Airteagal 5 Sreabha sonraí chun críche an ardáin sonraí chomhchoitinn

1.   Arna iarraidh sin don Choimisiún, déanfaidh na Gníomhaireachtaí sonraí ceimiceán a óstáil agus a chothabháil, ar sonraí iad arna nginiúint mar chuid de dhlí an Aontais, den dlí náisiúnta nó idirnáisiúnta, de chláir nó ó ghníomhaíochtaí taighde, a chomhfhreagraíonn dá sainordú agus don chineál sonraí a bhfuil seilbh acu orthu cheana féin. Ina theannta sin, féadfaidh Gníomhaireachtaí, i gcomhréir lena sainordú, sonraí ceimiceán arna gcur faoina mbráid ag Ballstáit nó ag páirtithe eile, lena n-áirítear gníomhaireachtaí náisiúnta, institiúidí taighde agus eagraíochtaí tríú tír, a óstáil agus a chothabháil.

2.   I gcás ina bhfuil sonraí nó faisnéis dá dtagraítear in Airteagal 3(2) nó (3) i seilbh an Choimisiúin nó ceann de na Gníomhaireachtaí, cuirfidh sé na sonraí sin ar fáil do ECHA, a dhéanfaidh iad a ionchorprú san ardán sonraí comhchoiteann. Cuirfidh an Coimisiún agus na Gníomhaireachtaí na sonraí nó an fhaisnéis ar fáil do ECHA i bhformáid chaighdeánach, i gcás ina bhfuil ceann ar fáil, mar aon leis na sonraí comhthéacs ábhartha dá dtagraítear in Airteagal 4(5), pointe (c). I gcás nach gcuirtear na sonraí sin ar fáil don phobal faoin ngníomh tionscnaimh de chuid an Aontais, cuirfidh an Coimisiún agus na Gníomhaireachtaí an méid sin in iúl.

3.   Déanfaidh ECHA sonraí maidir le teagmhais a bhaineann le faireachán san áit oibre a óstáil agus a chothabháil, lena n-áirítear sonraí bithmhonatóireachta daonna saothair.

4.   Déanfaidh EEA sonraí bithmhonatóireachta daonna, sonraí maidir le teagmhais don chomhshaol agus sonraí maidir le teagmhais a bhaineann le cáilíocht an aeir laistigh a óstáil agus a chothabháil.

5.   Ón 1 Eanáir 2026, déanfaidh taighdeoirí nó cuibhreannais taighde arna gcistiú ag cláir réime an Aontais nó ag cláir náisiúnta na sonraí bithmhonatóireachta daonna uile a bhailíonn nó a ghineann siad a chur ar fáil do EEA. Déanfaidh EEA na sonraí sin a óstáil. Le haghaidh sonraí bithmhonatóireachta daonna ar sonraí pearsanta iad, sonróidh EEA an cineál sonraí a bheidh le cur ar fáil dó.

6.   Ón 1 Eanáir 2026, déanfaidh taighdeoirí nó cuibhreannais taighde arna gcistiú ag cláir réime an Aontais na sonraí uile a bhaineann le hinbhuanaitheacht comhshaoil a bhailíonn nó a ghineann siad a chur ar fáil do ECHA. Déanfaidh ECHA na sonraí sin a óstáil.

7.   Soláthróidh an Coimisiún agus na Gníomhaireachtaí an comhar teicniúil is gá do ECHA chun gur féidir na sonraí ceimiceán a chuirtear ar fáil i gcomhréir le mír 2 a ionchorprú agus a fhoilsiú san ardán sonraí comhchoiteann. Soláthróidh ECHA tacaíocht do na hÚdaráis agus na gníomhaireachtaí náisiúnta chun ionchorprú na sonraí ceimiceán, arna gcur ar fáil i gcomhréir le mír 2, a chumasú.

8.   Chun críoch mhír 2, cuirfidh an Coimisiún agus na Gníomhaireachtaí sonraí ceimiceán a bhailigh siad nó a fuair siad ar fáil do ECHA gan moill mhíchuí a luaithe a bheidh measúnuithe bailíochta agus rúndachta déanta acu ar na sonraí i gcomhréir leis na rialacha is infheidhme agus a luaithe a bheidh an tacar sonraí comhfhreagrach ionchorpraithe acu san ardán sonraí comhchoiteann.

9.   Áiritheoidh na hÚdaráis agus na gníomhaireachtaí náisiúnta, agus sonraí á gcur ar fáil do ECHA, go mbeidh na sonraí sin in-íoslódáilte, inléite ag meaisín agus idir-inoibritheach. Coimeádfaidh agus bailíochtóidh siad na sonraí ar bhealach iomchuí sula gcuirtear ar fáil do ECHA iad.

10.   Gan dochar d’Airteagal 6(11), gníomhóidh an Coimisiún agus na Gníomhaireachtaí mar rialaitheoir sonraí le haghaidh aon sonraí pearsanta a sholáthraíonn siad do ECHA lena n-ionchorprú san ardán sonraí comhchoiteann.