Airteagal 62 Táillí

1.   Féadfaidh comhlachtaí rochtana sonraí, lena n-áirítear seirbhís rochtana sonraí sláinte an Aontais nó sealbhóirí iontaofa sonraí sláinte dá dtagraítear in Airteagal 72, táillí a ghearradh ar shonraí leictreonacha sláinte a chur ar fáil le haghaidh úsáid thánaisteach.

Beidh na táillí i gcomhréir leis an gcostas a bhaineann leis na sonraí a chur ar fáil agus ní chuirfidh siad srian leis an iomaíocht.

Leis na táillí, cumhdófar na costais ar fad nó cuid de na costais a bhaineann leis an nós imeachta chun measúnú a dhéanamh ar iarraidh ar rochtain ar shonraí sláinte nó ar iarraidh ar shonraí, chun cead sonraí de bhun Airteagal 67 agus Airteagal 68 a eisiúint, a dhiúltú nó a leasú nó chun freagra a thabhairt ar iarraidh ar shonraí sláinte arna cur isteach de bhun Airteagal 69, lena n-áirítear costais a bhaineann leis na sonraí leictreonacha sláinte a chomhdhlúthú, a ullmhú, ainm bréige a chur i bhfeidhm orthu, a anaithnidiú, agus iad a sholáthar.

Féadfaidh na Ballstáit táillí laghdaithe a shocrú le haghaidh cineálacha áirithe úsáideoirí sonraí sláinte atá lonnaithe san Aontas, amhail comhlachtaí de chuid na hearnála poiblí nó institiúidí, comhlachtaí, oifigí agus gníomhaireachtaí de chuid an Aontais a bhfuil sainordú dlíthiúil acu i réimse na sláinte poiblí, taighdeoirí ollscoile nó micrifhiontair.

2.   Féadfar a áireamh sna táillí dá dtagraítear i mír 1 den Airteagal seo cúiteamh i leith na gcostas arna dtabhú ag an sealbhóir sonraí sláinte as na sonraí leictreonacha sláinte a chuirfear ar fáil le haghaidh úsáid thánaisteach a thiomsú agus a ullmhú. I gcásanna den sórt sin, soláthróidh an sealbhóir sonraí sláinte meastachán ar na costais sin don chomhlacht rochtana sonraí sláinte. I gcás inar comhlacht earnála poiblí é an sealbhóir sonraí sláinte, ní bheidh feidhm ag Airteagal 6 de Rialachán (AE) 2022/868. Na táillí sin a bhaineann le costais an tsealbhóra sonraí sláinte, íocfar leis an sealbhóir sonraí sláinte iad.

3.   Aon táillí a ghearrfar ar úsáideoirí sonraí sláinte de bhun an Airteagail seo, beidh siad trédhearcach agus neamh-idirdhealaitheach.

4.   I gcás nach gcomhaontóidh na sealbhóirí sonraí sláinte agus na húsáideoirí sonraí sláinte ar leibhéal na dtáillí laistigh de mhí amháin ón gcead sonraí a eisiúint, féadfaidh an comhlacht rochtana sonraí sláinte na táillí a shocrú i gcomhréir leis an gcostas a bhaineann le sonraí leictreonacha sláinte a chur ar fáil le haghaidh úsáid thánaisteach. I gcás nach gcomhaontóidh na sealbhóirí sonraí sláinte nó na húsáideoirí sonraí sláinte ar an táille atá leagtha amach ag an gcomhlacht rochtana sonraí sláinte, beidh rochtain acu ar chomhlachtaí um réiteach díospóidí i gcomhréir le hAirteagal 10 de Rialachán (AE) 2023/2854.

5.   Sula n-eiseofar cead sonraí de bhun Airteagal 68 nó sula dtabharfar freagra ar iarraidh ar shonraí sláinte arna cur isteach de bhun Airteagal 69, cuirfidh an comhlacht rochtana sonraí sláinte an t-iarratasóir ar shonraí sláinte ar an eolas faoi na táillí measta. Cuirfear an t-iarratasóir ar shonraí sláinte ar an eolas faoin rogha an t-iarratas ar rochtain ar shonraí sláinte nó iarraidh ar shonraí sláinte a tharraingt siar. Má dhéanann an t-iarratasóir ar shonraí sláinte a iarratas nó a iarraidh a tharraingt siar, ní ghearrfar ach na costais a tabhaíodh cheana féin ar an iarratasóir ar shonraí sláinte.

6.   Déanfaidh an Coimisiún, trí bhíthin gníomhartha cur chun feidhme, prionsabail a leagan síos maidir leis na beartais táillí agus na struchtúir táillí, lena n-áirítear asbhaintí i gcás na n-eintiteas dá dtagraítear i mír 1, an ceathrú fomhír, den Airteagal seo, chun tacú le comhsheasmhacht agus trédhearcacht idir na Ballstáit maidir le beartas táillí agus struchtúr táillí den sórt sin. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 9897(2).