Artikolu 4 Servizzi tal-aċċess għad-data elettronika dwar is-saħħa għall-persuni fiżiċi u r-rappreżentanti tagħhom

1.   L-Istati Membri għandhom jiżguraw li jiġu stabbiliti servizz wieħed jew aktar tal-aċċess għad-data elettronika dwar is-saħħa fil-livell nazzjonali, reġjonali jew lokali, sabiex jippermettu lill-persuni fiżiċi jaċċessaw id-data elettronika personali dwar is-saħħa u jeżerċitaw id-drittijiet tagħhom previsti fl-Artikoli 3 u 5 sa 10. Tali servizzi ta’ aċċess għad-data elettronika dwar is-saħħa għandhom ikunu mingħajr ħlas għall-persuni fiżiċi u r-rappreżentanti tagħhom imsemmija fil-paragrafu 2 ta’ dan l-Artikolu.

2.   L-Istati Membri għandhom jiżguraw li jiġu stabbiliti servizz ta’ prokura wieħed jew aktar bħala funzjonalità tas-servizzi tal-aċċess għad-data elettronika dwar is-saħħa li jippermettu:

L-Istati Membri għandhom jistabbilixxu regoli dwar l-awtorizzazzjonijiet imsemmija fil-punt (a) tal-ewwel subparagrafu u, azzjonijiet ta’ gwardjani u rappreżentanti legali oħrajn.

3.   Is-servizzi ta’ prokura msemmija fil-paragrafu 2 għandhom jipprovdu awtorizzazzjonijiet b’mod trasparenti u li jinftiehem faċilment, mingħajr ħlas, u elettroniku jew fuq karta. Il-persuni fiżiċi u r-rappreżentatni tagħhom għandhom jiġu infurmati dwar id-drittijiet ta’ awtorizzazzjoni tagħhom, inkluż dwar kif jeżerċitaw dwak id-drittijiet, u dwar il-proċess ta’ awtorizzazzjoni.

Is-servizzi ta’ prokura għandhom jipprovdu mekkaniżmu faċli għall-ilmenti għall-persuni fiżiċi.

4.   Is-servizzi ta’ prokura msemmija fil-paragrafu 2 ta’ dan l-Artikolu għandhom ikunu interoperabbli fost l-Istati Membri. Il-Kummissjoni għandha, permezz ta’ atti ta’ implimentazzjoni, tistabbilixxi l-ispeċifikazzjonijiet tekniċi għall-interoperabbiltà tas-servizzi ta’ prokura tal-Istati Membri. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

5.   Is-servizzi ta’ aċċess għad-data elettronika dwar is-saħħa u s-servizzi ta’ prokura għandhom ikunu faċilment aċċessibbli għall-persuni b’diżabbiltà, il-gruppi vulnerabbli u l-persuni b’livell baxx ta’ litteriżmu diġitali.