Artikolu 62 Tariffi

1.   Il-korpi tal-aċċess għad-data dwar is-saħħa, inkluż is-servizz tal-aċċess għad-data dwar is-saħħa, jew detenturi fdati tad-data dwar is-saħħa msemmija fl-Artikolu 72 jistgħu jitolbu tariffi biex jagħmlu d-data elettronika dwar is-saħħa disponibbli għal użu sekondarju.

It-tariffi għandhom ikunu proporzjonati għall-kost biex id-data ssir disponibbli u ma għandhomx jirrestrinġu l-kompetizzjoni.

It-tariffi għandhom ikopru il-kostijiet kollha jew parti minnhom relatati mal-proċedura għall-valutazzjoni ta’ applikazzjoni għall-aċċess tad-data dwar is-saħħa jew talba għad-data dwar is-saħħa, il-ħruġ, ir-rifjut jew l-emendar ta’ permess tad-data skont l-Artikoli 67 u 68 jew biex jingħata rispons għal talba għal data dwar is-saħħa sottomessa nskont l-Artikolu 69, inklużi kosti relatati mal-konsolidazzjoni, il-preparazzjoni, il-psewdonimizzazzjoni, l-anonimizzazzjoni u l-forniment tad-data elettronika dwar is-saħħa.

L-Istati Membri jistgħu jistabbilixxu tariffi mnaqqsa għal ċerti tipi ta’ utenti tad-data dwar is-saħħa li jinsabu fl-Unjoni, bħal korpi tas-settur pubbliku jew istituzzjonijiet, korpi, uffiċċji u aġenziji tal-Unjoni b’mandat legali fil-qasam tas-saħħa pubblika, ir-riċerkaturi universitarji jew il-mikrointrapriżi.

2.   It-tariffi ta’ dan l-Artikolu jistgħu jinkludu kumpens għall-kostijiet imġarrba mid-detentur tad-data dwar is-saħħa għall-kompilazzjoni u t-tħejjija tad-data elettronika dwar is-saħħa li għandha ssir disponibbli għall-użu sekondarju. F’tali każijiet id-detentur tad-data dwar is-saħħa għandu jipprovdi stima ta’ tali kostijiet lill-korp tal-aċċess għad-data dwar is-saħħa. Fejn id-detentur tad-data dwar is-saħħa jkun korp tas-settur pubbliku, l-Artikolu 6 tar-Regolament (UE) 2022/868 ma għandux japplika. Il-parti tat-tariffi marbuta mal-kostijiet tad-detentur tad-data dwar is-saħħa għandha titħallas lid-detentur tad-data dwar is-saħħa.

3.   Kwalunkwe tariffa mitluba mingħand l-utenti tad-data dwar is-saħħa skont dan l-Artikolu għandha tkun trasparenti u nondiskriminatorja.

4.   Meta d-detenturi tad-data dwar is-saħħa u l-utenti tad-data dwar is-saħħa ma jaqblux dwar il-livell tat-tariffi fi żmien xahar minn meta jkun inħareġ il-permess tad-data, il-korp tal-aċċess għad-data dwar is-saħħa jista’ jistabbilixxi t-tariffi b’mod proporzjonali għall-kost tat-tqegħid għad-dispożizzjoni ta’ data elettronika dwar is-saħħa għal użu sekondarju. Fejn id-detenturi tad-data dwar is-saħħa jew l-utenti tad-data dwar is-saħħa ma jaqblux mat-tariffa stabbilita mill-korp tal-aċċess għad-data dwar is-saħħa, huma għandu jkollhom aċċess għall-korpi għas-soluzzjoni tat-tilwim f’konformità mal-Artikolu 10 tar-Regolament (UE) 2023/2854.

5.   Qabel ma joħroġ permess tad-data skont l-Artikolu 68 jew jipprovdi risposta għal talba għad-data dwar is-saħħa sottomessa skont l-Artikolu 69, il-korp tal-aċċess għad-data dwar is-saħħa għandu jinforma lill-applikant tad-data dwar is-saħħa dwar it-tariffi stmati. L-applikant għad-data dwar is-saħħa għandu jiġi infurmat dwar l-għażla li jirtira l-applikazzjoni ta’ aċċess għal data dwar is-saħħa jew talba għad-data dwar is-saħħa. Jekk l-applikant għal data dwar is-saħħa jirtira l-applikazzjoni jew it-talba tiegħu, l-applikant għandu jintalab iħallas biss il-kostijiet li jkunu diġà ġġarrbu.

6.   Il-Kummissjoni għandha tistabbilixxi prinċipji għall-politiki tat-tariffi u għall-istrutturi tat-tariffi permezz ta’ atti ta’ implimentazzjoni, inklużi tnaqqis għal entitajiet imsemmija fil-paragrafu 1, ir-raba’ subparagrafu, ta’ dan l-Artikolu sabiex tappoġġa l-konsistenza u t-trasparenza bejn l-Istati Membri fir-rigward ta’ politiki tat-tariffi u strutturi tat-ttariffi. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).