15.1 Luach saothair neamh-iarchurtha agus iarchurtha

Gan dochar do chur i bhfeidhm an tarscaoilte faoi Airteagal 32(4) de Threoir (AE) 2019/2034, ba cheart do ghnólachtaí infheistíochta sceideal iarchurtha a chur chun feidhme lena ndéantar luach saothair na mball foirne a ailíniú go hiomchuí le gníomhaíochtaí, le timthriall gnó agus le próifíl riosca an ghnólachta infheistíochta agus le gníomhaíochtaí na mball foirne sainaitheanta, ionas gur féidir cuid imleor den luach saothair inathraithe a choigeartú le haghaidh torthaí riosca le himeacht ama trí choigeartuithe riosca ex post.

Sainmhínítear sceideal iarchurtha trí chomhpháirteanna éagsúla:

• a. an cion den luach saothair inathraithe atá á iarchur (cuid 15.2);
• b. fad na tréimhse iarchurtha (cuid 15.2);
• c. an luas ag a ndílsíonn an luach saothair iarchurtha, lena n-áirítear an tréimhse ama ó dheireadh na tréimhse fabhraithe go dtí dílsiú an chéad mhéid iarchurtha (cuid 15.3).

Ba cheart do ghnólachtaí infheistíochta an fhoirm ina ndámhtar an luach saothair inathraithe iarchurtha a chur san áireamh laistigh den sceideal iarchurtha agus ba cheart dóibh, nuair is iomchuí, a sceidil iarchurtha a idirdhealú trí na comhpháirteanna sin a éagsúlú le haghaidh catagóirí éagsúla ball foirne sainaitheanta. Ba cheart go mbeadh sceideal iarchurtha éifeachtach mar thoradh ar chomhcheangal na gcomhpháirteanna sin, ina soláthraítear dreasachtaí soiléire maidir le glacadh riosca fadtéarmach trí nósanna imeachta trédhearcacha um ailíniú riosca.