Artikolu 9 Bażi tad-data tan-Notifiki dwar l-Istudji

1.   Sat-2 ta’ Novembru 2027, l-ECHA għandha tistabbilixxi Bażi tad-Data tan-Notifiki dwar l-Istudji, u li għandha tiġi ġestita minnha.

2.   L-ECHA għandha taħżen d-data dwar sustanzi kimiċi nnotifikata lilha f’konformità mal-Artikolu 26 fil-Bażi tad-Data tan-Notifiki dwar l-Istudji.

3.   Id-data li tinsab fil-Bażi tad-Data tan-Notifiki dwar l-Istudji għandha titqies kunfidenzjali u ma għandhiex tkun magħmula pubblika.

4.   Mingħajr preġudizzju għall-paragrafu 7 ta’ dan l-Artikolu, meta l-Kummissjoni jew kwalunkwe Aġenzija jagħmlu disponibbli għall-ECHA, f’konformità mal-Artikolu 5(2), reġistrazzjoni, applikazzjoni, notifika jew dossier regolatorju rilevanti ieħor li fil-kuntest tagħhom tkun ġiet ippreżentata notifika skont l-Artikolu 26, huma għandhom jindikaw liema elementi tan-notifiki dwar l-istudji huma kunfidenzjali meta jiġu inkorporati fil-pjattaforma komuni tad-data. Huma biss l-elementi indikati bħala kunfidenzjali fl-applikazzjoni, fin-notifika jew fid-dossier regolatorju rilevanti ieħor korrispondenti, f’konformità mad-dispożizzjonijiet dwar il-kunfidenzjalità skont l-att oriġinarju tal-Unjoni, li għandhom jiġu indikati bħala kunfidenzjali fin-notifika dwar l-istudji meta jiġu inkorporati fil-pjattaforma komuni tad-data.

5.   Malli l-ECHA tirċievi, f’konformità mal-Artikolu 5(2), reġistrazzjoni, applikazzjoni, notifika jew dossier regolatorju rilevanti ieħor li fil-kuntest tagħhom tkun ġiet ippreżentata notifika skont l-Artikolu 26, l-ECHA għandha tagħmel l-informazzjoni relatata dwar in-notifiki disponibbli għall-pubbliku permezz tal-pjattaforma komuni tad-data, u għandha tirrispetta l-kunfidenzjalità tal-elementi indikati bħala kunfidenzjali f’konformità mal-paragrafu 4 ta’ dan l-Artikolu.

6.   L-Awtoritajiet u l-awtoritajiet tal-infurzar nazzjonali għandu jkollhom aċċess għad-data fil-Bażi tad-Data tan-Notifiki dwar l-Istudji qabel ma’ dik id-data tiġi inkorporata fil-pjattaforma komuni tad-data.

7.   Meta l-EFSA tirċievi applikazzjoni skont ir-Regolament (KE) Nru 178/2002 u tkun iddeċidiet dwar id-divulgazzjoni tal-istudji li jakkumpanjaw dik l-applikazzjoni f’konformità mal-Artikoli 38 sa 39e tar-Regolament (KE) Nru 178/2002, hija għandha tagħmel id-data li tinsab fil-bażi tad-data msemmija fl-Artikolu 32b tar-Regolament (KE) Nru 178/2002 u li tikkorrispondi għal dik l-applikazzjoni disponibbli għall-ECHA biex tiġi inkorporata fil-pjattaforma komuni tad-data.

8.   L-ECHA u l-EFSA għandhom jikkooperaw biex jiżguraw approċċ komuni għall-identifikazzjoni tal-informazzjoni nnotifikata lilhom f’konformità mal-Artikolu 26 ta’ dan ir-Regolament u mal-Artikolu 32b tar-Regolament (KE) Nru 178/2002, rispettivament, u għandhom jiffaċilitaw it-traċċabbiltà tal-istudji nnotifikati lill-bażijiet tad-data rispettivi tagħhom.