Artikolu 25 Monitoraġġ tal-prestazzjoni

1.   L-awtorità superviżorja nazzjonali għandha tivvaluta, f’kooperazzjoni mal-awtorità kompetenti nazzjonali mingħajr preġudizzju għall-arranġamenti nazzjonali li jirriżultaw mill-Artikolu 4(5), jekk is-servizzi tan-navigazzjoni bl-ajru pprovduti fl-ispazju tal-ajru taħt ir-responsabbiltà tagħhom jissodisfawx il-miri ta’ prestazzjoni li jinsabu fil-pjanijiet ta’ prestazzjoni approvati f’konformità mal-Artikolu 24 u jekk dawk il-pjanijiet ġewx implimentati korrettament, u għandha timplimenta l-iskemi ta’ inċentivi msemmija fl-Artikolu 21(4), il-punt (i).

2.   L-awtorità superviżorja nazzjonali għandha toħroġ rapporti regolari dwar il-monitoraġġ tal-prestazzjoni tas-servizzi tan-navigazzjoni bl-ajru pprovduti mill-fornituri tas-servizzi tan-navigazzjoni bl-ajru deżinjati skont l-Artikoli 8 u 10 u jagħmluhom disponibbli għall-Kummissjoni. Ir-riżultati ta’ dawk il-valutazzjonijiet għandhom ikunu disponibbli għall-pubbliku mingħajr preġudizzju għall-Artikolu 52(3).

Il-fornituri tas-servizzi tan-navigazzjoni bl-ajru ddeżinjati skont l-Artikoli 8 u 10 għandhom jipprovdu l-informazzjoni u d-data meħtieġa għal tali monitoraġġ lill-awtorità superviżorja nazzjonali. Dan għandu jinkludi informazzjoni u data relatati mal-kostijiet reali tas-servizzi pprovduti u akkwistati u d-dħul relatat.

3.   Sal-punt li l-fornitur tas-servizzi tan-navigazzjoni bl-ajru jkollu mezzi raġonevoli biex itaffi l-impatt ta’ fatturi esterni, meta l-miri ta’ prestazzjoni li jinsabu fil-pjanijiet ta’ prestazzjoni ma jintlaħqux jew il-pjan ta’ prestazzjoni ma jiġix implimentat b’mod korrett, l-awtorità superviżorja nazzjonali għandha teżiġi li l-fornituri tas-servizzi tan-navigazzjoni bl-ajru kkonċernati jimplimentaw miżuri korrettivi. Dawk il-miżuri korrettivi għandhom ikunu adegwati biex itejbu l-prestazzjoni u proporzjonati, b’mod partikolari billi jitqiesu l-interdipendenzi mas-sikurezza u bejn l-oqsma ta’ prestazzjoni, u l-impatt fuq in-network.

Meta l-miżuri korrettivi imposti ma jiġux applikati kif suppost, l-Istat Membru kkonċernat għandu jieħu l-miżuri xierqa u jinforma lill-Kummissjoni. Fil-każ ta’ prestazzjoni insuffiċjenti persistenti, il-Kummissjoni tista’ tieħu azzjoni f’konformità mal-Artikolu 34(2) u 34(3).

4.   Il-Kummissjoni għandha timmonitorja l-prestazzjoni tal-forniment tas-servizzi tan-navigazzjoni bl-ajru u tal-funzjonijiet tan-network abbażi tar-rapporti tal-awtoritajiet superviżorji nazzjonali u tal-analiżi tad-data riċevuta u għandha twettaq valutazzjonijiet regolari tal-kisba ġenerali tal-miri ta’ prestazzjoni għall-Unjoni kollha u tippreżenta r-riżultati lill-kumitat imsemmi fl-Artikolu 48(1).