   Ní dhéanfaidh soláthraithe rátála ESG athruithe ar a rátálacha ESG ach amháin i gcomhréir lena modheolaíochtaí rátála arna bhfoilsiú de bhun Airteagal 23.