Artikolu 21 Tniġġis transkonfini tal-arja

1.   Meta t-trasport transkonfini tat-tniġġis tal-arja minn Stat Membru wieħed jew iktar jikkontribwixxi b’mod sinifikanti għall-qabża ta’ kwalunkwe valur limitu, valur fil-mira għall-ożonu, obbligu tat-tnaqqis tal-esponiment medju jew livell limitu ta’ allert fi Stat Membru ieħor, dak l-Istat Membru l-ieħor għandu jinnotifika lill-Istati Membri li minnhom ikun oriġina t-tniġġis u lill-Kummissjoni dwar dan.

2.   L-Istati Membri kkonċernati għandhom jikkooperaw ma’ xulxin, inkluż billi jistabbilixxu timijiet konġunti ta’ esperti u bl-appoġġ tekniku mill-Kummissjoni, biex jidentifikaw is-sorsi tat-tniġġis tal-arja, il-kontributi ta’ dawk is-sorsi għall-qabżiet fi Stat Membru ieħor u l-miżuri li għandhom jittieħdu individwalment u f’koordinazzjoni ma’ Stati Membri oħra biex jindirizzaw dawk is-sorsi, u jfasslu attivitajiet koordinati, bħall-koordinazzjoni tal-pjanijiet dwar il-kwalità tal-arja skont l-Artikolu 19, li fihom kull Stat Membru għandu jindirizza s-sorsi tat-tniġġis li jinsabu fit-territorju tiegħu, sabiex jitneħħew tali qabżiet.

L-Istati Membri għandhom iwieġbu lil xulxin fil-ħin, u jinfurmaw lill-Kummissjoni, mhux iktar tard minn tliet xhur wara li jkunu ġew notifikati minn Stat Membru ieħor f’konformità mal-ewwel subparagrafu.

3.   Il-Kummissjoni għandha tiġi infurmata u mistiedna biex tkun preżenti jew tassisti fi kwalunkwe kooperazzjoni msemmija fil-paragrafu 2 ta’ dan l-Artikolu. Il-Kummissjoni tista’ titlob lill-Istati Membri kkonċernati jipprovdu aġġornament dwar il-progress fl-implimentazzjoni ta’ kwalunkwe attività koordinata stabbilita skont dak il-paragrafu. Meta jkun xieraq, il-Kummissjoni għandha, filwaqt li tqis ir-rapporti stabbiliti skont l-Artikolu 11 tad-Direttiva (UE) 2016/2284, tikkunsidra jekk għandhiex tittieħed azzjoni ulterjuri fil-livell tal-Unjoni sabiex jitnaqqsu l-emissjonijiet prekursuri responsabbli għat-tniġġis transkonfini.

4.   L-Istati Membri għandhom, meta dan ikun xieraq skont l-Artikolu 20, iħejju u jimplimentaw pjanijiet ta’ azzjoni kkoordinati għal żmien qasir, li jkopru żoni ġirien fi Stati Membri oħra. L-Istati Membri għandhom jiżguraw li żoni ġirien fi Stati Membri oħra jirċievu l-informazzjoni adegwata kollha dwar dawk il-pjanijiet ta’ azzjoni għal żmien qasir mingħajr dewmien bla bżonn.

5.   Meta l-livelli limitu ta’ allert jew il-livelli limitu ta’ informazzjoni jinqabżu f’żoni qrib il-fruntieri nazzjonali, l-informazzjoni dwar dawn il-qabżiet għandha tiġi pprovduta mill-iktar fis lill-awtoritajiet kompetenti fl-Istati Membri ġirien ikkonċernati. Dik l-informazzjoni għandha titqiegħed ukoll għad-dispożizzjoni tal-pubbliku.

6.   Fin-notifika msemmija fil-paragrafu 1, l-Istati Membri jistgħu, għas-sena rilevanti, jidentifikaw:

Stat Membru jista’ wkoll jipprovdi lill-Istati Membri kkonċernati u lill-Kummissjoni l-listi ta’ kwalunkwe tali żona u unità territorjali tal-esponiment medju flimkien ma’ informazzjoni dwar il-konċentrazzjonijiet u l-evidenza li turi li t-tniġġis tal-arja minn sorsi transkonfini, inkluż minn pajjiżi terzi, li fuqhom dak l-Istat Membru ma għandu l-ebda kontroll dirett, jikkontribwixxi b’mod sinifikanti għall-qabżiet. Il-Kummissjoni tista’ tikkunsidra dik l-informazzjoni, meta dan ikun rilevanti, għall-finijiet tal-Artikolu 18.

7.   Meta jistabbilixxu l-pjanijiet kif previst fil-paragrafi 2 u 4 u meta jgħarrfu lill-pubbliku kif imsemmi fil-paragrafu 5, l-Istati Membri għandhom, meta jkun xieraq, jagħmlu sforz sabiex ifittxu l-kooperazzjoni ma’ pajjiżi terzi, u partikolarment mal-pajjiżi kandidati. L-Istati Membri jistgħu, meta jkun xieraq, jitolbu appoġġ tekniku mill-Kummissjoni.