Cuid B: Suaití ráta úis a chalabrú le haghaidh airgeadraí nach dtagraítear dóibh i gCuid A
(1)
Déanfaidh institiúidí an meánráta úis laethúil a ríomh ar dtús trí amshraith 16 bliana de rátaí úis laethúla ‘saor ó riosca’ a bhailiú, gan raonta difríochta creidmheasa ná raonta difríochta leachtachta atá sonrach ó thaobh ionstraime nó eintitis de, do gach airgeadra maidir leis na haibíochtaí 3M, 6M, 1Y, 2Y, 5Y, 7Y, 10Y, 15Y agus 20Y agus ansin ríomhfaidh siad an meánráta úis uimhríochtúil maidir le gach airgeadra c thar na barúlacha uile san amshraith agus maidir leis na haibíochtaí uile. Is é an toradh a bheidh air sin beart aonair in aghaidh an airgeadra.
(2)
I gcás ina bhfuil an meánráta úis arna ríomh i gcomhréir le pointe (1) don chéad 7 mbliana níos mó ná 700 bonnphointe, úsáidfear na sonraí ó na 10 mbliana is déanaí, faoi réir infhaighteacht sonraí. I gcás ina bhfuil an meánráta úis arna ríomh i gcomhréir le pointe (1) don chéad seacht mbliana cothrom le nó níos lú ná 700 bonnphointe, úsáidfear an t-amshraith sonraí 16 bliana ina hiomláine.
(3)
Déanfar an suaitheadh ráta úis comhthreomhar, gearr agus fada de réir airgeadra a dhíorthú ón bparaiméadar suaite domhanda ábhartha ó Thábla 1 a chur i bhfeidhm ar an meánráta úis arna ríomh i gcomhréir le pointe (1) agus pointe (2).
Tábla 1.
Paraiméadair bhonnlíne maidir le suaitheadh ar ráta úis domhanda
Comhthreomhar
60 %
Gearr
85 %
Fada
40 %
(4)
Cuirfidh institiúidí íosráta 100 bonnphointe i bhfeidhm chomh maith le huasteorainneacha inathraithe de 500 bonnphointe don suaitheadh gearrthéarmach, 400 bonnphointe don suaitheadh comhthreomhar agus 300 bonnphointe don suaitheadh fadtéarmach, faoi seach.
(5)
Déanfar an tacar suaití ráta úis de réir airgeadra a shlánú ansin go dtí an 50 bonnphointe is gaire.
