Airteagal 9 Bunachar Sonraí d’Fhógraí Staidéir

1.   Faoin 2 Samhain 2027, bunóidh ECHA Bunachar Sonraí d’Fhógraí Staidéir, agus déanfaidh sé bainistiú air.

2.   Stórálfaidh ECHA na sonraí ceimiceán a dtugtar fógra dó ina leith i gcomhréir le hAirteagal 26 sa Bhunachar Sonraí d’Fhógraí Staidéir.

3.   Measfar na sonraí atá sa Bhunachar Sonraí d’Fhógraí Staidéir a bheith rúnda agus ní chuirfear ar fáil don phobal iad.

4.   Gan dochar do mhír 7 den Airteagal seo, i gcás ina gcuirfidh an Coimisiún nó ceann ar bith de na Gníomhaireachtaí clárúchán, iarratas, fógra nó sainchomhad rialála ábhartha eile ar ina chomhthéacs sin a cuireadh isteach fógra faoi Airteagal 26 ar fáil do ECHA i gcomhréir le hAirteagal 5(2), cuirfidh sé na gnéithe in iúl de na fógraí staidéir atá rúnda nuair a ionchorpraítear iad san ardán sonraí comhchoiteann. Ní dhéanfar na gnéithe, arna gcur in iúl mar ghnéithe rúnda san iarratas comhfhreagrach, san fhógra comhfhreagrach nó sa sainchomhad rialála ábhartha comhfhreagrach eile i gcomhréir leis na forálacha maidir le rúndacht faoin ngníomh tionscnaimh de chuid an Aontais, a chur in iúl mar ghnéithe rúnda san fhógra staidéir nuair a bheidh siad ionchorpraithe san ardán sonraí comhchoiteann.

5.   Tar éis do ECHA clárúchán, iarratas, fógra nó sainchomhad rialála ábhartha eile a fháil i gcomhréir le hAirteagal 5(2) ar ina chomhthéacs sin a cuireadh isteach fógra faoi Airteagal 26, cuirfidh ECHA an fhaisnéis atá bainteach leis an bhfógra ar fáil don phobal tríd an ardán sonraí comhchoiteann, agus urramóidh sé rúndacht na ngnéithe arna gcur in iúl mar ghnéithe rúnda i gcomhréir le mír 4 den Airteagal seo.

6.   Beidh rochtain ag údaráis agus údaráis náisiúnta forfheidhmithe ar na sonraí atá sa Bhunachar Sonraí d’Fhógraí Staidéir sula ndéanfar na sonraí sin a ionchorprú san ardán sonraí comhchoiteann.

7.   Nuair a gheobhaidh EFSA iarratas faoi Rialachán (CE) Uimh. 178/2002 agus nuair a bheidh cinneadh déanta aige maidir le nochtadh na staidéar a ghabhann leis an iarratas sin i gcomhréir le hAirteagal 38 go hAirteagal 39e de Rialachán (CE) Uimh. 178/2002, cuirfidh sé na sonraí atá sa bhunachar sonraí dá dtagraítear in Airteagal 32b de Rialachán (CE) Uimh. 178/2002 agus a chomhfhreagraíonn don iarratas sin ar fáil do ECHA lena n-ionchorprú san ardán sonraí comhchoiteann.

8.   Oibreoidh ECHA agus EFSA i gcomhar le chéile chun cur chuige comhchoiteann a áirithiú maidir le sainaithint na faisnéise a dtugtar fógra dóibh ina leith i gcomhréir le hAirteagal 26 den Rialachán seo agus Airteagal 32b de Rialachán (CE) Uimh. 178/2002, faoi seach, agus éascóidh siad inrianaitheacht na staidéar a dtugtar fógraí fúthu dá mbunachair sonraí faoi seach.