13.1 Cinn na bhfeidhmeanna rialaithe inmheánaigh

Ba cheart cinn feidhmeanna rialaithe inmheánaigh a bhunú ar leibhéal ordlathach leordhóthanach lena soláthraítear an t-údarás agus an stádas iomchuí do cheann na feidhme rialaithe is gá chun a fhreagrachtaí nó a freagrachtaí a chomhlíonadh. Ba cheart don cheann um chomhlíonadh agus, i gcás ina bhfuil siad bunaithe, cinn na bainistíochta riosca agus feidhmeanna iniúchóireachta inmheánaí a bheith freagrach go díreach don chomhlacht bainistíochta agus ba cheart don chomhlacht bainistíochta athbhreithniú a dhéanamh ar a bhfeidhmíocht.

I gcás inar gá, ba cheart do chinn feidhmeanna rialaithe inmheánaigh a bheith in ann rochtain a bheith acu ar an gcomhlacht bainistíochta ina fheidhm mhaoirseachta agus tuairisciú go díreach dó ina fheidhm mhaoirseachta chun ábhair imní a chur in iúl agus rabhadh a thabhairt don fheidhm mhaoirseachta, i gcás inarb iomchuí, nuair a dhéanann forbairtí sonracha difear d’eisitheoir ARTanna nó nuair a d’fhéadfadh siad difear a dhéanamh dó. Níor cheart go gcuirfeadh sé sin cosc ar chinn feidhmeanna rialaithe inmheánaigh tuairisciú laistigh de na gnáthlínte tuairiscithe chomh maith.

Ba cheart próisis dhoiciméadaithe a bheith i bhfeidhm ag eisitheoirí ARTanna chun post cheann feidhme rialaithe inmheánaigh a shannadh agus chun a fhreagrachtaí nó a freagrachtaí a tharraingt siar. In aon chás, níor cheart cinn na bhfeidhmeanna rialaithe inmheánaigh a bhaint gan formheas a fháil roimh ré ón gcomhlacht bainistíochta ina fheidhm mhaoirseachta i gcás ina bhfuil sé bunaithe.