Artikolu 6 Rapportar mill-operaturi lill-awtoritajiet kompetenti

1.   Kull operatur ta’ installazzjoni li jwettaq waħda jew aktar mill-attivitajiet elenkati fl-Anness I, li jissodisfaw jew jeċċedu l-livelli limitu ta’ kapaċità applikabbli speċifikati f’dak l-Anness u li jew jirrilaxxa kwalunkwe sustanza niġġiesa elenkata fl-Anness II fi kwantità ogħla mil-limiti applikabbli, jew jaqbeż il-limiti tal-iskart stabbiliti fil-punt (b) ta’ dan il-paragrafu, għandu jirrapporta kull sena, lill-awtorità kompetenti tiegħu tal-anqas l-informazzjoni u d-data li ġejjin, sakemm dik l-informazzjoni jew data ma tkunx diġà disponibbli għall-awtorità kompetenti:

Il-Kummissjoni għandha, sal-31 ta’ Diċembru 2025, tadotta, permezz ta’ atti ta’ implimentazzjoni, lista ta’ materja prima rilevanti li għandha tiġi rrapportata skont il-punt (d) tal-ewwel subparagrafu ta’ dan il-paragrafu, li tispeċifika t-tipi u l-unitajiet, abbażi tad-dokumenti ta’ referenza dwar l-aqwa tekniki disponibbli (BAT) kif definiti fl-Artikolu 3, il-punt (11), tad-Direttiva 2010/75/UE. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 17(2) ta’ dan ir-Regolament. Il-Kummissjoni għandha tirrieżamina dawk l-atti ta’ implimentazzjoni u għandha tirrevedihom, fejn rilevanti.

2.   Meta r-rilaxx kif msemmi fil-paragrafu 1, l-ewwel subparagrafu, il-punt (a), jew it-trasferimenti barra s-sit ta’ inkwinanti msemmija fil-paragrafu 1, l-ewwel subparagrafu, il-punt (c), ma jaqbżux il-livelli limitu applikabbli speċifikati fl-Anness II, jew meta t-trasferimenti tal-iskart barra mis-sit ma jaqbżux il-limiti stabbiliti fil-paragrafu 1, l-ewwel subparagrafu, il-punt (b), l-operatur tal-installazzjoni kkonċernata għandu jiddikjara, fir-rapport tiegħu, li r-rilaxx tal-inkwinanti jew it-trasferimenti barra mis-sit tal-inkwinanti jew l-iskart huma taħt dawk il-livelli limitu.

L-Istati Membri jistgħu jiddeċiedu li jirrapportaw l-informazzjoni msemmija fl-ewwel subparagrafu biss fl-ewwel rapport għal installazzjoni, jew parti minnha, imfassal minn operatur wara d-dħul fis-seħħ ta’ dan ir-Regolament jew fl-ewwel rapport imfassal minn operatur wara li r-rilaxx tal-inkwinanti jew it-trasferimenti barra mis-sit tal-inkwinanti jew tal-iskart ma jibqgħux jaqbżu l-livelli limitu applikabbli speċifikati fl-Anness II.

3.   Meta jkunu qed iħejju r-rapport imsemmi fil-paragrafu 1, l-ewwel subparagrafu, ta’ dan l-Artikolu, l-operaturi għandhom jagħmlu użu mill-aħjar informazzjoni disponibbli. L-operaturi għandhom jiksbu d-data permezz ta’ kejl. Fejn il-kejl ma jirriżultax fl-aħjar informazzjoni disponibbli, ma jkunx prattikabbli jew ma jkunx teknoloġikament u ekonomikament vijabbli, l-operaturi għandhom jiksbu d-data permezz ta’ kalkolu. Fejn la l-kejl u lanqas il-kalkolu ma jkunu prattikabbli, l-operaturi jistgħu jiksbu d-data permezz ta’ stima. L-informazzjoni tista’ tinkludi data ta’ monitoraġġ, fatturi ta’ emissjoni, ekwazzjonijiet tal-bilanċ tal-massa, monitoraġġ indirett jew kalkoli oħra, ġudizzji tal-inġinerija u metodi oħra li huma f’konformità mal-Artikolu 9(1) u, fejn disponibbli, f’konformità ma’ metodoloġiji approvati internazzjonalment.

4.   L-operaturi għandhom jispeċifikaw fir-rapport imsemmi fil-paragrafu 1 il-metodi użati għall-kisba tad-data. Fejn id-data tkun inkisbet permezz ta’ kejl, għandu jiġi indikat il-metodu analitiku. Fejn id-data tkun inkisbet permezz ta’ kalkolu, għandu jiġi indikat il-metodu ta’ kalkolu.

5.   Ir-rilaxxi msemmija fl-Anness II li huma rrapportati fil-paragrafu 1, l-ewwel subparagrafu, għandhom jinkludu r-rilaxxi kollha mis-sorsi kollha inklużi fl-Anness I fis-sit tal-installazzjoni.

6.   Għall-finijiet tal-paragrafu 1, l-ewwel subparagrafu, id-data dwar ir-rilaxxi u t-trasferimenti għandha tiġi rrapportata bħala totali ta’ kull attività magħmula deliberatament, aċċidentalment, bħala rutina u mhux bħala rutina. Meta jipprovdu din id-data, l-operaturi għandhom jispeċifikaw kwalunkwe data li tkun marbuta mar-rilaxx aċċidentali tal-inkwinanti.

7.   L-operatur ta’ kull installazzjoni għandu jiġbor bi frekwenza xierqa id-data meħtieġa sabiex jiġi determinat liema mir-rilaxxi u mit-trasferimenti barra mis-sit tal-installazzjoni, jew parti minnha, huma soġġetti għar-rekwiżiti tar-rapportar taħt paragrafu 1, l-ewwel subparagrafu.

8.   L-operatur ta’ kull installazzjoni għandu jżomm ir-reġistri li minnhom ittieħdet id-data rapportata disponibbli għall-awtoritajiet kompetenti tiegħu għal 5 snin, li jibda mit-tmiem tas-sena tar-rapportar ikkonċernata. Dawk ir-reġistri għandhom jispjegaw ukoll il-metodoloġija li ntużat għall-ġbir tad-data.

9.   L-Istati Membri jistgħu jiddeċiedu li jikkwantifikaw ir-rilaxxi intenzjonati kif imsemmi fil-paragrafu 1, l-ewwel subparagrafu, il-punt (a), ta’ dan l-Artikolu huma stess f’isem l-operaturi tal-installazzjonijiet koperti mill-attivitijiet imsemmija fit-tieni ringiela u s-seba’ ringiela tal-Anness I. F’tali każijiet, il-paragrafi 1 sa 8 ta’ dan l-Artikolu ma għandhomx japplikaw għal dawk l-operaturi fir-rigward ta’ tali rilaxxi.

10.   Għall-finijiet tal-Artikolu 7, l-Istati Membri għandhom jiddeterminaw data sa meta l-operaturi għandhom jipprovdu d-data msemmija f’dan l-Artikolu lill-awtoritajiet kompetenti tagħhom.

11.   Sad-data tad-dħul fis-seħħ tal-att delegat imsemmi fl-Artikolu 15(3), meta installazzjoni, jew parti minnha, ma tissodisfax il-kundizzjonijiet stipulati fil-paragrafu 1, l-ewwel subparagrafu, ta’ dan l-Artikolu, iżda tkun parti minn faċilità li tissodisfa dawk il-kundizzjonijiet, dik l-installazzjoni, jew parti minnha, għandha tkun soġġetta għall-obbligi ta’ rapportar stabbiliti f’dan l-Artikolu, ħlief għall-obbligi stabbiliti fil-paragrafu 2 ta’ dan l-Artikolu.