Airteagal 49 Bunachar sonraí AE chun córais RTS agus feidhmchláir folláine a chlárú

1.   Déanfaidh an Coimisiún bunachar sonraí AE a bheidh ar fáil don phobal a bhunú agus a choinneáil ar bun ina mbeidh sonraí maidir le córais RTS ar eisíodh dearbhú comhréireachta AE ina leith de bhun Airteagal 39 agus maidir le feidhmchláir folláine ar eisíodh lipéad ina leith de bhun Airteagal 47 (‘bunachar sonraí AE chun córais RTS agus feidhmchláir folláine a chlárú’).

2.   Maidir le córas RTS dá dtagraítear in Airteagal 27 nó feidhmchlár folláine dá dtagraítear in Airteagal 47, sula ndéanfar iad a chur ar an margadh nó a chur i mbun seirbhíse, déanfaidh monaróir an chórais RTS sin nó an fheidhmchláir folláine sin nó, i gcás inarb infheidhme, a ionadaí údaraithe, na sonraí is gá dá dtagraítear i mír 4 den Airteagal seo a chur isteach i mbunachar sonraí AE chun córais RTS agus feidhmchláir folláine a chlárú, lena n-áirítear, i gcás córais RTS, torthaí an mheasúnaithe dá dtagraítear in Airteagal 40.

3.   Maidir le feistí leighis, feistí leighis diagnóiseacha in vitro nó córais ardriosca intleachta saorga dá dtagraítear in Airteagal 27(1) agus (2) den Rialachán seo, clárófar iad freisin sna bunachair sonraí a bunaíodh de bhun Rialachán (AE) 2017/745, (AE) 2017/746 nó (AE) 2024/1689, de réir mar is infheidhme. I gcásanna den sórt sin, cuirfear na sonraí atá le cur isteach ar aghaidh chuig bunachar sonraí AE chun córais RTS agus feidhmchláir folláine a chlárú.

4.   Tugtar de chumhacht don Choimisiún gníomhartha tarmligthe a ghlacadh i gcomhréir le hAirteagal 97 chun an Rialachán seo a fhorlíonadh trí liosta na sonraí is gá a chur isteach i mbunachar sonraí AE chun córais RTS agus feidhmchláir folláine a chlárú ag monaróirí na gcóras RTS agus na bhfeidhmchlár folláine de bhun mhír 2 den Airteagal seo a chinneadh.