Artikolu 24 Mekkaniżmu ċentralizzat tal-ġenerazzjoni tad-data

1.   Bl-użu tal-aqwa riżorsi indipendenti disponibbli, l-ECHA tista’ tikkummissjona studji xjentifiċi biex:

2.   Mingħajr preġudizzju għall-obbligi fuq id-detenturi tad-dover skont l-atti legali tal-Unjoni elenkati fl-Anness I, il-Parti 1, il-Kummissjoni, f’ċirkostanzi eċċezzjonali ta’ kontroversja serja jew ta’ riżultati kunfliġġenti, tista’ titlob lill-ECHA tikkummissjona studji xjentifiċi bl-objettiv li tivverifika l-evidenza użata fil-proċess tagħha ta’ valutazzjoni tas-sustanzi kimiċi. Dawk l-istudji jista’ jkollhom ambitu usa’ mill-evidenza soġġetta għal verifika.

3.   Fuq talba mill-Kummissjoni, l-ECHA għandha tikkummissjona studji xjentifiċi kif imsemmi fil-paragrafi 1 u 2.

4.   L-ECHA għandha tikkummissjona biss studji xjentifiċi fejn ir-riżultati ma jkunux jistgħu jinkisbu permezz ta’ dispożizzjonijiet jew proċessi legali eżistenti skont l-atti legali tal-Unjoni elenkati fl-Anness I, il-Parti 1. Hija għandha tagħti prijorità lill-użu ta’ metodi vvalidati li ma jużawx l-annimali, filwaqt li l-ittestjar fuq annimali vertebrati għandu jintuża biss bħala l-aħħar alternattiva. Hija ma għandhiex tikkummissjona studji b’objettiv predominanti ta’ riċerka.

5.   L-ECHA għandha tfittex li tevita d-duplikazzjoni mal-programmi ta’ riċerka jew ta’ implimentazzjoni tal-Istati Membri jew tal-Unjoni.

6.   L-ECHA għandha tikkummissjona studji xjentifiċi skont dan l-Artikolu b’mod miftuħ u trasparenti, u biss wara li tkun ikkonsultat mal-Istati Membri.

7.   L-ECHA u l-EFSA għandhom jikkooperaw mill-qrib ma’ xulxin dwar l-ippjanar u l-ikkummissjonar ta’ studji xjentifiċi mwettqa mill-ECHA f’konformità mal-paragrafi 1, 2 u 3 ta’ dan l-Artikolu u tal-istudji mwettqa mill-EFSA f’konformità mal-Artikolu 32 tar-Regolament (KE) Nru 178/2002.

8.   L-ECHA tista’ titlob kampjun ta’ sustanza jew ta’ taħlita meħtieġa għat-twettiq tal-istudji xjentifiċi msemmija fil-paragrafi 1, 2 u 3 minn operatur tan-negozju li jimmanifattura, jimporta, jifformula jew iqiegħed tali sustanza jew taħlita fis-suq. Sabiex titlob kampjun, l-ECHA għandha tibgħat abbozz ta’ talba lill-operatur tan-negozju, fejn tispjega t-talba u tispeċifika l-kwantità u l-forma tal-kampjun kif ukoll id-data sa meta għandu jiġi pprovdut il-kampjun. L-ECHA tista’ titlob ukoll lill-operatur tan-negozju jipprovdi karatterizzazzjoni tas-sustanza jew tat-taħlita. L-ECHA għandha tinforma lill-operatur tan-negozju bid-dritt tiegħu li jikkummenta fi żmien 30 jum minn meta jirċievi t-talba. Kwalunkwe kumment bħal dan riċevut għandu jitqies mill-ECHA, li għandha tikkonferma jew temenda t-talba.

Meta l-ECHA tikkonferma jew temenda t-talba, l-operatur tan-negozju għandu jipprovdi l-kampjun mitlub mingħajr ħlas lill-ECHA jew lil kwalunkwe persuna fiżika jew ġuridika kkummissjonata mill-ECHA biex twettaq l-istudju xjentifiku sal-iskadenza stabbilita mill-ECHA. L-operatur tan-negozju jista’ jitlob lill-ECHA biex ma tiddivulgax ċerta informazzjoni ta’ karatterizzazzjoni relatata mal-kampjun ipprovdut jekk l-operatur tan-negozju juri li id-divulgazzjoni ddgħajjef il-protezzjoni tal-interessi kummerċjali tiegħu.

Jekk l-ECHA tqis li t-talba hija ġustifikata, l-informazzjoni kkonċernata għandha titqies kunfidenzjali u ma għandhiex titqiegħed għad-dispożizzjoni tal-pubbliku.

9.   L-ECHA għandha tagħmel ir-riżultati tal-istudji xjentifiċi mwettqa skont dan l-Artikolu disponibbli permezz tal-pjattaforma komuni tad-data.