15.6 Beartas coinneála

Ba cheart an tréimhse choinneála a chuirtear i bhfeidhm ar luach saothair inathraithe a íoctar in ionstraimí a shocrú ar fhad iomchuí chun dreasachtaí a ailíniú le leasanna níos fadtéarmaí an ghnólachta infheistíochta.

Ba cheart go mbeadh an gnólacht infheistíochta ábalta a mhíniú conas a bhaineann an beartas coinneála le bearta eile um ailíniú riosca agus conas a dhéantar idirdhealú leo idir ionstraimí a íoctar láithreach agus ionstraimí iarchurtha.

Agus an tréimhse choinneála á socrú, ba cheart do ghnólachtaí infheistíochta fad iomlán na tréimhse iarchurtha agus na tréimhse coinneála atá beartaithe agus an tionchar a bheidh ag an gcatagóir ball foirne sainaitheanta ar phróifíl riosca na ngnólachtaí infheistíochta agus ar fhad an timthrialla gnó atá ábhartha don chatagóir foirne a chur san áireamh.

Ba cheart tréimhse choinneála níos faide mar a chuirtear i bhfeidhm go ginearálta maidir le gach ball foirne sainaitheanta a bhreithniú i gcásanna go bhféadfadh na rioscaí a bhaineann leis an bhfeidhmíocht teacht chun cinn i ndiaidh dheireadh na tréimhse iarchurtha agus na tréimhse coinneála caighdeánaí, do na baill foirne is mó bhfuil tionchar acu ar phróifíl riosca na ngnólachtaí infheistíochta ar a laghad.

I gcás ionstraimí dámhachtana, ba cheart tréimhse choinneála de bhliain amháin ar a laghad a shocrú. Ba cheart tréimhsí níos faide a shocrú go háirithe i gcás ina mbraitheann coigeartuithe riosca ex post go príomha ar athruithe ar luach na n-ionstraimí a dámhadh. I gcás gurb é cúig bliana ar a laghad an tréimhse iarchurtha, féadfar tréimhse choinneála don chuid iarchurtha de shé mhí ar a laghad a fhorchur ar bhaill foirne shainaitheanta seachas comhaltaí den chomhlacht bainistíochta agus den lucht bainistíochta sinsearaí ar cheart íostréimhse choinneála bliana amháin a chur i bhfeidhm ina leith.