Artikolu 15 Prinċipji ġenerali

1.   Il-fornituri ta’ klassifikazzjonijiet ESG għandhom jiżguraw l-indipendenza tal-attivitajiet ta’ klassifikazzjoni tagħhom, inkluż mill-influwenzi jew ir-restrizzjonijiet politiċi u ekonomiċi kollha.

2.   Il-fornituri ta’ klassifikazzjonijiet ESG għandu jkollhom fis-seħħ regoli u proċeduri li jiżguraw li l-klassifikazzjonijiet ESG tagħhom jinħarġu, jiġu ppubblikati, u ddistribwiti f’konformità ma’ dan ir-Regolament.

3.   Il-fornituri ta’ klassifikazzjonijiet ESG għandhom jużaw sistemi, riżorsi u proċeduri li huma adegwati u effettivi biex jikkonformaw mal-obbligi tagħhom skont dan ir-Regolament.

4.   Il-fornituri ta’ klassifikazzjonijiet ESG għandhom jadottaw u jimplimentaw politiki u proċeduri bil-miktub li jiżguraw li l-klassifikazzjonijiet ESG tagħhom ikunu bbażati fuq analiżi bir-reqqa tal-informazzjoni kollha li tkun disponibbli għalihom u li tkun rilevanti għall-analiżi tagħhom f’konformità mal-metodoloġiji tal-klassifikazzjoni tagħhom.

5.   Il-fornituri ta’ klassifikazzjonijiet ESG għandhom jadottaw u jimplimentaw politiki u proċeduri interni ta’ diliġenza dovuta li jiżguraw li l-interessi kummerċjali tagħhom ma jfixklux l-indipendenza jew l-akkuratezza tal-attivitajiet ta’ klassifikazzjonijiet ESG.

6.   Il-fornituri ta’ klassifikazzjonijiet ESG għandhom jadottaw u jimplimentaw proċeduri amministrattivi u kontabilistiċi tajbin, mekkaniżmi ta’ kontroll intern, u arranġamenti ta’ kontroll u salvagwardja effettivi għas-sistemi tal-ipproċessar tal-informazzjoni.

7.   Il-fornituri ta’ klassifikazzjonijiet ESG għandhom jużaw metodoloġiji ta’ klassifikazzjoni għall-klassifikazzjonijiet ESG li jipprovdu, li jkunu rigorużi, sistematiċi, indipendenti u kapaċi li jiġu ġġustifikati u għandhom japplikaw dawk il-metodoloġiji ta’ klassifikazzjoni b’mod kontinwu u b’mod trasparenti.

8.   Il-fornituri ta’ klassifikazzjonijiet ESG għandhom jirrieżaminaw il-metodoloġiji ta’ klassifikazzjoni msemmija fil-paragrafu 7 fuq bażi kontinwa u mill-inqas kull sena.

9.   Il-fornituri ta’ klassifikazzjonijiet ESG għandhom jimmonitorjaw u jevalwaw l-adegwatezza u l-effettività tas-sistemi, tar-riżorsi u tal-proċeduri msemmija fil-paragrafu 3 mill-inqas kull sena u jieħdu miżuri xierqa biex jindirizzaw kwalunkwe nuqqas.

10.   Il-fornituri ta’ klassifikazzjonijiet ESG għandhom jistabbilixxu u jżommu funzjoni ta’ sorveljanza permanenti, indipendenti u effettiva biex jiżguraw sorveljanza fuq l-aspetti kollha tal-forniment tal-klassifikazzjonijiet ESG tagħhom.

Il-funzjoni ta’ sorveljanza għandu jkollha r-riżorsi u l-għarfien espert neċessarji u jkollha aċċess għall-informazzjoni kollha neċessarja biex twettaq l-obbligi tagħha. Għandu jkollha aċċess dirett għall-korp maniġerjali tal-fornitur ta’ klassifikazzjonijiet ESG.

Il-fornituri ta’ klassifikazzjonijiet ESG għandhom jiżviluppaw u jżommu proċeduri robusti fir-rigward tal-funzjoni ta’ sorveljanza tagħhom.

11.   Il-fornituri ta’ klassifikazzjonijiet ESG għandhom jadottaw il-miżuri kollha meħtieġa biex jiżguraw li l-informazzjoni li jużaw biex joħorġu l-klassifikazzjonijiet ESG tkun ta’ kwalità suffiċjenti u miksuba minn sorsi affidabbli. Il-fornituri ta’ klassifikazzjonijiet ESG għandhom jiddikjaraw b’mod ċar li l-klassifikazzjonijiet ESG tagħhom huma l-opinjoni tagħhom stess.

12.   Il-fornituri ta’ klassifikazzjonijiet ESG għandhom jinnotifikaw lill-element ikklassifikat jew lill-emittent tal-element ikklassifikat matul is-sigħat tax-xogħol tiegħu u mill-inqas jumejn tax-xogħol sħaħ qabel l-ewwel ħruġ tal-klassifikazzjoni ESG sabiex jagħtu l-opportunità lill-element ikklassifikat jew lill-emittent tal-element ikklassifikat li jinforma lill-fornituri ta’ klassifikazzjonijiet ESG bi kwalunkwe żball fattwali. Għal dak l-għan, il-fornituri ta’ klassifikazzjonijiet ESG għandhom jagħmlu disponibbli, fuq talba mill-element ikklassifikat jew mill-emittent tal-element ikklassifikat, mingħajr ħlas u fuq bażi mhux kummerċjali, l-informazzjoni msemmija fil-punt 1, il-punti (b) u (c), u l-punt 2, il-punt (b)(ii), tal-Anness III, flimkien mad-data tal-aħħar aġġornament tad-data kif ukoll, fejn rilevanti, kwalunkwe data oħra miġbura, stmata jew ikkalkolata li tirrelata mal-element ikklassifikat jew mal-emittent tal-element ikklassifikat.

13.   Il-fornituri ta’ klassifikazzjonijiet ESG ma għandhomx ikunu obbligati li jiddivulgaw informazzjoni dwar il-kapital intellettwali, il-proprjetà intellettwali, l-għarfien espert jew ir-riżultati tal-innovazzjoni tagħhom li jikkwalifikaw bħala sigrieti kummerċjali kif definiti fl-Artikolu 2, il-punt (1), tad-Direttiva (UE) 2016/943 tal-Parlament Ewropew u tal-Kunsill (39).

14.   Il-fornituri ta’ klassifikazzjonijiet ESG għandhom jagħmlu biss bidliet fil-klassifikazzjonijiet ESG tagħhom f’konformità mal-metodoloġiji tal-klassifikazzjoni tagħhom ippubblikati skont l-Artikolu 23.