Artikolu 15 Obbligi tal-manifatturi

1.   Il-manifatturi għandhom biss iqiegħdu fis-suq imballaġġ li huwa konformi mar-rekwiżiti stabbiliti fi jew skont l-Artikoli 5 sa 12.

2.   Qabel ma jqiegħdu l-imballaġġ fis-suq, il-manifatturi għandhom iwettqu l-proċedura tal-valutazzjoni tal-konformità msemmija fl-Artikolu 38, jew jaraw li din titwettaq f'isimhom, u jfasslu d-dokumentazzjoni teknika msemmija fl-Anness VII.

Meta l-konformità tal-imballaġġ mar-rekwiżiti applikabbli tkun intweriet mill-proċedura tal-valutazzjoni tal-konformità msemmija fl-Artikolu 38, il-manifatturi għandhom ifasslu dikjarazzjoni tal-konformità tal-UE f'konformità mal-Artikolu 39.

3.   Il-manifatturi għandhom iżommu d-dokumentazzjoni teknika msemmija fl-Anness VII u d-dikjarazzjoni tal-konformità tal-UE kif ġej:

4.   Il-manifatturi għandhom jiżguraw li jkollhom il-proċeduri stabbiliti biex il-produzzjoni tas-serje tal-imballaġġ tibqa' tikkonforma ma' dan ir-Regolament. Il-manifatturi għandhom iqisu b'mod adegwat il-bidliet fid-disinn tal-imballaġġ jew fil-karatteristiċi, kif ukoll il-bidliet fl-istandards armonizzati, fl-ispeċifikazzjonijiet tekniċi komuni jew fi speċifikazzjonijiet tekniċi oħra li b'referenza għalihom tiġi ddikjarata l-konformità jew li permezz tagħhom tiġi vverifikata l-konformità tiegħu. Meta l-manifatturi jsibu li l-konformità tal-imballaġġ tista' tiġi affettwata, huma għandhom iwettqu valutazzjoni mill-ġdid f'konformità mal-proċedura tal-valutazzjoni tal-konformità msemmija fl-Artikolu 38 jew jaraw li din titwettaq f'isimhom.

5.   Il-manifatturi għandhom jiżguraw li l-imballaġġ ikollu n-numru tat-tip, tal-lott jew tas-serje jew element ieħor li jippermetti l-identifikazzjoni tiegħu, jew, meta d-daqs jew in-natura tal-imballaġġ ma jippermettux dan, li l-informazzjoni meħtieġa hi pprovduta f'dokument li jakkumpanja l-prodott fl-imballaġġ.

6.   Il-manifatturi għandhom jindikaw, fuq l-imballaġġ jew fuq kodiċi QR jew mezz ieħor ta' data, isimhom, l-isem kummerċjali reġistrat jew it-trademark reġistrata kif ukoll l-indirizz postali fejn u, meta disponibbli, il-mezzi elettroniċi ta' komunikazzjoni li bihom, ikunu jistgħu jiġu kkuntattjati. Meta dan ma jkunx possibbli, l-informazzjoni meħtieġa għandha tiġi pprovduta bħala parti mill-informazzjoni permezz tal-kodiċi QR jew tip ieħor ta' mezz ta' data standardizzat, miftuħ u diġitali kif imsemmi fl-Artikolu 12(1), (2), (4) jew (5) jew f'dokument li jakkumpanja l-prodott fl-imballaġġ. L-indirizz postali għandu jindika l-punt uniku fejn jista' jiġi kkuntattjat il-manifattur.

7.   Il-manifatturi għandhom jiżguraw li l-informazzjoni pprovduta f'konformità mal-paragrafi 5 u 6 tkun ċara, tinftiehem u tista' tinqara, u ma tissostitwix, jew ma toskurax u lanqas ma tista tiġi mfixkla mal-informazzjoni meħtieġa minn atti legali oħra tal-liġi tal-Unjoni dwar it-tikkettar tal-prodott fl-imballaġġ.

8.   Il-manifatturi li jqisu jew li jkollhom raġuni biex jaħsbu li imballaġġ li huma jkunu qiegħdu fis-suq mid-data tad-dħul fis-seħħ ta' dan ir-Regolament ma jkunx konformi ma' wieħed jew aktar mir-rekwiżiti applikabbli stabbiliti fi jew skont l-Artikoli 5 sa 12 għandhom minnufih jieħdu l-miżuri korrettivi meħtieġa biex jagħmlu dak l-imballaġġ konformi, jirtirawh jew isejħuh lura, kif xieraq. Il-manifatturi għandhom jinformaw minnufih lill-awtoritajiet tas-sorveljanza tas-suq tal-Istat Membru li fih ikunu qiegħdu l-imballaġġ għad-dispożizzjoni dwar in-nuqqas ta' konformità suspettat u dwar il-miżura korrettiva meħuda.

9.   B'deroga mill-paragrafu 8 ta’ dan l-Artikolu, l-obbligu li jsir konformi, jiġi rtirat jew jissejjaħ lura imballaġġ maħsub li mhuwiex konformi mar-rekwiżiti applikabbli stabbiliti fi jew skont l-Artikoli 5 sa 12 ma għandux japplika għal imballaġġ riutilizzabbli li jkun tqiegħed fis-suq qabel l-11 ta’ Frar 2025.

10.   Il-manifatturi għandhom, fuq talba motivata minn awtorità nazzjonali kompetenti, jipprovdu l-informazzjoni u d-dokumentazzjoni kollha meħtieġa biex juru l-konformità tal-imballaġġ bir-rekwiżiti stabbiliti fi jew skont l-Artikoli 5 sa 12, inkluż id-dokumentazzjoni teknika, b'lingwa waħda jew aktar li jkunu jistgħu jinftiehmu faċilment minn dik l-awtorità. Dik l-informazzjoni u d-dokumentazzjoni għandhom jiġu pprovduti f'forma elettronika u, fuq talba, f'forma stampata. Id-dokumenti rilevanti għandhom ikunu disponibbli fi żmien għaxart ijiem minn meta tasal it-talba mill-awtorità nazzjonali. Il-manifatturi għandhom jikkooperaw mal-awtorità nazzjonali dwar kwalunkwe azzjoni meħuda biex jiġi rrimedjat kwalunkwe każ ta' nuqqas ta' konformità mar-rekwiżiti stabbiliti fi jew skont l-Artikoli 5 sa 12.

11.   Il-paragrafi 2 u 3 ma għandhomx japplikaw għall-imballaġġ għat-trasport magħmul apposta għal apparati mediċi konfigurabbli u sistemi mediċi li għandhom jintużaw f'ambjenti industrijali u tal-kura tas-saħħa.

12.   Meta l-persuna fiżika jew ġuridika li jkollha l-imballaġġ iddisinjat jew immanifatturat taħt isimha jew bit-trademark tagħha stess tkun koperta mid-definizzjoni ta' mikrointrapriża stipulata fir-Rakkomandazzjoni 2003/361/KE kif applikabbli fil-11 ta’ Frar 2025, u l-persuna fiżika jew ġuridika li tforni l-imballaġġ lill-persuna fiżika jew ġuridika li għandha l-imballaġġ iddisinjat jew immanifatturat taħt isimha jew bit-trademark tagħha stess tkun tinsab fl-Unjoni, il-persuna fiżika jew ġuridika li tforni l-imballaġġ għandha titqies bħala l-manifattur għall-finijiet ta' dan l-Artikolu.