Artikolu 19 Stabbiliment tal-FIU

1.   Kull Stat Membru għandu jistabbilixxi FIU biex tipprevjeni, tikxef u tiġġieled il-ħasil tal-flus u l-finanzjament tat-terroriżmu b'mod effettiv.

2.   L-FIU għandha tkun l-unità nazzjonali ċentrali unika responsabbli biex tirċievi u tanalizza rapporti ppreżentati mill-entitajiet marbutin b'obbligu f'konformità mal-Artikolu 69 tar-Regolament (UE) 2024/1624, rapporti ppreżentati mill-entitajiet marbutin b'obbligu f'konformità mal-Artikolu 74, u l-Artikolu 80(4), it-tieni subparagrafu, ta’ dak ir-Regolament, u kwalunkwe informazzjoni oħra rilevanti għall-ħasil tal-flus, ir-reati predikati tiegħu jew il-finanzjament tat-terroriżmu, inkluż informazzjoni trażmessa mill-awtoritajiet doganali skont l-Artikolu 9 tar-Regolament (UE) 2018/1672, kif ukoll informazzjoni sottomessa mill-awtoritajiet superviżorji jew minn awtoritajiet oħra.

3.   L-FIU għandha tkun responsabbli għat-tqassim tar-riżultati tal-analiżi tagħha u kull informazzjoni addizzjonali lill-awtoritajiet kompetenti rilevanti fejn ikun hemm raġunijiet għal suspett ta' ħasil tal-flus, ir-reati predikati tiegħu jew finanzjament tat-terroriżmu. Għandha tkun tista' tikseb informazzjoni addizzjonali mill-entitajiet marbutin b'obbligu.

Il-funzjoni ta' analiżi finanzjarja tal-FIU għandha tikkonsisti f'dan li ġej:

4.   Kull FIU għandha topera b'mod indipendenti u awtonomu li jfisser li għandu jkollha l-awtorità u l-kapaċità li twettaq il-funzjonijiet tagħha liberament, inkluż il-kapaċità li tieħu deċiżjonijiet awtonomi li tanalizza, titlob u, f'konformità mal-paragrafu 3, taqsam informazzjoni speċifika. Għandha tkun ħielsa minn kull influwenza jew indħil indebitu mill-gvern, mill-industrija jew politiku.

Meta FIU tkun stabbilita fi ħdan l-istruttura eżistenti ta' awtorità oħra, il-funzjonijiet ewlenin tal-FIU għandhom ikunu indipendenti u operazzjonalment separati mill-funzjonijiet l-oħra tal-awtorità ospitanti.

5.   L-Istati Membri għandhom jipprovdu r-riżorsi finanzjarji, umani u tekniċi adegwati lill-FIUs tagħhom biex iwettqu l-kompiti tagħhom. L-FIUs għandhom ikunu jistgħu jiksbu u jużaw ir-riżorsi meħtieġa biex iwettqu l-funzjonijiet tagħhom.

6.   L-Istati Membri għandhom jiżguraw li l-persunal tal-FIUs tagħhom ikun marbut b'rekwiżiti ta' segretezza professjonali ekwivalenti għal dawk stabbiliti fl-Artikolu 67, u li jżomm standards professjonali għoljin, inkluż standards għoljin ta' protezzjoni tad-data, u jkun ta' integrità għolja u b'ħiliet xierqa fir-rigward tat-trattament etiku ta' settijiet ta' big data. L-Istati Membri għandhom jiżguraw li l-FIUs ikollhom fis-seħħ proċeduri għall-prevenzjoni u l-ġestjoni tal-kunflitti ta' interess.

7.   L-Istati Membri għandhom jiżguraw li l-FIUs ikollhom regoli fis-seħħ li jirregolaw is-sigurtà u l-kunfidenzjalità tal-informazzjoni.

8.   L-Istati Membri għandhom jiżguraw li l-FIUs ikollhom fis-seħħ kanali siguri u protetti għall-komunikazzjoni u l-iskambju ta' informazzjoni b'mezzi elettroniċi mal-awtoritajiet kompetenti u l-entitajiet marbutin b'obbligu.

9.   L-Istati Membri għandhom jiżguraw li l-FIUs ikunu jistgħu jagħmlu arranġamenti ma' awtoritajiet kompetenti nazzjonali oħra skont l-Artikolu 46 dwar l-iskambju ta' informazzjoni.

10.   Sal-10 ta’ Lulju 2028, l-AMLA għandha toħroġ linji gwida indirizzati lill-FIUs dwar: