C.2.1 Dea-cháil leordhóthanach

Agus measúnú á dhéanamh maidir le cé acu an bhfuil dea-cháil ar chomhaltaí chomhlacht bainistíochta eisitheora ARTanna nó CASP, ba cheart a chumhdach sa mheasúnú, i gcomhréir le hAirteagal 18(5)(a) agus Airteagal 62(3)(a) de MiCA, easpa taifid choiriúil i leith ciontuithe agus easpa pionós arna bhforchur faoin dlí tráchtála is infheidhme, faoin dlí dócmhainneachta is infheidhme agus faoin dlí seirbhísí airgeadais is infheidhme nó i ndáil leis an reachtaíocht maidir le frithsciúradh airgid agus maoiniú frithsceimhlitheoireachta, calaois nó dliteanas gairmiúil. Ina theannta sin, ba cheart a chumhdach sa mheasúnú aon fhíoras eile is eol a d’fhéadfadh a bheith ina chúis leis an measúnú nach bhfuil dea-cháil leordhóthanach ar an gcomhalta mar a shonraítear sa chuid seo. Tá feidhm ag na ceanglais sin ar bhonn leanúnach i gcomhréir le hAirteagal 34(2) agus Airteagal 68(1) de MiCA.

Níor cheart comhaltaí den chomhlacht bainistíochta a bheith faoi réir smachtbhannaí, trádbhaic ná bearta a bhaineann le sceimhlitheoireacht, maoiniú sceimhlitheoireachta nó leathadh arna gcinneadh ag Ballstát, ag an Aontas nó ag eagraíocht idirnáisiúnta, e.g. na Náisiúin Aontaithe. I gcás ina gcuirtear comhalta den chomhlacht bainistíochta leis an liosta sin de smachtbhannaí airgeadais spriocdhírithe, ba cheart toirmeasc a chur ar an gcomhalta sin a fheidhm a chomhlíonadh agus é nó í a bhaint den chomhlacht bainistíochta.

Ba cheart an measúnú ar chritéir maidir le dea-cháil chomhaltaí den chomhlacht bainistíochta eisitheora ARTanna nó CASP a dhéanamh ar bhonn na faisnéise dá dtagraítear sna Rialacháin Tharmligthe ón gCoimisiún a glacadh de bhun Airteagal 18(6) de MiCA i gcás eisitheora ARTanna agus Airteagal 62(5) den Rialachán sin i gcás CASPanna.