Artikolu 8 Kriterji ta’ valutazzjoni

1.   L-Istati Membri għandhom jivvalutaw il-kwalità tal-arja ambjentali fir-rigward tas-sustanzi niġġiesa msemmija fl-Artikolu 7 fiż-żoni kollha tagħhom, f’konformità mal-kriterji stabbiliti fil-paragrafi 2 sa 6 ta’ dan l-Artikolu u f’konformità mal-Anness IV.

2.   Fiż-żoni kollha kklassifikati bħala li jaqbżu l-livelli limitu ta’ valutazzjoni stabbiliti għas-sustanzi niġġiesa msemmija fl-Artikolu 7, għandu jintuża kejl fiss sabiex tiġi vvalutata l-kwalità tal-arja ambjentali. Dak il-kejl fiss jista’ jiġi ssupplimentat b’applikazzjonijiet ta’ mmudellar jew kejl indikattiv għall-valutazzjoni tal-kwalità tal-arja u biex tiġi pprovduta informazzjoni adegwata dwar id-distribuzzjoni spazjali tas-sustanzi niġġiesa fl-arja u dwar ir-rappreżentattività spazjali tal-kejl fiss.

3.   Minn sentejn wara l-adozzjoni tal-atti ta’ implimentazzjoni msemmija fil-paragrafu 7 ta’ dan l-Artikolu, għandhom jintużaw applikazzjonijiet ta’ mmudellar jew kejl indikattiv flimkien ma’ kejl fiss biex tiġi vvalutata l-kwalità tal-arja ambjentali fiż-żoni kollha fejn il-livell ta’ sustanzi niġġiesa jaqbeż valur limitu jew valur fil-mira rilevanti stabbilit fl-Anness I.

L-applikazzjonijiet ta’ mmudellar jew il-kejl indikattiv imsemmija fl-ewwel subparagrafu għandhom jipprovdu informazzjoni dwar id-distribuzzjoni spazjali tas-sustanzi niġġiesa. Meta jintużaw applikazzjonijiet ta’ mmudellar, dawn għandhom jipprovdu wkoll informazzjoni dwar ir-rappreżentattività spazjali tal-kejl fiss u għandhom jitwettqu kemm-il darba jkun xieraq iżda mill-inqas kull ħames snin.

4.   Fiż-żoni kollha kklassifikati bħala li jaqgħu taħt il-livelli limitu ta’ valutazzjoni stabbiliti għas-sustanzi niġġiesa msemmija fl-Artikolu 7, l-applikazzjonijiet ta’ mmudellar, il-kejl indikattiv, l-istimi oġġettivi jew taħlita tagħhom huwa biżżejjed sabiex tiġi vvalutata l-kwalità tal-arja ambjentali.

5.   Ir-riżultati tal-applikazzjonijiet ta’ mmudellar użati f’konformità mal-paragrafu 3 jew 4 ta’ dan l-Artikolu jew l-Artikolu 9(3), jew tal-kejl indikattiv għandhom jitqiesu għall-finijiet tal-valutazzjoni tal-kwalità tal-arja fir-rigward tal-valuri limitu u l-valuri fil-mira.

Jekk ikun disponibbli kejl fiss b’żona ta’ rappreżentattività spazjali li tkopri ż-żona tal-qabżiet ikkalkulata mill-applikazzjoni ta’ mmudellar, Stat Membru jista’ jagħżel li ma jirrapportax il-qabża mmudellata bħala qabża tal-valuri limitu u l-valuri fil-mira rilevanti.

6.   Jekk l-applikazzjonijiet ta’ mmudellar użati skont il-paragrafi 3 jew 4 juru qabża ta’ kwalunkwe valur limitu jew valur fil-mira f’erja taż-żona mhux koperta minn kejl fiss u ż-żona tar-rappreżentattività spazjali tagħhom, jista’ jintuża mill-inqas kejl fiss jew indikattiv addizzjonali wieħed f’hotspots addizzjonali possibbli tat-tniġġis tal-arja fiż-żona kif identifikat mill-applikazzjoni ta’ mmudellar.

Jekk l-applikazzjonijiet ta’ mmudellar użati f’konformità mal-Artikolu 9(3) juru qabża ta’ kwalunkwe valur limitu jew valur fil-mira f’erja taż-żona li ma tkunx koperta minn kejl fiss u ż-żona tar-rappreżentattività spazjali tagħhom, għandu jintuża mill-inqas kejl fiss jew indikattiv addizzjonali wieħed f’hotspots addizzjonali possibbli tat-tniġġis tal-arja fiż-żona kif identifikat mill-applikazzjoni ta’ mmudellar.

Meta jintuża kejl fiss addizzjonali, dak il-kejl għandu jiġi stabbilit fi żmien sentejn kalendarji wara li tkun ġiet immudellata l-qabża. Meta jintuża kejl indikattiv addizzjonali, dak il-kejl għandu jiġi stabbilit fi żmien sena kalendarja waħda wara li tkun ġiet immudellata l-qabża. Il-kejl għandu jkopri mill-inqas sena kalendarja waħda f’konformità mar-rekwiżiti minimi tal-kopertura tad-data stabbiliti fil-Punt B tal-Anness V, biex jiġi vvalutat il-livell ta’ konċentrazzjoni tas-sustanza niġġiesa rilevanti.

Meta Stat Membru jagħżel li ma jwettaq ebda kejl fiss jew indikattiv addizzjonali, il-qabża murija mill-applikazzjonijiet ta’ mmudellar għandha tintuża għall-valutazzjoni tal-kwalità tal-arja.

7.   Sal-11 ta’ Ġunju 2026, il-Kummissjoni għandha tipprovdi, permezz ta’ atti ta’ implimentazzjoni, iktar dettalji tekniċi:

Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 26(2).

8.   L-użu ta’ bijoindikaturi għandu jkun ikkunsidrat fejn se jiġu stmati x-xejriet reġjonali tal-impatt fuq ekosistemi, inkluż f’konformità mal-monitoraġġ li jsir skont id-Direttiva (UE) 2016/2284.