4. Sonraíochtaí ginearálta maidir le cur isteach sonraí tagarmharcála

Agus sonraí tagarmharcála á gcur isteach i gcomhréir le roinn 2 agus le roinn 3 agus le hIarscríbhinní na dTreoirlínte seo, ba cheart d’institiúidí agus d’údaráis inniúla na sonraíochtaí ginearálta a leagtar amach sa roinn seo, na sonraíochtaí breise a leagtar amach i ranna 5 agus 6 agus na treoracha a leagtar amach in Iarscríbhinn VII a chur i bhfeidhm.

Ba cheart sonraí tagarmharcála a chur isteach bunaithe ar fhigiúirí cuntasaíochta dheireadh na bliana in EUR. I gcás ina nochtar luach saothair in airgeadra seachas an EUR, ba cheart an ráta malairte arna úsáid ag an gCoimisiún Eorpach le haghaidh clárú airgeadais agus an buiséad do mhí na Nollag na bliana tuairiscithe a úsáid chun na figiúirí comhdhlúite a bheidh le tuairisciú a chomhshó.⁴

⁴ Soláthraíonn an ÚBE nasc chuig an bhfaisnéis ar a shuíomh Gréasáin mar aon leis na Treoirlínte seo; is féidir teacht ar an ráta malairte freisin ag http://ec.europa.eu/budget/contracts_grants/info_contracts/inforeuro/inforeuro_en.cfm

Ba cheart na méideanna go léir a thuairisciú mar mhéideanna iomlána, i.e. méideanna nach bhfuil slánaithe, in EUR (e.g. ba cheart EUR 1 234 567 a thuairisciú, in ionad EUR 1.2 milliún).

Ba cheart sonraí tagarmharcála don bhliain féilire inar tháinig deireadh leis an mbliain airgeadais a chur isteach sa bhliain féilire ina dhiaidh sin. Mar shampla, maidir leis an mbeart tagarmharcála don bhliain airgeadais dar críoch aon dáta sa bhliain ‘20bb’, cuirfear sonraí isteach sa bhliain ‘20bb+1’.

Ba cheart na méideanna a cuireadh isteach a leithdháileadh ar na comhpháirteanna seasta agus athraitheacha den luach saothair a dhéanamh i gcomhréir le Roinn 7 de Threoirlínte an ÚBE maidir le beartais fhónta luach saothair faoi Threoir 2013/36/AE.