5.1. Kunsiderazzjonijiet ġenerali

Meta jivvalutaw il-governanza interna u l-kontrolli fl-istituzzjoni kollha, l-awtoritajiet kompetenti għandhom jevalwaw inter alia l-konformità tal-istituzzjoni mal-atti legali ppubblikati separatament fuq is-sit web tal-EBA kif imsemmi fil-paragrafu 12.

L-awtoritajiet kompetenti għandhom jivvalutaw l-adegwatezza tal-arranġamenti ta’ governanza interna tal-istituzzjoni, filwaqt li jieħdu inkunsiderazzjoni n-natura, id-daqs u l-kumplessità tar-riskji inerenti fil-mudell tan-negozju u fl-attivitajiet tal-istituzzjoni. L-awtoritajiet kompetenti għandhom jidentifikaw sa liema punt l-istituzzjoni tikkonforma mar-rekwiżiti legali u regolatorji applikabbli rigward arranġamenti ta’ governanza interna soda, inklużi dawk elenkati fil-paragrafu preċedenti, u jidentifikaw kwalunkwe nuqqas. L-awtoritajiet kompetenti għandhom jivvalutaw jekk hemmx riskji materjali imposti minn arranġamenti dgħajfa ta’ governanza interna u l-effett potenzjali tagħhom fuq il-profil ta’ riskju, ir-reżiljenza operazzjonali u s-sostenibbiltà tal-istituzzjoni. Għal dawn l-iskopijiet, għandhom jiġu vvalutati l-oqsma li ġejjin, f’konformità mal-prinċipju tal-proporzjonalità u l-involviment superviżorju kif deskritt fit-Titolu 2:

• a. l-istruttura organizzazzjonali, il-korp maniġerjali u l-kumitati tiegħu;
• b. il-kultura tar-riskju u l-kondotta kummerċjali;
• c. il-politiki u l-prattiki ta’ remunerazzjoni;
• d. il-funzjonijiet ta’ kontroll intern;
• e. il-qafas ta’ ġestjoni tar-riskju;
• f. is-sistemi tal-ICT, l-aggregazzjoni tad-data tar-riskju u r-rapportar tar-riskju;
• g. ir-riskji tal-ML/TF u tħassib prudenzjali;
• h. governanza tal-ippjanar għall-irkupru.

L-awtoritajiet kompetenti għandhom iqisu r-riskji tal-ESG, filwaqt li jagħtu prijorità lit-tranżizzjoni ambjentali u r-riskji fiżiċi, meta jivvalutaw l-oqsma koperti mill-punti (a) sa (f) tal-paragrafu preċedenti.

Il-valutazzjoni tal-governanza interna għandha tinforma l-valutazzjoni speċifika tal-ġestjoni tar-riskju u l-kontrolli kif speċifikat fit-Titoli 6 u 8, kif ukoll il-valutazzjoni tal-ICAAP u tal-ILAAP fil-valutazzjoni tal-kapital tal-SREP (Titolu 7) u l-valutazzjoni tal-likwidità u tal-finanzjament tal-SREP (Titolu 8). Bl-istess mod, analiżi tar-riskji individwali tal-kalkoli/stimi tal-kapital tal-ICAAP riveduti taħt it-Titolu 7, u kwalunkwe nuqqas identifikatpermezz ta’ dik l-analiżi, għandhom jinformaw il-valutazzjoni tal-qafas globali tal-ICAAP ivvalutat taħt dan it-Ttolu.

Bħala parti mill-valutazzjoni globali tal-governanza interna u tal-kontrolli fl-istituzzjoni kollha, l-awtoritajiet kompetenti għandhom jevalwaw il-kapaċità tal-istituzzjoni li tirrimedja b’mod effettiv u fil-ħin in-nuqqasijiet identifikati u/jew it-tħassib superviżorju espress mill-awtoritajiet kompetenti. Fit-twettiq ta’ din l-evalwazzjoni, l-awtoritajiet kompetenti għandhom jikkunsidraw jekk ir-rekord tal-istituzzjoni jurix il-kapaċità u l-intenzjoni tagħha li tindirizza t-tħassib superviżorju u/jew in-nuqqasijiet identifikati b’mod effettiv u fil-ħin, u jekk dan diġà ġiex ikkunsidrat fil-valutazzjoni ta’ oqsma oħra tal-SREP. Għal dan il-għan, l-awtoritajiet kompetenti għandhom jisfruttaw il-valutazzjoni tal-elementi li ġejjin:

• a. ir-rwol tal-korp maniġerjali (i) fil-valutazzjoni tal-effettività tal-arranġamenti ta’ governanza tal-istituzzjoni, b’mod partikolari fir-rigward tal-azzjonijiet ta’ rimedjazzjoni, u (ii) fit-teħid ta’ miżuri xierqa biex jiġi indirizzat it-tħassib superviżorju u/jew in-nuqqasijiet (reazzjoni effettiva għat-tħassib superviżorju);
• b. il-kultura ta’ riskju fi ħdan l-istituzzjoni;
• c. l-adegwatezza u l-puntwalità tal-informazzjoni mogħtija u skambjata mal-awtorità kompetenti;
• d. il-kwalità tar-rapportar intern dwar l-azzjonijiet ta’ rimedjazzjoni lill-korp maniġerjali, lill-maniġment superjuri u lill-funzjonijiet ta’ kontroll intern;
• e. ir-rwol tal-funzjonijiet ta’ kontroll intern fir-reviżjoni tal-adegwatezza u l-effettività tal-azzjonijiet ta’ rimedjazzjoni mwettqa.

Meta jwettqu l-valutazzjoni tal-governanza interna u tal-kontrolli fl-istituzzjoni kollha fil-livell sussidjarju, minbarra l-elementi elenkati f’dan it-titolu, l-awtoritajiet kompetenti għandhom jivvalutaw jekk il-politiki u l-proċeduri fil-grupp kollu humiex implimentati b’mod konsistenti fil-livell sussidjarju u jekk l-entitajiet tal-grupp ħadux miżuri xierqa biex jiżguraw li l-attivitajiet tagħhom huma konformi mal-liġijiet u r-regolamenti kollha applikabbli.