Artikolu 5 Flussi tad-data għall-fini tal-pjattaforma komuni tad-data

1.   Fuq talba tal-Kummissjoni, l-Aġenziji għandhom jospitaw u jżommu data dwar sustanzi kimiċi ġġenerata bħala parti mil-liġi tal-Unjoni, nazzjonali jew internazzjonali, minn programmi jew minn attivitajiet ta’ riċerka li jikkorrispondu għall-mandat tagħhom u għat-tip ta’ data li għandhom diġà. Barra minn hekk, l-Aġenziji jistgħu, f’konformità mal-mandat tagħhom, jospitaw u jżommu data dwar sustanzi kimiċi sottomessa lilhom mill-Istati Membri jew minn partijiet oħra, inklużi aġenziji nazzjonali, istituti ta’ riċerka u organizzazzjonijiet ta’ pajjiżi terzi.

2.   Fejn il-Kummissjoni jew waħda mill-Aġenziji jkollha data jew informazzjoni kif imsemmija fl-Artikolu 3(2) jew (3), hija għandha tagħmel dik id-data disponibbli għall-ECHA, li għandha tinkorporha fil-pjattaforma komuni tad-data. Il-Kummissjoni u l-Aġenziji għandhom jipprovdu d-data jew l-informazzjoni lill-ECHA f’format standard, fejn disponibbli, flimkien mad-data ta’ kuntest rilevanti kif imsemmija fl-Artikolu 4(5), il-punt (c). Fejn dik id-data jew dik l-informazzjoni ma ssirx disponibbli għall-pubbliku skont l-att oriġinarju tal-Unjoni, il-Kummissjoni u l-Aġenziji għandhom jindikaw dan.

3.   L-ECHA għandha tospita u żżomm id-data tal-okkorrenza relatata mal-monitoraġġ fuq il-post tax-xogħol, inkluża data dwar il-bijomonitoraġġ uman okkupazzjonali.

4.   L-EEA għandha tospita u żżomm data dwar il-bijomonitoraġġ uman, data tal-okkorrenza għall-ambjent u data tal-okkorrenza relatata mal-kwalità tal-arja ta’ ġewwa.

5.   Mill-1 ta’ Jannar 2026, ir-riċerkaturi jew il-konsorzji ta’ riċerka ffinanzjati mill-programmi qafas tal-Unjoni jew mill-programmi nazzjonali għandhom jagħmlu d-datadwar il-bijomonitoraġġ uman kollha li jiġbru jew jiġġeneraw disponibbli għall-EEA. L-EEA għandha tospita dik id-data. Għal data dwar il-bijomonitoraġġ uman li tikkostitwixxi data personali, l-EEA għandha tispeċifika liema tip ta’ data għandu jkun magħmul disponibbli għaliha.

6.   Mill-1 ta’ Jannar 2026, ir-riċerkaturi jew il-konsorzji ta’ riċerka ffinanzjati mill-programmi qafas tal-Unjoni għandhom jagħmlu id-data relatata mas-sostenibbiltà ambjentali kollha li jiġbru jew jiġġeneraw disponibbli għall-ECHA. L-ECHA għandha tospita dik id-data.

7.   Il-Kummissjoni u l-Aġenziji għandhom jipprovdu l-kooperazzjoni teknika meħtieġa lill-ECHA biex id-data dwar sustanzi kimiċi pprovduta f’konformità mal-paragrafu 2 tkun tista’ tiġi inkorporata fil-pjattaforma komuni tad-data u tiġi ppublikata permezz tagħha. L-ECHA għandha tipprovdi appoġġ lill-Awtoritajiet u lill-aġenziji nazzjonali biex tiġi faċilitata l-inkorporazzjoni tad-data dwar sustanzi kimiċi pprovduta f’konformità mal-paragrafu 2.

8.   Għall-finijiet tal-paragrafu 2, il-Kummissjoni u l-Aġenziji għandhom jagħmlu d-data dwar sustanzi kimiċi li jkunu ġabru jew irċevew disponibbli għall-ECHA mingħajr dewmien ladarba jkunu għamlu l-valutazzjonijiet tal-validità u tal-kunfidenzjalità tad-data f’konformità mar-regoli applikabbli u ladarba jkunu inkorporaw is-sett tad-data korrispondenti fil-pjattaforma komuni tad-data.

9.   L-Awtoritajiet u l-aġenziji nazzjonali għandhom jiżguraw, meta jagħmlu d-data disponibbli għall-ECHA, li tali data tkun tista’ titniżżel, tinqara mill-magni u tkun interoperabbli. Huma għandhom jikkuraw u jivvalidaw id-data b’mod xieraq qabel ma jipprovduha lill-ECHA.

10.   Mingħajr preġudizzju għall-Artikolu 6(11), il-Kummissjoni u l-Aġenziji għandhom jaġixxu bħala kontrollur tad-data għal kwalunkwe data personali li jipprovdu lill-ECHA biex tiġi inkorporatafil-pjattaforma komuni tad-data.